ತೆರಿಗೆ ರಾಜ ಭಾರತದಿಂದ ಅಮೆರಿಕಕ್ಕೆ ನಷ್ಟ: ಟ್ರಂಪ್‌

ವಾಷಿಂಗ್ಟನ್‌: ಭಾರತವನ್ನು 'ತೆರಿಗೆಗಳ ರಾಜ' ಎಂದು ಪದೇಪದೆ ಟೀಕಿಸುತ್ತಿರುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌, ಈಗ ಮತ್ತೆ ಅದೇ ಮಾತುಗಳನ್ನು ಪುನರುಚ್ಚರಿಸಿದ್ದಾರೆ.

ವಿಸ್ಕಾನ್‌ಸಿನ್‌ ರಾಜ್ಯದ ಗ್ರೀನ್‌ ಬೇ ಸಿಟಿಯಲ್ಲಿ ರಿಪಬ್ಲಿಕನ್‌ ಪಕ್ಷದ ರಾರ‍ಯಲಿ ಉದ್ದೇಶಿಸಿ ಮಾತನಾಡಿದ ಟ್ರಂಪ್‌, ''ಭಾರತ, ಜಪಾನ್‌ ಮತ್ತು ಚೀನಾ ದೇಶಗಳು ಅಮೆರಿಕದ ಪೇಪರ್‌ ಉತ್ಪನ್ನಗಳು ಮತ್ತು ಹಾರ್ಲೆ-ಡೇವಿಡ್‌ಸನ್‌ ಬೈಕ್‌ಗಳೂ ಸೇರಿದಂತೆ ನಾನಾ ವಸ್ತುಗಳಿಗೆ ಭಾರಿ ತೆರಿಗೆ ವಿಧಿಸುತ್ತಿವೆ,'' ಎಂದು ದೂರಿದ್ದಾರೆ. ''ಈ ದೇಶಗಳ ತೆರಿಗೆ ನೀತಿಯಿಂದ ಅಮೆರಿಕಕ್ಕೆ ಕೋಟ್ಯಂತರ ಡಾಲರ್‌ ನಷ್ಟವಾಗುತ್ತಿದೆ,'' ಎಂದೂ ಹೇಳಿದ್ದಾರೆ.

''ಈ ದೇಶಗಳು ಹೆಚ್ಚಿನ ಸುಂಕ ವಿಧಿಸುತ್ತಿದ್ದರೆ, ನಾವೇನೂ ಸುಮ್ಮನೇ ಕುಳಿತಿಲ್ಲ. ಮೂರು ವರ್ಷಗಳ ಹಿಂದೆ ಹಾರ್ಲೆ-ಡೇವಿಡ್‌ಸನ್‌ ಬೈಕ್‌ಗಳಿಗೆ ಶೇ.100ರಷ್ಟು ಸುಂಕವನ್ನು ಭಾರತ ವಿಧಿಸುತ್ತಿತ್ತು. ನಾನು ಭಾರತದ ಪ್ರಧಾನಿ ನರೇಂದ್ರ ಮೋದಿ ಜೊತೆ ಫೋನ್‌ನಲ್ಲಿ ಮಾತನಾಡಿದ ಮೇಲೆ ಸುಂಕವನ್ನು ಶೇ.50ರಷ್ಟು ಇಳಿಕೆ ಮಾಡಲಾಗಿದೆ,'' ಎಂದು ಟ್ರಂಪ್‌ ಹೇಳಿದ್ದಾರೆ.