ಹೊಸದಿಲ್ಲಿ: ದೇಶದ ಒಂದು ಕಾಲದ ಅತೀ ದೊಡ್ಡ ಟೆಲಿಕಾಂ ಸಂಸ್ಥೆ ವೊಡಾಫೋನ್‌ ಐಡಿಯಾ ಕಳೆದ ಏಪ್ರಿಲ್‌-ಜೂನ್‌ ಅವಧಿಯಲ್ಲಿ ಬರೋಬ್ಬರಿ 25,460 ಕೋಟಿ ರೂ.ಗಳ ಭಾರಿ ನಷ್ಟಕ್ಕೀಡಾಗಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ ಕಂಪನಿ 4,873 ಕೋಟಿ ರೂ. ನಷ್ಟಕ್ಕೀಡಾಗಿತ್ತು.

ವಿಲೀನ ಪ್ರಕ್ರಿಯೆ, ಲೈಸೆನ್ಸ್‌ , ಎಜಿಆರ್‌ ಶುಲ್ಕ, ಬಡ್ಡಿ ಇತ್ಯಾದಿ ವೆಚ್ಚಗಳ ಪರಿಣಾಮ ವೊಡಾಫೋನ್‌ ಐಡಿಯಾದ ನಿವ್ವಳ ನಷ್ಟದಲ್ಲಿ ಏರಿಕೆಯಾಗಿದೆ. ಕಂಪನಿಯ ಆದಾಯ ಶೇ.5.42ರಷ್ಟು ಇಳಿಕೆಯಾಗಿದ್ದು, 10,659 ಕೋಟಿ ರೂ.ಗೆ ತಗ್ಗಿದೆ.

ಜೂನ್‌ಗೆ ಅಂತ್ಯವಾದ ತ್ರೈಮಾಸಿಕದಲ್ಲಿ ಪ್ರತಿ ಗ್ರಾಹಕನಿಂದ ಸರಾಸರಿ ಆದಾಯವು (ಟೆಲಿಕಾಂ ಕ್ಷೇತ್ರದಲ್ಲಿ ಇದೇ ಪ್ರಮುಖ ಮಾನದಂಡ) 121 ರೂ.ಗಳಿಂದ 114 ರೂ.ಗೆ ತಗ್ಗಿದೆ. ವೊಡಾಫೋನ್‌ ಐಡಿಯಾ ಒಟ್ಟು 1.18 ಲಕ್ಷ ಕೋಟಿ ರೂ. ಸಾಲವನ್ನು ಹೊಂದಿದೆ. ಇದರಲ್ಲಿ 92,270 ಕೋಟಿ ರೂ.ಗಳನ್ನು ಸರಕಾರಕ್ಕೆ ಸ್ಪೆಕ್ಟ್ರಮ್‌ ಶುಲ್ಕದ ರೂಪದಲ್ಲಿ ನೀಡಬೇಕಾಗಿದೆ.

ಆಗ 'ಹಲೋ' ಅಂದ್ರೆ 8 ರೂಪಾಯಿ! ಭಾರತದಲ್ಲಿ ಮೊಬೈಲ್‌ ಫೋನ್‌ ಸೇವೆಗೆ 25ರ ಹರೆಯ

ಕಳೆದ ಡಿಸೆಂಬರ್‌ನಲ್ಲಿ ವೊಡಾಫೋನ್‌ ಐಡಿಯಾ ಸೇರಿದಂತೆ ಬಹುತೇಕ ಎಲ್ಲ ಖಾಸಗಿ ಟೆಲಿಕಾಂ ಕಂಪನಿಗಳು ಮೊಬೈಲ್‌ ಡೇಟಾ ದರಗಳನ್ನು ಏರಿಸಿತ್ತು. ಏರ್‌ಟೆಲ್‌ ಮತ್ತು ಜಿಯೊ ಇದರ ಪ್ರಯೋಜನ ಪಡೆದಿದ್ದು, ಆದಾಯವನ್ನು ಹೆಚ್ಚಿಸಿವೆ. ಹೀಗಿದ್ದರೂ ವೊಡಾಫೋನ್‌ ಐಡಿಯಾದ ಆದಾಯದಲ್ಲಿ ಹೆಚ್ಚಳ ಕಂಡು ಬಂದಿಲ್ಲ. ಬದಲಿಗೆ ಇಳಿಕೆಯಾಗಿದೆ.