ಹೆಚ್ಚಿದ ಬಿಸಿಲಿನ ಝಳ, ತರಕಾರಿ ಉತ್ಪಾದನೆ ಕುಂಠಿತ; ಬೀನ್ಸ್‌ ದರ ಏರಿಕೆ, ಕ್ಯಾರೆಟ್‌ ಅಗ್ಗ

ಬೆಂಗಳೂರು: ಬಿಸಿಲಿನ ಝಳ ಏರುತ್ತಿದ್ದಂತೆಯೇ ಹುರುಳಿಕಾಯಿ ಸೇರಿದಂತೆ ಕೆಲ ತರಕಾರಿಗಳ ಬೆಲೆ ಏರುಮುಖವಾಗಿದೆ. ಮೆಂತ್ಯ ಸೊಪ್ಪು, ಕೊತ್ತಂಬರಿ ಸೊಪ್ಪು, ಕ್ಯಾರೆಟ್‌, ಬದನೆಕಾಯಿಗಳ ದರದಲ್ಲಿ ಕೊಂಚ ಏರಿಕೆಯಾಗಿದೆ. ಹುರುಳಿಕಾಯಿ ಕಳೆದ ವಾರ ಕೆ.ಜಿ.ಗೆ ಕೇವಲ 60 ರೂ. ಇದ್ದುದು ಈಗ 80 ರೂ. ತಲುಪಿದೆ.

ಬಿಸಿಲಿನಿಂದಾಗಿ ಬೆಳೆಗಳಿಗೆ ನೀರು ಕಡಿಮೆಯಾಗಿ, ಉತ್ಪಾದನೆ ಕುಂಠಿತಗೊಂಡಿದೆ. ಇದೇ ವೇಳೆ ಎಲ್ಲೆಡೆ ಮದುವೆ, ಗೃಹ ಪ್ರವೇಶದಂತಹ ಶುಭ ಕಾರ್ಯಗಳು ಹೆಚ್ಚಾಗಿ ನಡೆಯುತ್ತಿರುವುದರಿಂದ ತರಕಾರಿಗಳಿಗೆ ಸಹಜವಾಗಿ ಬೇಡಿಕೆ ಹೆಚ್ಚಾಗಿದೆ. ಈ ಹಿನ್ನೆಲೆಯಲ್ಲಿ ಕೆಲ ಸೊಪ್ಪು ಮತ್ತು ತರಕಾರಿಗಳ ಬೆಲೆ ಏರಿಕೆಯಾಗಿದೆ.

ಹುರುಳಿಕಾಯಿ ಹೊರತುಪಡಿಸಿದರೆ ಇತರ ಎಲ್ಲಾ ತರಕಾರಿಗಳ ಬೆಲೆಯೂ ಸಾಧಾರಣವಾಗಿದೆ. ಸಗಟು ದರದಲ್ಲಿ ಎಲ್ಲಾ ಬಗೆಯ ತರಕಾರಿಗಳ ದರವೂ 15 ರಿಂದ 20 ರೂ. ಮಿತಿಯಲ್ಲಿದೆ. ಹುರುಳಿಕಾಯಿ ಮಾತ್ರ ಸಗಟು ದರದಲ್ಲಿ 38-40 ರೂ. ಇದೆ. ಚಿಲ್ಲರೆ ದರದಲ್ಲಿ 20 ರೂ. ಹೆಚ್ಚಿಸಿ ಮಾರಲಾಗುತ್ತಿದೆ ಎನ್ನುತ್ತಾರೆ ವ್ಯಾಪಾರಿಗಳು.

ಹಣ್ಣು, ತರಕಾರಿ ಫಸಲಿಗೆ ಬೇಸಿಗೆ ಬರೆ, ಉತ್ಪಾದನೆ 30% ಕುಸಿತ ಸಾಧ್ಯತೆ
ಕಳೆದ ಹಲವು ತಿಂಗಳಿಂದ ಕ್ಯಾರೆಟ್‌ ದರ ಕೆಜಿಗೆ 90-100 ರೂ. ಇತ್ತು. ಇದೀಗ ಕೆಜಿಗೆ 20-30 ರೂ.ಗೆ ಇಳಿಕೆಯಾಗಿದೆ. ಕೆ.ಆರ್‌. ಮಾರುಕಟ್ಟೆ ಮತ್ತಿತರ ಕಡೆ ಮೂರನೇ ದರ್ಜೆಯ ಕ್ಯಾರೆಟ್‌ ತಳ್ಳುಗಾಡಿಗಳಲ್ಲಿ ಕೆಜಿಗೆ ಕೇವಲ 10 ರೂ. ಗೆ ಮಾರಾಟವಾಗುತ್ತಿದೆ. ಈ ಬಾರಿ ರೈತರು ಹೆಚ್ಚಿನ ಸಂಖ್ಯೆಯಲ್ಲಿ ಕ್ಯಾರಟ್‌ ಬೆಳೆದಿದ್ದಾರೆ. ಹೀಗಾಗಿ ಉತ್ಪಾದನೆ ಹೆಚ್ಚಾಗಿದ್ದು, ಬೆಲೆಗಳು ಕುಸಿದಿವೆ ಎನ್ನುತ್ತಾರೆ ಮಾರಾಟಗಾರರು.

ಹಾಪ್‌ಕಾಮ್ಸ್‌ನಲ್ಲಿ ಸೊಪ್ಪು-ತರಕಾರಿ ದರ (ಕೆ.ಜಿ.ಗಳಲ್ಲಿ)