ನೀರವ್‌ ಕಸ್ಟಡಿ ಅವಧಿ ಜೂ.27ರ ತನಕ ವಿಸ್ತರಣೆ

ಲಂಡನ್‌: ಪಂಜಾಬ್‌ ನ್ಯಾಷನಲ್‌ ಬ್ಯಾಂಕ್‌(ಪಿಎನ್‌ಬಿ) ಹಗರಣದ ಪ್ರಮುಖ ಆರೋಪಿ ನೀರವ್‌ ಮೋದಿ ಕಸ್ಟಡಿ ಅವಧಿಯನ್ನು ಲಂಡನ್‌ ಕೋರ್ಟ್‌ ಜೂ.27ರ ತನಕ ವಿಸ್ತರಿಸಿದೆ.

48 ವರ್ಷದ ನೀರವ್‌ರನ್ನು ಮಾ.19ರಂದು ಬಂಧಿಸಲಾಗಿತ್ತು. ಪ್ರಸ್ತುತ ಲಂಡನ್‌ನ ವ್ಯಾಂಡ್ಸ್‌ವರ್ತ್‌ ಜೈಲಿನಲ್ಲಿದ್ದು, ಅವರ ಮೂರನೇ ಜಾಮೀನು ಅರ್ಜಿಯನ್ನೂ ಈ ತಿಂಗಳ ಆರಂಭದಲ್ಲಿಯೇ ಕೋರ್ಟ್‌ ವಜಾ ಮಾಡಿತ್ತು.

ಗುರುವಾರ ನೀರವ್‌ರನನ್ನು ವೆಸ್ಟ್‌ಮಿನ್‌ಸ್ಟರ್‌ ಕೋರ್ಟ್‌ನ ಚೀಫ್‌ ಮ್ಯಾಜಿಸ್ಪ್ರೇಟ್‌ ಎದುರು ಹಾಜರು ಪಡಿಸಲಾಯಿತು.

ಕಸ್ಟಡಿ ಅವಧಿಯನ್ನು ವಿಸ್ತರಿಸಿರುವ ಲಂಡನ್‌ ಕೋರ್ಡ್‌, ''ಒಂದು ವೇಳೆ ನಾವು ನೀರವ್‌ರನ್ನು ಬ್ರಿಟನ್‌ನಿಂದ ಗಡಿಪಾರು ಮಾಡಿದರೆ, ಭಾರತದ ಯಾವ ಜೈಲಿನಲ್ಲಿ ನೀರವ್‌ರನ್ನು ಇಡಲು ವ್ಯವಸ್ಥೆ ಮಾಡಿರುವಿರಿ?'' ಎಂದು ಪ್ರಶ್ನಿಸಿದೆ. ಈ ಸಂಬಂಧಿ ವಿವರಗಳನ್ನು 14 ದಿನಗಳೊಳಗೆ ಸಲ್ಲಿಸುವಂತೆ ಭಾರತ ಸರಕಾರವನ್ನು ಕೇಳಿದೆ.

ವಿಚಾರಣೆ ಸಂದರ್ಭದಲ್ಲಿ ಇ.ಡಿ ಅಧಿಕಾರಿಗಳು ಕೋರ್ಟ್‌ನ ಹೊರ ಆವರಣದಲ್ಲಿ ಇದ್ದರು. ನೀರವ್‌ ಮೋದಿ ಕಳೆದ ಒಂದು ವರ್ಷದಿಂದ ಲಂಡನ್‌ನಲ್ಲಿ ವಾಸವಾಗಿದ್ದು, ವಾಚ್‌ ಮತ್ತು ಜುವೆಲ್ಲರಿಗಳ ಉದ್ಯಮ ನಡೆಸುತ್ತಿದ್ದಾರೆ ಎನ್ನಲಾಗಿದೆ. ನೀರವ್‌ ಗಡಿಪಾರಿಗಾಗಿ ಭಾರತ ಬೇಡಿಕೆ ಸಲ್ಲಿಸಿದ್ದು, ಅಲ್ಲಿನ ಕೋರ್ಟ್‌ ವಾರಂಟ್‌ ಹೊರಡಿಸಿ ಬಂಧಿಸಿತ್ತು. ಜಾಮೀನು ನೀಡಿದರೆ ಮತ್ತೆ ಶರಣಾಗಲಾರರು ಎಂಬ ಕಾರಣಕ್ಕೆ ಕಸ್ಟಡಿ ಅವಧಿಯನ್ನು ಮುಂದೂಡಲಾಗುತ್ತಿದೆ.

ಪಂಜಾಬ್‌ ನ್ಯಾಷನಲ್‌ ಬ್ಯಾಂಕಿಗೆ 13,500 ಕೋಟಿ ರೂ. ವಂಚಿಸಿ 2018ರ ಜನವರಿಯಲ್ಲಿ ಭಾರತ ಬಿಟ್ಟು ನೀರವ್‌ ಪರಾರಿಯಾಗಿದ್ದರು.