ಅಕ್ಟೋಬರ್‌ನಿಂದ ಟಿವಿಗಳ ಬೆಲೆ ಹೆಚ್ಚಳ ಸಾಧ್ಯತೆ

ಹೊಸದಿಲ್ಲಿ: ಟೆಲಿವಿಷನ್‌ಗಳ ಬೆಲೆ ಮುಂದಿನ ತಿಂಗಳಿನಿಂದ ಹೆಚ್ಚಾಗುವ ನಿರೀಕ್ಷೆ ಇದೆ. ಏಕೆಂದರೆ ಕೇಂದ್ರ ಸರಕಾರ ಟಿವಿ ತಯಾರಿಕಾ ಉತ್ಪನ್ನಗಳ ಮೇಲೆ ನೀಡಿದ್ದ ವಿನಾಯಿತಿ ಇದೇ ಸೆಪ್ಟಂಬರ್‌ 30ಕ್ಕೆ ಅಂತ್ಯಗೊಳ್ಳಲಿದೆ.

ಈ ಹಿನ್ನೆಲೆಯಲ್ಲಿ ಟಿವಿಗಳ ಮೇಲೆ ಅಕ್ಟೋಬರ್‌ ತಿಂಗಳಿನಲ್ಲಿ ಹೆಚ್ಚಾಗುವ ನಿರೀಕ್ಷೆ ಇದೆ.

ಟಿವಿ ಉತ್ಪಾದನೆಯಲ್ಲಿ ಪ್ರಮುಖವಾಗಿ ಪ್ಯಾನಲ್‌ಗಳ ಆಮುದು ಸುಂಕಕ್ಕೆ ಕೇಂದ್ರ ಸರಕಾರ ವಿನಾಯಿತಿ ನೀಡಿತ್ತು. ಈಗ ಈ ವಿನಾಯಿತಿ ಅವಧಿ ಸೆಪ್ಟೆಂಬರ್‌ ಅಂತ್ಯಕ್ಕೆ ಕೊನೆಗೊಳ್ಳಲಿದೆ.

ಈಗಾಗಲೇ ಟೆಲಿವಿಷನ್‌ ಕ್ಷೇತ್ರ ಭಾರಿ ಸಂಕಷ್ಟ ಎದುರಿಸುತ್ತಿದೆ. ಈಗ ಮತ್ತೆ ವಿನಾಯಿತಿ ಅಂತ್ಯಗೊಂಡರೆ ಬೆಲೆಗಳು ಪರಿಷ್ಕೃತಗೊಳ್ಳುವ ಸಾಧ್ಯತೆ ಇದೆ. ಇದರಿಂದ ಗ್ರಾಹಕರನ್ನು ಸೆಳೆಯಲು ತುಸು ಕಷ್ಟವಾಗಬೇಕಾಗಬಹುದು ಎಂದು ಪರಿಣತರು ವಿಶ್ಲೇಷಿಸಿದ್ದಾರೆ.

ದಕ್ಷಿಣ ಕೊರಿಯಾದ ಪ್ರಮುಖ ಕಂಪನಿ ಸ್ಯಾಮ್ಸಂಗ್‌ ಈಗಾಗಲೇ ವಿಯೆಟ್ನಾಂನಿಂದ ಭಾರತಕ್ಕೆ ಉತ್ಪನ್ನ ಘಟಕವನ್ನು ಸ್ಥಳಾಂತರ ಮಾಡಲು ಮುಂದಾಗಿದೆ. ಈ ಕುರಿತ ನಿರ್ಧಾರವನ್ನು ಅತಿ ಶೀಘ್ರದಲ್ಲ ತೆಗೆದುಕೊಳ್ಳುವ ಸಾದ್ಯತೆ ಇದೆ.

ಒಂದು ವೇಳೆ ಆಮದು ಸುಂಕ ನಮ್ಮ ಮೇಲೆ ಬಿದ್ದರೆ ಅದನ್ನು ನಾವು ಅನಿವಾರ್ಯವಾಗಿ ಗ್ರಾಹಕರ ಮೇಲೆಯೇ ಹಾಕಬೇಕಾಗುತ್ತದೆ. ಇದು ಬಿಟ್ಟರೆ ನಮ್ಮ ಮುಂದೆ ಬೇರೆ ಆಯ್ಕೆಯೇ ಇಲ್ಲ ಎಂದು ಟಿವಿ ಕಂಪನಿಯವರು ವಿಜಯ ಕರ್ನಾಟಕ ಸೋದರ ಸಂಸ್ಥೆ ಟೈಮ್ಸ್ ಆಫ್‌ ಇಂಡಿಯಾಗೆ ತಿಳಿಸಿದ್ದಾರೆ.

ಆಮದು ಸುಂಕ ಹೆಚ್ಚಳವಾದರೆ ಟಿವಿಗಳ ಮೇಲೆ ಬೆಲೆ ಶೇಕಡ 4ರಷ್ಟು ಹೆಚ್ಳವಾಗುವ ನಿರೀಕ್ಷೆ ಇದೆ.