ಭಾರತದಲ್ಲಿ 5 ವರ್ಷಕ್ಕಿಂತ ಕೆಳಗಿನ ಮಕ್ಕಳ ಸಾವು ಇಳಿಮುಖ: ವಿಶ್ವಸಂಸ್ಥೆ ವರದಿ

ಹೊಸದಿಲ್ಲಿ: ವಿಶ್ವಸಂಸ್ಥೆಯ ಇತ್ತೀಚಿನ ವರದಿಯ ಪ್ರಕಾರ, ಭಾರತದಲ್ಲಿ 5 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳ ಸಾವಿನ ಸಂಖ್ಯೆ ನಿರಂತರವಾಗಿ ಇಳಿಮುಖವಾಗುತ್ತಿದೆ. 2012ರಿಂದ 2017ರ ಅವಧಿಯಲ್ಲಿ ಇದು ಶೇ.22ರಿಂದ ಶೇ.18ಕ್ಕೆ ಕಡಿಮೆಯಾಗಿದೆ. ಮೊದಲ ಬಾರಿಗೆ 10 ಲಕ್ಷಕ್ಕಿಂತ ಕೆಳಕ್ಕಿಳಿದಿದೆ.

ವಿಶ್ವದಲ್ಲಿ 5 ವರ್ಷದೊಳಗಿನ ಪ್ರತಿ 1000 ಮಕ್ಕಳಲ್ಲಿ ಸರಾಸರಿ 39 ಮಂದಿ ಸಾವಿಗೀಡಾಗುತ್ತಿದ್ದಾರೆ. ಭಾರತದಲ್ಲೂ ಇದೇ ಮಟ್ಟಕ್ಕೆ ಇಳಿಕೆಯಾಗಿರುವುದು ಗಮನಾರ್ಹ. ಹೆಣ್ಣು ಮಕ್ಕಳ ಮೃತ್ಯುವಿನ ಪ್ರಮಾಣದಲ್ಲೂ ಶೇ.10ರಿಂದ ಶೇ.2.5ಕ್ಕೆ ತಗ್ಗಿದೆ.

ಹೀಗಿದ್ದರೂ, ಯುನಿಸೆಫ್‌, ವಿಶ್ವ ಆರೋಗ್ಯ ಸಂಸ್ಥೆ (ಡಬ್ಲ್ಯುಎಚ್‌ಒ), ವರ್ಲ್ಡ್‌ ಬ್ಯಾಂಕ್‌ ಗ್ರೂಪ್‌ನ ಪ್ರಕಾರ, 2017ರಲ್ಲಿ 15 ವರ್ಷದೊಳಗಿನ 63 ಲಕ್ಷ ಮಕ್ಕಳು ಮೃತಪಟ್ಟಿದ್ದಾರೆ. ಇದರಲ್ಲಿ 54 ಲಕ್ಷ ಮಕ್ಕಳು 5 ವರ್ಷದೊಳಗೆ ಸಾವಿಗೀಡಾಗಿದ್ದಾರೆ. ಇದರಲ್ಲಿ ಸುಮಾರು ಅರ್ಧದಷ್ಟು ನವಜಾತ ಶಿಶುಗಳಾಗಿವೆ.

2030ರ ವೇಳೆಗೆ 5.6 ಕೋಟಿ ಸಾವು?

ಯಾವುದೇ ಕ್ರಮ ಕೈಗೊಳ್ಳದಿದ್ದರೆ, ಈ ವರ್ಷದಿಂದ 2030ರ ತನಕ 5 ವರ್ಷದೊಳಗಿನ 5.6 ಕೋಟಿ ಮಕ್ಕಳು ಮೃತ್ಯುವಿಗೀಡಾಗಲಿದ್ದಾರೆ. ಇವರಲ್ಲಿ ಅರ್ಧದಷ್ಟು ಮಂದಿ ನವಜಾತ ಶಿಶುಗಳಾಗಿರುತ್ತಾರೆ. ಯುನಿಸೆಫ್‌ ಮಕ್ಕಳ ಮರಣ ತಡೆಯಲು 1990ರಿಂದಲೇ ಯತ್ನಿಸುತ್ತಿದೆ. ಹೀಗಿದ್ದರೂ, ಈಗಲೂ ಲಕ್ಷಾಂತರ ಮಕ್ಕಳ ಸಾವಾಗುತ್ತಿದೆ ಎಂದು ಯುನಿಸೆಫ್‌ ನಿರ್ದೇಶಕ ಲಾರೆನ್ಸ್‌ ಚಾಂಡಿ ತಿಳಿಸಿದ್ದಾರೆ. ಶಿಶು ಮರಣ ನಗರಕ್ಕಿಂತ ಗ್ರಾಮೀಣ ಪ್ರದೇಶದಲ್ಲಿ ಹೆಚ್ಚು.

ಆಫ್ರಿಕಾದಲ್ಲಿ ಮಕ್ಕಳ ಮರಣ ಹೆಚ್ಚು:

ಜಗತ್ತಿನಲ್ಲಿ ಐದು ವರ್ಷದೊಳಗಿನ ಮಕ್ಕಳ ಸಾವು ಅತಿ ಹೆಚ್ಚಾಗಿ ಆಫ್ರಿಕಾದ ರಾಷ್ಟ್ರಗಳಲ್ಲಿ ಸಂಭವಿಸಿತ್ತದೆ. 2017ರಲ್ಲಿ ಅರ್ಧದಷ್ಟು ಮಕ್ಕಳ ಸಾವು ಆಫ್ರಿಕಾದಲ್ಲೇ ಆಗಿತ್ತು.

ಶಿಶು ಮರಣಕ್ಕೆ ಕಾರಣ:

1. ಜನನ ಸಂದರ್ಭದ ಸಂಕೀರ್ಣ ಸಮಸ್ಯೆಗಳು.

2. ನ್ಯುಮೋನಿಯಾ

3. ಅತಿ ಸಾರ

4.ಮಲೇರಿಯಾ

ರಾಜ್ಯ ಸರಕಾರದ ಮಕ್ಕಳ ಸಹಾಯವಾಣಿ ಸಂಖ್ಯೆ: 1098

ಚಿಲ್ಡ್ರನ್‌ ಹೆಲ್ಪ್‌ಲೈನ್‌: 1089