ಹೊಸದಿಲ್ಲಿ: ಜರ್ಮನಿಯ ಕಾರು ಉತ್ಪಾದಕ ಕಂಪನಿಯಾದ ವೋಕ್ಸ್‌ವ್ಯಾಗನ್‌, ತನ್ನ ನಾನಾ ಮಾಡೆಲ್‌ಗಳ ದರವನ್ನು ಜನವರಿಯಿಂದ 20 ಸಾವಿರ ರೂ. ತನಕ ಏರಿಕೆ ಮಾಡಲಿದೆ.
''ಜಾಗತಿಕ ಮಟ್ಟದಲ್ಲಿ ಕಚ್ಚಾವಸ್ತುಗಳ ದರ ಏರಿಕೆಯಾಗಿದೆ. ಸ್ಥಳೀಯ ದರಗಳೂ ಹೆಚ್ಚಳವಾಗಿವೆ. ಹೀಗಾಗಿ ಕಾರುಗಳ ದರ ಏರಿಕೆ ಮಾಡುವ ಅನಿವಾರ್ಯ ಸೃಷ್ಟಿಯಾಗಿದೆ,'' ಎಂದು ಕಂಪನಿಯ ನಿರ್ದೇಶಕ ಸ್ಟಿಫ್ಪೆನ್‌ ನಾಪ್‌ ಅವರು ಮಂಗಳವಾರ ಹೇಳಿದ್ದಾರೆ.
ಬುಧವಾರವಷ್ಟೇ ದೇಶದ ಬೃಹತ್‌ ಕಾರು ಉತ್ಪಾದಕ ಕಂಪನಿಯಾದ ಮಾರುತಿ ಸುಜುಕಿ ಇಂಡಿಯಾ ಲಿಮಿಟೆಡ್‌ ಸಹ, ಜನವರಿಯಿಂದ ತನ್ನ ನಾನಾ ಮಾಡೆಲ್‌ಗಳ ದರವನ್ನು ಶೇ.2ರಷ್ಟು ಏರಿಕೆ ಮಾಡಲು ಚಿಂತನೆ ನಡೆಸಿರುವುದಾಗಿ ಹೇಳಿತ್ತು. ಟಾಟಾ ಮೋಟಾರ್ಸ್‌ ಕಂಪನಿಯು ಮುಂದಿನ ತಿಂಗಳಿಂದ 25 ಸಾವಿರ ರೂ. ತನಕ ಏರಿಕೆ ಮಾಡಲಿದೆ. ಮಹೀಂದ್ರಾ ಆ್ಯಂಡ್‌ ಮಹೀಂದ್ರಾ ಕಂಪನಿ ಸಹ ಶೇ.1.5ರಿಂದ 2ರಷ್ಟು ದರ ಏರಿಕೆಗೆ ಮುಂದಾಗಿದೆ. ಮತ್ತೊಂದು ಕಡೆ ಟೊಯೋಟಾ ಕಿರ್ಲೋಸ್ಕರ್‌ ಮೋಟಾರ್‌, ಹೋಂಡಾ ಕಾರ್ಸ್‌ ಇಂಡಿಯ ಸಹ ದರ ಏರಿಕೆ ಮಾಡುವುದಾಗಿ ಹೇಳಿವೆ.