ಕುಬೇರ ಪುತ್ರರು: ಗುಜರಾತ್‌ನಲ್ಲಿದ್ದಾರೆ 58 ಜನ ಸಹಸ್ರಕೋಟ್ಯಾಧಿಪತಿಗಳು

ಅಹಮದಾಬಾದ್: ಉದ್ಯಮಶೀಲ ಚೈತನ್ಯ ಹಾಗೂ ಸುಸ್ಥಿರ ಕೈಗಾರಿಕಾ ಅಭಿವೃದ್ಧಿಗೆ ಹೆಸರುವಾಸಿಯಾಗಿರುವ ಗುಜರಾತ್‌ ರಾಜ್ಯವೊಂದರಲ್ಲೇ 58 ಜನ ಕುಬೇರರ ಪುತ್ರರಿದ್ದು, ಇವರು ಸಾವಿರ ಕೋಟಿಗೂ ಅಧಿಕ ನಿವ್ವಳ ಆಸ್ತಿ ಹೊಂದಿದ್ದಾರೆಂದು ಬಾರ್ಕ್ಲೇಸ್ ಹ್ಯುರುನ್ ಇಂಡಿಯಾ ರಿಚ್ 2018ರ ವರದಿ ತಿಳಿಸುತ್ತಿದೆ.

ಈ ಆಗರ್ಭ ಶ್ರೀಮಂತರಿಂದ ಅತಿಹೆಚ್ಚು ಶತಕೋಟ್ಯಾಧಿಪತಿಗಳಿರುವ ರಾಜ್ಯಗಳ ಪಟ್ಟಿಯಲ್ಲಿ ಗುಜರಾತ್ ನಾಲ್ಕನೇ ಸ್ಥಾನ ಪಡೆದಿದೆ. ಮಹಾರಾಷ್ಟ್ರದಲ್ಲಿ 272, ರಾಷ್ಟ್ರ ರಾಜಧಾನಿ ದಿಲ್ಲಿಯಲ್ಲಿ 163, ಕರ್ನಾಟಕದಲ್ಲಿ 72 ಜನ ಸಹಸ್ರಕೋಟ್ಯಾಧಿಪತಿಗಳಿದ್ದು, ಭಾರತದಲ್ಲಿ ಒಟ್ಟು 831 ಜನರು ತಲಾ ಸಾವಿರ ಕೋಟಿಗೂ ಅಧಿಕ ಆಸ್ತಿ ಹೊಂದಿದವರಾಗಿದ್ದಾರೆ.

ಪ್ರಸಕ್ತ ಸಾಲಿನಲ್ಲಿ ಗುಜರಾತ್‌ನ 22 ಜನ ಅತಿ ಹೆಚ್ಚು ಶ್ರೀಮಂತರ ಪಟ್ಟಿಯಲ್ಲಿ ಸ್ಥಾನ ಪಡೆದಿದ್ದಾರೆ. ಕಳೆದ ವರ್ಷ ರಾಜ್ಯದ 36 ಆಗರ್ಭ ಶ್ರೀಮಂತರು ಒಟ್ಟು 2.40 ಲಕ್ಷ ಕೋಟಿ ರೂಪಾಯಿ ಸಂಪತ್ತು ಹೊಂದಿದ್ದರು ಎಂದು ಖಾಸಗಿ ಬ್ಯಾಂಕ್‌ನ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿಯಾಗಿರುವ ಸತ್ಯ ನಾರಾಯಣ ಬನ್ಸಾಲ್ ತಿಳಿಸಿದ್ದಾರೆ.

ಗುಜರಾತ್‌ನ ಅದಾನಿ ಗ್ರೂಪ್ ಮಾಲೀಕ ಗೌತಮ ಅದಾನಿ ಅವರು ಒಟ್ಟು 71,200 ಕೋಟಿ ರೂಪಾಯಿ ನಿವ್ವಳ ಆಸ್ತಿ ಹೊಂದಿದ್ದರೆ, ಜಿಯಾಡಸ್ ಸಮೂಹದ ಪಂಕಜ್ ಪಟೇಲ್ 32,100 ಕೋಟಿ, ಎಐಎ ಎಂಜನಿಯರಿಂಗ್ ಭದ್ರೇಶ್ ಶಾ 9,700 ಕೋಟಿ, ಕರ್ನಾನ್‌ಭಾಯ್ ಪಟೇಲ್ 9,600 ಕೋಟಿ ಹಾಗೂ ಟೊರೆಂಟ್ ಗ್ರೂಪ್‌ನ ಪ್ರವರ್ತಕರಾದ ಸಮೀರ್ ಮತ್ತು ಸುಧೀರ್ ಮೆಹ್ತಾ ತಲಾ 8,300 ಕೋಟಿ ರೂಪಾಯಿ ನಿವ್ವಳ ಆಸ್ತಿ ಹೊಂದಿದ್ದಾರೆ.

ಅಹಮದಾಬಾದ್ ನಗರವೊಂದರಲ್ಲೇ 49 ಶತಕೋಟ್ಯಾಧಿಪತಿಗಳಿದ್ದರೆ, ರಾಜಕೋಟ್‌ನಲ್ಲಿ ಐವರು, ಸೂರತ್‌ನಲ್ಲಿ ಮೂವರು ಹಾಗೂ ವಡೋದರಾದಲ್ಲಿ ಒಬ್ಬರು ಆಗರ್ಭ ಶ್ರೀಮಂತರ ಪಟ್ಟಿಯಲ್ಲಿದ್ದಾರೆ.

ನಿರ್ಮಾ ಗ್ರೂಪ್, ಟೊರೆಂಟ್ ಗ್ರೂಪ್ ಹಾಗೂ ಇಂಟಸ್ ಫಾರ್ಮಾ ಉದ್ಯಮ ಕುಟುಂಬದ 10 ಮಹಿಳೆಯರು ಸಹ ಸಹಸ್ರಕೋಟ್ಯಾಧಿಪತಿಗಳ ಪಟ್ಟಿಯಲ್ಲಿ ಸ್ಥಾನ ಪಡೆದಿರುವುದು ವಿಶೇಷವಾಗಿದೆ ಎಂದು ಬನ್ಸಾಲ್ ತಿಳಿಸಿದ್ದಾರೆ.