90,000 ಕೋಟಿ ರೂ. ದಾಟಲಿದೆ ಜನ್‌ ಧನ್‌ ಠೇವಣಿ

ಹೊಸದಿಲ್ಲಿ: ಜನವರಿ 30ರ ವರೆಗಿನ ಮಾಹಿತಿ ಪ್ರಕಾರ, ದೇಶದ ಜನ್‌ ಧನ್‌ ಖಾತೆಗಳಲ್ಲಿನ ಠೇವಣಿ ಮೊತ್ತ 90,000 ಕೋಟಿ ರೂ. ಸಮೀಪಕ್ಕೆ ಬಂದಿದೆ. ಠೇವಣಿದಾರರ ಅಪಘಾತ ವಿಮೆ ಮೊತ್ತವನ್ನು 2 ಲಕ್ಷ ರೂ.ಗೆ ಸರಕಾರವು ಕಳೆದ ಆಗಸ್ಟ್‌ನಲ್ಲಿ ಏರಿಸಿದ್ದು, ಈ ಖಾತೆಗಳನ್ನು ಆಕರ್ಷಕಗೊಳಿಸುವ ಪ್ರಯತ್ನಗಳು ನಡೆದಿವೆ.

ಹಣಕಾಸು ಸಚಿವಾಲಯದ ಮಾಹಿತಿ ಪ್ರಕಾರ, 2017ರ ಮಾರ್ಚ್‌ನಿಂದ ಠೇವಣಿ ಮೊತ್ತ ಏರುತ್ತಿದೆ. ಅದು ಈಗಾಗಲೇ ಜ.30ರ ವರೆಗೆ 89,257 ಕೋಟಿ ರೂ. ಮುಟ್ಟಿದೆ. ಜ.23ರ ಹೊತ್ತಿಗೆ 88,566 ಕೋಟಿ ರೂ. ಮುಟ್ಟಿತ್ತು.

2014ರ ಆಗಸ್ಟ್‌ 28ರಂದು ಪ್ರಧಾನಮಂತ್ರಿ ಜನ್‌ ಧನ್‌ ಯೋಜನೆಗೆ ಚಾಲನೆ ನೀಡಲಾಗಿದ್ದು, ಪ್ರತಿಯೊಬ್ಬರನ್ನೂ ಬ್ಯಾಂಕಿಂಗ್‌ ವಲಯಕ್ಕೆ ತರುವುದು ಸರಕಾರದ ಉದ್ದೇಶ. ಈ ಖಾತೆದಾರರು ಮೊದಲು 10,000 ರೂ. ಓವರ್‌ ಡ್ರಾಫ್ಟ್‌(ಓ.ಡಿ) ಪಡೆಯಬಹುದಿತ್ತು. ಅದನ್ನು ಈಗ ದ್ವಿಗುಣಗೊಳಿಸಲಾಗಿದೆ.

ಖಾತೆದಾರರಿಗೆ 2 ಲಕ್ಷ ರೂ. ಅಪಘಾತ ವಿಮೆ ಇದೆ. ಹೊಸ ಮಾಹಿತಿ ಪ್ರಕಾರ, 34.14 ಕೋಟಿ ಪಿಎಂಜೆಡಿವೈ ಖಾತೆಗಳಿವೆ. 27.26 ಕೋಟಿ ಖಾತೆದಾರರಿಗೆ ರುಪೇ ಡೆಬಿಟ್‌ ಕಾರ್ಡ್‌ ಅನ್ನು ಇನ್‌ಬಿಲ್ಡ್‌ ಅಪಘಾತ ವಿಮೆಯನ್ನೂ ನೀಡಲಾಗಿದೆ.

ಈ ಖಾತೆದಾರರಲ್ಲಿ ಸೇ.53ರಷ್ಟು ಮಹಿಳೆಯರು ಇದ್ದಾರೆ. ಶೇ.59ರಷ್ಟು ಗ್ರಾಮೀಣ ಮತ್ತು ಅರೆಪಟ್ಟಣಗಳಲ್ಲಿನ ನಿವಾಸಿಗಳಿದ್ದಾರೆ.