13,960 ಕೋಟಿ ರೂ. ಸೆಟ್ಲ್‌ಮೆಂಟ್‌ ಆಫರ್‌ ನೀಡಿದ ವಿಜಯ್‌ ಮಲ್ಯ

ಹೊಸದಿಲ್ಲಿ: ಬ್ರಿಟನ್‌ನಿಂದ ಭಾರತಕ್ಕೆ ಉದ್ಯಮಿ ವಿಜಯ ಮಲ್ಯ ಅವರನ್ನು ಕರೆತರಲು ಕೇಂದ್ರ ಸರಕಾರ ಪ್ರಯತ್ನಿಸುತ್ತಿದೆ. ಏತನ್ಮಧ್ಯೆ, ರಾಜಿ ಮೂಲಕ ವಿವಾದ ಇತ್ಯರ್ಥ ಪಡಿಸಿಕೊಳ್ಳಲು ಮಲ್ಯ ಮುಂದಾಗಿದ್ದಾರೆ. ತಮ್ಮ ಸಾಲಕ್ಕೆ ಸಂಬಂಧಿಸಿದಂತೆ 13,960 ಕೋಟಿ ರೂ.ಗಳ ಸೆಟ್ಲ್‌ಮೆಂಟ್‌ ಪ್ಯಾಕೇಜ್‌ ಆಹ್ವಾನವನ್ನು ಸರಕಾರದ ಮುಂದಿಟ್ಟಿದ್ದಾರೆ.

ಬ್ಯಾಂಕ್‌ನಿಂದ 9,000 ಕೋಟಿ ರೂ.ಗಳ ಸಾಲ ಪಡೆದು ಸುಸ್ತಿದಾರರಾಗಿರುವ ಮಲ್ಯ, ಈಗ 13,960 ಕೋಟಿ ರೂ.ಗಳ ಆಫರ್‌ ಅನ್ನು ಬ್ಯಾಂಕ್‌ಗಳಿಗೆ ನೀಡಿದ್ದಾರೆ. ಸಾಲ ತೀರಿಸುವುದಾಗಿ ಹೇಳುತ್ತಲೇ ಬಂದಿದ್ದ ಅವರು, ಈ ಸಲ ಮೊತ್ತವನ್ನು ಸೂಚಿಸಿದ್ದಾರೆ.

ಮಲ್ಯ ಪರ ವಕೀಲರು ಸುಪ್ರೀಂ ಕೋರ್ಟ್‌ಗೆ ಈ ಸಂಬಂಧ ವಿವರಣೆ ನೀಡಿದ್ದಾರೆ. ಮಲ್ಯ ನೀಡಿರುವ ಸೆಟ್‌್ಲಮೆಂಟ್‌ ಆಫರ್‌ ಅನ್ನು ಸರಕಾರವು ಒಪ್ಪಿ, ಅವರ ವಿರುದ್ಧ ಜಾರಿ ನಿರ್ದೇಶನಾಲಯ ದಾಖಲಿಸಿರುವ ಎಲ್ಲಪ್ರಕರಣಗಳನ್ನು ವಾಪಸ್‌ ಪಡೆಯುವಂತೆ ವಕೀಲರು ಕೋರಿದ್ದಾರೆ. ನ್ಯಾಯಮೂರ್ತಿ ಎಸ್‌.ಎ.ಬೋಬ್ಡೆ ನೇತೃತ್ವದ ನ್ಯಾಯಪೀಠವು ಪ್ರಕರಣದ ವಿಚಾರಣೆ ನಡೆಸುತ್ತಿದೆ. ಮಲ್ಯ ವಕೀಲರ ಸೆಟ್ಲ್‌ಮೆಂಟ್‌ ಆಫರ್‌ ಅನ್ನು ಸಾಲಿಸಿಟರ್‌ ಜನರಲ್‌ ತುಷಾರ್‌ ಮೆಹ್ತಾ ವಿರೋಧಿಸಿದ್ದಾರೆ.

ಅಸಲೇ 9,000 ಕೋಟಿ ರೂ.!

ಮಲ್ಯ ಪಡೆದಿರುವ ಸಾಲದಲ್ಲಿಅ ಸಲು 9,000 ಕೋಟಿ ರೂ. ಇದೆ. ಈಗ 13,960 ಕೋಟಿ ರೂ. ಪಡೆದು ಕೇಸುಗಳಿಂದ ಪಾರಾಗಲು ಮಲ್ಯ ಹೊರಟಿದ್ದಾರೆ.

ರಾಜಾಶ್ರಯಕ್ಕೆ ಕಸರತ್ತು

ಬ್ರಿಟನ್‌ ಕೋರ್ಟ್‌ಗಳು ಮಲ್ಯರನ್ನು ಭಾರತಕ್ಕೆ ಹಸ್ತಾಂತರಿಸಲು ಈಗಾಗಲೇ ಹಸಿರು ನಿಶಾನೆ ತೋರಿಸಿವೆ. ಆದರೆ, ಕಾನೂನು ಆಯ್ಕೆಗಳನ್ನು ಬಳಸಿ ಮಲ್ಯ ದಿನ ತಳ್ಳುತ್ತಿದ್ದಾರೆ. ಈ ಮಧ್ಯೆ, ರಾಜಾಶ್ರಯ ಕೋರಿಯೂ ಅವರು ಅರ್ಜಿ ಸಲ್ಲಿಸಿದ್ದಾರೆ.