ಆನ್‌ಲೈನ್‌ನಲ್ಲಿ ಆಧಾರ್‌ ಸಂಖ್ಯೆ ಪೋಸ್ಟ್ ಮಾಡದಿರಿ: ಯುಐಡಿಎಐ ಮನವಿ

ಹೊಸದಿಲ್ಲಿ: ಆಧಾರ್‌ ಸಂಖ್ಯೆಯನ್ನು ಇಂಟರ್‌ನೆಟ್‌ ಅಥವಾ ಸಾಮಾಜಿಕ ಜಾಲತಾಣಗಳಲ್ಲಿ ಎಲ್ಲರಿಗೂ ಕಾಣುವಂತೆ ಪೋಸ್ಟ್‌ ಮಾಡದಿರಲು ಸಾರ್ವಜನಿಕರಿಗೆ ವಿಶಿಷ್ಟ ಗುರುತಿನ ಚೀಟಿ ಪ್ರಾಧಿಕಾರ (ಯುಐಡಿಎಐ) ಮನವಿ ಮಾಡಿದೆ.

ಆಧಾರ್‌ ಸಂಖ್ಯೆಯನ್ನು ಸಾಮಾಜಿಕ ಜಾಲ ತಾಣ ಅಥವಾ ಆನ್‌ಲೈನ್‌ನಲ್ಲಿ ನಮೂದಿಸಿ, ಪ್ರದರ್ಶಿಸುವುದು ಸೂಕ್ತವಲ್ಲ. ಕಾನೂನಿನ ಪ್ರಕಾರವೂ ಇದು ಸರಿಯಲ್ಲ ಎಂದು ಯುಐಡಿಎಐ ಹೇಳಿಕೆ ನೀಡಿದೆ.

ದೂರಸಂಪರ್ಕ ನಿಯಂತ್ರಕ ಟ್ರಾಯ್‌ನ ಮುಖ್ಯಸ್ಥ ಆರ್‌.ಎಸ್‌ ಶರ್ಮಾ ಅವರು ತಮ್ಮ ಆಧಾರ್‌ ಸಂಖ್ಯೆಯನ್ನು ಟ್ವಿಟರ್‌ನಲ್ಲಿ ಬಹಿರಂಗವಾಗಿ ಪ್ರದರ್ಶಿಸಿ, ಹ್ಯಾಕರ್‌ಗಳಿಗೆ ಸವಾಲೆಸೆದಿದ್ದರು. ''ಯಾರೇ ಆಗಲಿ, ನನ್ನ ಆಧಾರ್‌ ಸಂಖ್ಯೆಯನ್ನು ದುರ್ಬಳಕೆ ಮಾಡಿಕೊಳ್ಳಲಿ,'' ಎಂದು ಸವಾಲು ಹಾಕಿದ್ದರು. ಅವರ ಈ ಕ್ರಮಕ್ಕೆ ಸಾಮಾಜಿಕ ಜಾಲತಾಣಗಳಲ್ಲಿ ಪರ-ವಿರೋಧ ತೀವ್ರ ಚರ್ಚೆಯಾಗಿತ್ತು. ಶರ್ಮಾ ಅವರ ಪುತ್ರಿಗೆ ಹ್ಯಾಕರ್‌ಗಳು ಬೆದರಿಕೆಯ ಸಂದೇಶ ರವಾನಿಸಿದ್ದರು ಎಂದೂ ವರದಿಯಾಗಿತ್ತು. ಅಲ್ಲದೆ, ಹ್ಯಾಕರ್‌ಗಳು ಶರ್ಮಾ ಅವರ ಖಾತೆಗೆ 1 ರೂ. ಜಮಾ ಮಾಡುವ ಮೂಲಕ ಆಧಾರ್‌ ದುರ್ಬಳಕೆ ಸಾಧ್ಯ ಎಂದು ನಿರೂಪಿಸಿದ್ದರು.

ಈ ಹಿನ್ನೆಲೆಯಲ್ಲಿ ಯುಐಡಿಎಐ, ಇಂಟರ್‌ನೆಟ್‌, ಸಾಮಾಜಿಕ ಜಾಲತಾಣಗಳಲ್ಲಿ ಜನರು ತಮ್ಮ ಆಧಾರ್‌ ಸಂಖ್ಯೆಯನ್ನು ಪ್ರದರ್ಶಿಸಿ ಸವಾಲು ಹಾಕುವುದು ಸರಿಯಲ್ಲ ಎಂದಿದೆ. ಕೆಲವರು ಸಾಮಾಜಿಕ ಜಾಲತಾಣಗಳಲ್ಲಿ ಇಂಥ ಕೃತ್ಯ ಎಸಗಿರುವುದು ವರದಿಯಾಗಿರುವ ಹಿನ್ನೆಲೆಯಲ್ಲಿ ಈ ಮನವಿ ಮಾಡಿರುವುದಾಗಿ ಅದು ತಿಳಿಸಿದೆ.

ಯಾರೋ ಒಬ್ಬರ ಆಧಾರ್‌ ಸಂಖ್ಯೆಯನ್ನು ಮತ್ತೊಬ್ಬರು ಯಾವುದೇ ಉದ್ದೇಶದ ದೃಢೀಕರಣಕ್ಕೆ ಬಳಸುವುದು ಕಾನೂನು ಪ್ರಕಾರ ಅಪರಾಧವಾಗಿದೆ ಎಂದೂ ಪ್ರಾಧಿಕಾರ ಎಚ್ಚರಿಸಿದೆ.