ಯುನಿಲಿವರ್‌ ತೆಕ್ಕೆಗೆ ಹಾರ್ಲಿಕ್ಸ್‌, ಬೂಸ್ಟ್‌

ಹೊಸದಿಲ್ಲಿ: ಗ್ಲಾಕ್ಸೊಸ್ಮಿತ್‌ಕ್ಲೈನ್‌ನ(ಜಿಎಸ್‌ಕೆ) ಜನಪ್ರಿಯ ಬ್ರಾಂಡ್‌ಗಳಾದ 'ಹಾರ್ಲಿಕ್ಸ್‌' ಮತ್ತು 'ಬೂಸ್ಟ್‌' ಅನ್ನು ಆಂಗ್ಲೊ-ಡಚ್‌ ಮೂಲದ ಎಫ್‌ಎಂಸಿಜಿ ದೈತ್ಯ ಯುನಿಲಿವರ್‌ ಕಂಪನಿಯು ತನ್ನ ತೆಕ್ಕೆಗೆ ಸೇರಿಸಿಕೊಂಡಿದೆ.

3.1 ಲಕ್ಷ ಕೋಟಿ ಪೌಂಡ್‌ಗಳ(ಸುಮಾರು 27,750 ಕೋಟಿ ರೂ.) ಡೀಲ್‌ ಇದಾಗಿದೆ. ಯುನಿಲಿವರ್‌ನ ಭಾರತೀಯ ವಿಭಾಗವಾದ ಹಿಂದೂಸ್ತಾನ್‌ ಯುನಿಲಿವರ್‌ ಲಿಮಿಟೆಡ್‌(ಎಚ್‌ಯುಎಲ್‌), ಜಿಎಸ್‌ಕೆ ಕನ್ಸೂಮರ್‌ ಹೆಲ್ಟ್‌ಕೇರ್‌ ಲಿಮಿಟೆಡ್‌ ಅನ್ನು ತನ್ನದಾಗಿಸಿಕೊಂಡಿದೆ. ಆರೋಗ್ಯವರ್ಧಕ ಪಾನೀಯ ವಿಭಾಗದಲ್ಲಿ ಭಾರತೀಯ ಮಾರುಕಟ್ಟೆಯಲ್ಲಿ ಜಿಎಸ್‌ಕೆ ಸಿಎಚ್‌ ಇಂಡಿಯಾ ನಾಯಕನಾಗಿ ಈ ತನಕ ಮಿಂಚಿತ್ತು. ಬಾಂಗ್ಲಾದೇಶ್‌ ಮತ್ತು ಏಷ್ಯಾದ ಇತರೆ 20 ಮಾರುಕಟ್ಟೆಗಳಿಗೂ ಈ ವ್ಯವಹಾರ ಅನ್ವಯಿಸುತ್ತದೆ.