ಬಿಎಸ್‌ಎನ್‌ಎಲ್‌ನ 80 ಸಾವಿರ ಉದ್ಯೋಗಿಗಳಿಗೆ ವಿಆರ್‌ಎಸ್‌?

ಹೊಸದಿಲ್ಲಿ: ಸರಕಾರಿ ಸ್ವಾಮ್ಯದ ದೂರಸಂಪರ್ಕ ಸಂಸ್ಥೆಗಳಾದ ಬಿಎಸ್‌ಎನ್‌ಎಲ್‌ ಮತ್ತು ಎಂಟಿಎನ್‌ಎಲ್‌ ತಮ್ಮ ಸಿಬ್ಬಂದಿಗೆ ಸ್ವಯಂ ನಿವೃತ್ತಿ ಯೋಜನೆಯನ್ನು(ವಿಆರ್‌ಎಸ್‌) ಜಾರಿಗೊಳಿಸಿವೆ.

ಬಿಎಸ್‌ಎನ್‌ಎಲ್‌ನ 70-80 ಸಾವಿರ ಉದ್ಯೋಗಿಗಳು ವಿಆರ್‌ಎಸ್‌ ಆಯ್ಕೆ ಮಾಡುವ ನಿರೀಕ್ಷೆ ಇದೆ. ಇದರಿಂದ ಕಂಪನಿಗೆ ವೇತನ ವೆಚ್ಚದಲ್ಲಿ 7,000 ಕೋಟಿ ರೂ. ಉಳಿತಾಯವಾಗಲಿದೆ. ಉದ್ಯೋಗಿಗಳಿಗೆ ನವೆಂಬರ್‌ 4 ರಿಂದ ಡಿಸೆಂಬರ್‌ 3ರ ಅವಧಿಯಲ್ಲಿ ವಿಆರ್‌ಎಸ್‌ ಅವಕಾಶ ಲಭ್ಯವಿರಲಿದೆ.

"ವಿಆರ್‌ಎಸ್‌ ಆಯ್ಕೆ ಬಗ್ಗೆ ಸಿಬ್ಬಂದಿಗೆ ಮಾಹಿತಿ ನೀಡುವಂತೆ ಈಗಾಗಲೇ ಸಂಬಂಧ ಪಟ್ಟ ಘಟಕಗಳಿಗೆ ಸೂಚನೆ ನೀಡಲಾಗಿದೆ,'' ಎಂದು ಬಿಎಸ್‌ಎನ್‌ಎಲ್‌ನ ವ್ಯವಸ್ಥಾಪಕ ನಿರ್ದೇಶಕ ಪಿ.ಕೆ. ಪುರವರ್‌ ಹೇಳಿದ್ದಾರೆ.

ಬಿಎಸ್‌ಎನ್‌ಎಲ್‌ ಒಟ್ಟು 1.50 ಲಕ್ಷ ಸಿಬ್ಬಂದಿಯನ್ನು ಹೊಂದಿದ್ದು, ವಿಆರ್‌ಎಸ್‌ಗೆ ಸುಮಾರು 1 ಲಕ್ಷ ಸಿಬ್ಬಂದಿ ಅರ್ಹತೆಯನ್ನು ಹೊಂದಿದ್ದಾರೆ. ''ಇದೊಂದು ಸರಕಾರ ನೀಡುತ್ತಿರುವ ಉತ್ತಮವಾದ ವಿಆರ್‌ಎಸ್‌ ಆಗಿದೆ. ಸಕಾರಾತ್ಮಕವಾಗಿ ಇದನ್ನು ನೋಡಬೇಕು,'' ಎಂದು ಪುರವರ್‌ ಅಭಿಪ್ರಾಯಪಟ್ಟಿದ್ದಾರೆ.

ನಷ್ಟದ ಹೊರೆಯಲ್ಲಿರುವ ಬಿಎಸ್‌ಎನ್‌ಎಲ್‌ ಮತ್ತು ಎಂಟಿಎನ್‌ಎಲ್‌ಗಳನ್ನು ಸರಕಾರವು ವಿಲೀನ ಮಾಡುತ್ತಿದ್ದು, ವೆಚ್ಚ ಕಡಿತದ ಹಿನ್ನೆಲೆಯಲ್ಲಿ ವಿಆರ್‌ಎಸ್‌ ಜಾರಿಗೊಳಿಸಿದೆ. ಪುನಶ್ಚೇತನ ಪ್ಯಾಕೇಜ್‌ ಆಗಿ ಬಿಎಸ್‌ಎನ್‌ಎಲ್‌ ಮತ್ತು ಎಂಟಿಎನ್‌ಎಲ್‌ಗೆ 69,000 ಕೋಟಿ ರೂ. ನೀಡಲು ಸರಕಾರವು ಸಮ್ಮತಿಸಿದೆ.