ಹೊಸದಿಲ್ಲಿ: ಟೀವಿ ಸೆಟ್, ಮೈಕ್ರೊವೇವ್, ಎಲ್ಇಡಿ ದೀಪಗಳು ಮತ್ತು ಇತರೆ ಕೆಲವು ಎಲೆಕ್ಟ್ರಾನಿಕ್ ವಸ್ತುಗಳನ್ನು ಖರೀದಿಸಲು ಹೊರಟಿರುವಿರಾ? ಕೇಂದ್ರ ಸರಕಾರವು ಈ ಉತ್ಪನ್ನಗಳ ಮೇಲಿನ ಅಬಕಾರಿ ಸುಂಕ ಏರಿಕೆ ಮಾಡಿದ್ದು, ಅದರ ಹೊರೆ ನಿಮ್ಮ ಮೇಲೆಯೇ ಬೀಳಲಿದೆ.
ಸ್ಥಳೀಯ ಉತ್ಪಾದನೆ ಹೆಚ್ಚಿಸುವ ನಿಟ್ಟಿನಲ್ಲಿ ಕೆಲವು ಉತ್ಪನ್ನಗಳ ಮೇಲೆ ಸರಕಾರವು ಅಬಕಾರಿ ಸುಂಕವನ್ನು ಹೆಚ್ಚಿಸಿ, ಕಳೆದ ವಾರವಷ್ಟೇ ಅಧಿಸೂಚನೆ ಹೊರಡಿಸಿದೆ. ಸರಕಾರದ ಅಧಿಸೂಚನೆ ಪ್ರಕಾರ ಟೆಲಿವಿಷನ್ ಸೆಟ್ಗಳ ಅಬಕಾರಿ ಸುಂಕವನ್ನು ಶೇ.20ಕ್ಕೆ ಏರಿಸಲಾಗಿದೆ. ಇದೇ ರೀತಿ ಸ್ಮಾರ್ಟ್ಫೋನ್ಗಳ ಮೇಲಿನ ಅಬಕಾರಿ ಸುಂಕ ಶೇ.15ಕ್ಕೆ ಏರಿಕೆಯಾಗಿದೆ.
ಎಲ್ಇಡಿ ದೀಪಗಳಿಗೆ ಶೇ.20ರ ಅಬಕಾರಿ ಸುಂಕ ಹಾಕಲಾಗಿದೆ. ಆಮದಾಗುವ ಮೈಕ್ರೊವೇವ್ಗಳ ಮೇಲಿನ ಅಬಕಾರಿ ಸುಂಕ ದುಪ್ಪಟ್ಟಾಗಿದ್ದು ಶೇ.20 ತಲುಪಿದೆ. ''ಮೈಕ್ರೊವೇವ್ ಓವೆನ್ ದರವು 400 ರೂ.ನಿಂದ 500 ರೂ. ತನಕ ಏರಿಕೆಯಾಗಲಿದೆ,'' ಎಂದು ಗೋಡ್ರೇಜ್ ಅಪ್ಲೆಯೆನ್ಸಸ್ನ ಬಿಸಿನೆಸ್ ವಿಭಾಗದ ಮುಖ್ಯಸ್ಥ ಕಮಲ್ ನಂದಿ ಹೇಳಿದ್ದಾರೆ.
ಮೂಲಗಳ ಪ್ರಕಾರ, ಅಬಕಾರಿ ಸುಂಕದ ಏರಿಕೆಯಿಂದಾಗಿ ಎಲ್ಇಡಿ ಟಿವಿ ಸೆಟ್ಗಳ ದರಗಳು 2,000 ರೂ.ನಿಂದ 10,000 ರೂ. ತನಕ ಪರದೆಯ ಗಾತ್ರದ ಅನುಸಾರ ಏರಿಕೆಯಾಗಲಿವೆ.
''ವಿಡಿಯೊಕಾನ್ನಂಥ ಸ್ಥಳೀಯ ಕಂಪನಿಗಳಿಗೆ ಯಾವುದೇ ತೊಡಕಿಲ್ಲ. ಆದಾಗ್ಯೂ, ಇತರೆ ಕಂಪನಿಗಳ ಉತ್ಪನ್ನಗಳ ದರಗಳು ಶೇ.5ರಿಂದ 6ರಷ್ಟು ಏರಿಕೆಯಾಗುವ ಸಾಧ್ಯತೆ ಇದೆ,'' ಎಂದು ಸಿಎಂಎಸ್ ಎಲೆಕ್ಟ್ರಾನಿಕ್ ಜಂಕ್ಷನ್ ವ್ಯವಸ್ಥಾಪಕ ನಿರ್ದೇಶಕ ಸಿ.ಎಂ.ಸಿಂಗ್ ಹೇಳಿದ್ದಾರೆ.
ಭಾರತದಲ್ಲೇ ಉತ್ಪನ್ನಗಳನ್ನು ಉತ್ಪಾದಿಸಲು ವಿದೇಶಿ ಕಂಪನಿಗಳನ್ನು ಉತ್ತೇಜಿಸಲು ಮೇಕ್ ಇನ್ ಇಂಡಿಯಾ ಅಭಿಯಾನವನ್ನು ಸರಕಾರ ನಡೆಸುತ್ತಿದೆ. ಈ ನಿಟ್ಟಿನಲ್ಲಿ ಸರಕಾರವು ಅಬಕಾರಿ ಸುಂಕ ಏರಿಕೆ ಮೂಲಕ, ದೇಶೀಯ ಉತ್ಪನ್ನಗಳಿಗೆ ಮಾರುಕಟ್ಟೆ ಸೃಷ್ಟಿಸಲು ಮುಂದಾಗಿದೆ.
======
ಐಫೋನ್ ದರ 3,720 ರೂ. ತನಕ ಏರಿಕೆ
ಆ್ಯಪಲ್ ಕಂಪನಿಯು ತನ್ನ ನಾನಾ ಮಾಡೆಲ್ಗಳ ಐಫೋನ್ ದರವನ್ನು ಅಬಕಾರಿ ಸುಂಕದ ಏರಿಕೆ ಬಳಿಕ 3,720 ರೂ. ತನಕ ಏರಿಕೆ ಮಾಡಿವೆ. ವಿಡಿಯೊ ರೆಕಾರ್ಡ್ ಮಾಡುವ ಸಾಧನದ ಸೀಮಾ ಸುಂಕವನ್ನು ಈಗಿನ ಶೇ.10ರಿಂದ 15ಕ್ಕೆ ಏರಿಸಲಾಗಿದೆ.
ಸೆಟ್ ಟಾಪ್ ಬಾಕ್ಸ್ಗಳ ಮೇಲಿನ ಆಮದು ಸುಂಕವೂ ದ್ವಿಗುಣಗೊಂಡಿದ್ದು ಶೇ.20 ತಲುಪಿದೆ.