ವಲಸಿಗರ ಗ್ರೀನ್‌ ಕಾರ್ಡ್‌ ಕನಸಿಗೆ ಟ್ರಂಪ್‌ ಕೊಳ್ಳಿ

ವಾಷಿಂಗ್ಟನ್‌ : ಗ್ರೀನ್‌ ಕಾರ್ಡ್‌ ಪಡೆಯುವ ಕನಸುಕಂಡಿದ್ದ ಭಾರತೀಯರಿಗೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಶಾಕ್‌ ನೀಡಲು ಹೊರಟಿದ್ದಾರೆ.

ಆಹಾರ ಮತ್ತು ನಗದು ನೆರವು ಸೇರಿದಂತೆ ಸರಕಾರದ ಸೌಲಭ್ಯ ಪಡೆಯುತ್ತಿರುವ ವಲಸಿಗರಿಗೆ ಟ್ರಂಪ್‌ ಸರಕಾರವು ಗ್ರೀನ್‌ ಕಾರ್ಡ್‌ ನಿರಾಕರಿಸುವ ಸಾಧ್ಯತೆ ಇದೆ. ಹೊಸ ನಿಯಮಗಳಿಂದಾಗಿ ಅಮೆರಿಕಾದಲ್ಲಿ ನೆಲೆಸಿರುವ ಸಾವಿರಾರು ಭಾರತೀಯರಿಗೆ ತೊಡಕಾಗಲಿದೆ.

ಪ್ರಸ್ತಾಪಿತ ನೂತನ ಕಾನೂನಿಗೆ ಸೆ.21ರಂದು ಅಮೆರಿಕ ಗೃಹ ಕಾರ್ಯದರ್ಶಿ ಸಹಿ ಹಾಕಿದ್ದು, ಇದನ್ನು ಗೃಹ ಸಚಿವಾಲಯದ ವೆಬ್‌ಸೈಟ್‌ನಲ್ಲಿ ಪ್ರಕಟಿಸಲಾಗಿದೆ. ಪ್ರಸ್ತಾಪಿತ ನಿಯಮವನ್ನು ಸಿಲಿಕಾನ್‌ ವ್ಯಾಲಿಯ ಟೆಕ್‌ ಉದ್ಯಮ ಮತ್ತು ರಾಜಕೀಯ ನಾಯಕರು ಟೀಕಿಸಿದ್ದಾರೆ.

ಅಮೆರಿಕದಲ್ಲಿನ ವಲಸಿಗರು, ಗ್ರೀನ್‌ ಕಾರ್ಡ್‌ ಅರ್ಜಿದಾರರು ಅಮೆರಿಕ ಸರಕಾರದ ಸೌಲಭ್ಯಗಳನ್ನು ಪಡೆದಿರಬಾರದು ಎನ್ನುವ ಹೊಸ ನಿಯಮವು, ಅನೇಕ ವಲಸಿಗರಿಗೆ ತೊಡಕಾಗಲಿದೆ. ಅಂದರೆ, ''ಅಮೆರಿಕಾಕ್ಕೆ ವಲಸೆ ಬರುವವರು ತಮ್ಮ ಆರ್ಥಿಕ ಪರಿಸ್ಥಿತಿಯನ್ನು ತಾವೇ ನಿಭಾಯಿಸಿಕೊಳ್ಳುವ ಸಾಮರ್ಥ್ಯ‌ ಹೊಂದಿರಬೇಕು. ಅಲ್ಲಿನ ಸರಕಾರದ ಸೌಲಭ್ಯಗಳನ್ನು ಆಶ್ರಯಿಸುವಂತೆ ಇರಬಾರದು,'' ಎಂದು ಹೋಮ್‌ ಲ್ಯಾಂಡ್‌ ಸೆಕ್ಯುರಿಟಿ ಕಾರ್ಯದರ್ಶಿ ಕಿರ್ಸ್ಟ್‌ ಜೆನ್‌ ನೀಲ್ಸೆನ್‌ ಹೇಳಿದ್ದಾರೆ.

ವಲಸಿಗರ ಸಂಖ್ಯೆಯನ್ನು ತಡೆಯಲು ಅಮೆರಿಕಾ ಸರಕಾರ ನಾನಾ ಕ್ರಮಗಳನ್ನು ಅನುಸರಿಸುತ್ತಾ ಬಂದಿದೆ. ಈಗಿನ ಉದ್ದೇಶಿತ ಕಾನೂನಿನ ಬಗ್ಗೆ ಸರಕಾರವು ಸಾರ್ವಜನಿಕರ ಪ್ರತಿಕ್ರಿಯೆಯನ್ನು ಆಹ್ವಾನಿಸಿದೆ. ಅಮೆರಿಕ ಸಂಸತ್ತಿನ ಅನುಮೋದನೆ ಬಳಿಕ ಅದು ಜಾರಿಗೆ ಬರಲಿದೆ.

ಎಫ್‌ಡಬ್ಲ್ಯುಡಿ.ಯುಎಸ್‌ ವಿರೋಧ

ವಲಸಿಗರನ್ನು ನಿಯಂತ್ರಿಸುವ ಸರಕಾರದ ಹೊಸ ಉದ್ದೇಶಿತ ಕಾನೂನನ್ನು ಎಫ್‌ಡಬ್ಲ್ಯುಡಿ.ಯುಎಸ್‌ ಪ್ರಬಲವಾಗಿ ವಿರೋಧಿಸಿದೆ. ಫೇಸ್‌ ಬುಕ್‌, ಮೈಕ್ರೊಸಾಫ್ಟ್‌, ಡ್ರಾಪ್‌ ಬಾಕ್ಸ್‌, ಯಾಹೂ, ಗೂಗಲ್‌ ಮತ್ತಿತರ ಕಂಪನಿಗಳನ್ನು ಪ್ರತಿನಿಧಿಸುವ ಈ ಒಕ್ಕೂಟವು, ''ಈ ಕಾನೂನಿನಿಂದ ಇಡೀ ದೇಶಕ್ಕೆ ತೊಡಕಾಗಲಿದೆ,'' ಎಂದಿದೆ.