100% ಸಾಲ ವಾಪಸ್‌ ಕೊಡಲು ಸಿದ್ಧ: ಮಲ್ಯ ಆಫರ್‌

ಹೊಸದಿಲ್ಲಿ : 'ಶೇ.100ರಷ್ಟು ಸಾಲವನ್ನು ಮರುಪಾವತಿ ಮಾಡುತ್ತೇನೆ... ಅವಕಾಶ ನೀಡಿ ಎಂದು ನಾನು ಪದೇಪದೆ ಕೋರಿದರೂ ಬ್ಯಾಂಕ್‌ಗಳು ಸ್ಪಂದಿಸುತ್ತಿಲ್ಲ ,'' ಎಂದು ಉದ್ಯಮಿ ವಿಜಯ ಮಲ್ಯ ದೂರಿದ್ದಾರೆ.

ಸಾಮಾಜಿಕ ಜಾಲತಾಣ ಟ್ವಿಟರ್‌ನಲ್ಲಿ ಈ ಬಗ್ಗೆ ಟ್ವೀಟ್‌ ಮಾಡಿರುವ 63 ವರ್ಷದ ಮಲ್ಯ, ''ಕಿಂಗ್‌ಫಿಷರ್‌ ಸೇರಿದಂತೆ ಅನೇಕ ಭಾರತೀಯ ಏರ್‌ಲೈನ್ಸ್‌ಗಳು ನೆಲಕಚ್ಚಿವೆ. ಇತ್ತೀಚೆಗೆ ಜೆಟ್‌ ಏರ್‌ವೇಸ್‌ ಸಹಾ ನಷ್ಟದಿಂದ ಕುಸಿದಿದೆ. ಇದೆಲ್ಲವೂ ನಿಜವಾಗಿಯೂ ಬ್ಯುಸಿನೆಸ್‌ನ ವೈಫಲ್ಯಗಳೇ ಆಗಿವೆ. ಆದರೆ, ಶೇ.100ರಷ್ಟು ಸಾಲ ತೀರಿಸುವುದಾಗಿ ಹೇಳಿದರೂ, ನನ್ನ ವಿರುದ್ಧ ಸಿಬಿಐ ಮತ್ತು ಇ.ಡಿಗಳು ಕ್ರಿಮಿನಲ್‌ ಆರೋಪಗಳನ್ನು ದಾಖಲಿಸಿವೆ. ಕೇವಲ ನನ್ನ ವಿರುದ್ಧ ಮಾತ್ರ ಏಕೆ ಹೀಗೆ ಮಾಡಲಾಗುತ್ತಿದೆ? ನನಗೆ ನಿಜಕ್ಕೂ ಆಶ್ಚರ್ಯವಾಗುತ್ತಿದೆ,'' ಎಂದು ಅಭಿಪ್ರಾಯಪಟ್ಟಿದ್ದಾರೆ.

''ಟಿ.ವಿ ಚಾನೆಲ್‌ಗಳ ಚರ್ಚೆಗಳನ್ನು ನೋಡಿದ್ದೇನೆ. ಉದ್ಯೋಗಿಗಳಿಗೆ ವೇತನ ನೀಡಲೂ ಸಾಧ್ಯವಾಗದೇ ಜೆಟ್‌ ಏರ್‌ವೇಸ್‌ ಕುಸಿದಿದೆ. ಕಿಂಗ್‌ಫಿಷರ್‌ನ ಸಾಲವನ್ನು ಶೇ.100ರಷ್ಟು ಪಾವತಿಸುವುದಾಗಿ ನಾನು ಹೇಳಿದರೂ ಯಾವೊಂದು ಬ್ಯಾಂಕ್‌ ಸಹಾ ಸಾಲವನ್ನು ಹಿಂಪಡೆಯಲು ಮುಂದೆ ಬಂದಿಲ್ಲ. ಏಕೆ?'' ಎಂದು ಪ್ರಶ್ನಿಸಿದ್ದಾರೆ.