ಆರೋಗ್ಯ ವಿಮೆಯಲ್ಲಿ ಯಾವುದು ಸೇರಲ್ಲ?

ಬೆಂಗಳೂರು: ಆರೋಗ್ಯ ವಿಮೆಯ ಪಾಲಿಸಿಯನ್ನು ಅರಿತುಕೊಳ್ಳುವುದು ತುಸು ಸಂಕೀರ್ಣ. ಆರೋಗ್ಯ ವಿಮೆ ಬಗ್ಗೆ ಜಾಗೃತಿ ಮೂಡುತ್ತಿದ್ದರೂ, ಕ್ಲೇಮ್‌ ತಿರಸ್ಕೃತವಾಗುತ್ತಿರುವ ಪ್ರಕರಣಗಳು ಹಾಗೂ ಕಡಿಮೆ ಮೊತ್ತ ಪಾವತಿಯಾಗುತ್ತಿರುವುದನ್ನು ಗಮನಿಸಿದರೆ ಶಾಕ್‌ ಆಗುತ್ತದೆ. ಆದ್ದರಿಂದ ಕೆಲ ಉಪಯುಕ್ತ ಟಿಫ್ಸ್‌ಗಳು ಇಲ್ಲಿವೆ. ಆರೋಗ್ಯ ವಿಮೆ ಪಾಲಿಸಿಯಲ್ಲಿ ಯಾವುದು ಕವರ್‌ ಆಗುವುದಿಲ್ಲ ಎಂಬುದನ್ನು ಗಮನಿಸಿ.

1. ನೂತನ ಅಥವಾ ಅತ್ಯಾಧುನಿಕ ಚಿಕಿತ್ಸಾ ಕ್ರಮ

ದಿನೇದಿನೆ ಹೊಸ ಚಿಕಿತ್ಸಾ ಕ್ರಮ ಅಥವಾ ತಂತ್ರಜ್ಞಾನಗಳು ಪ್ರಯೋಗವಾಗುತ್ತಿರುತ್ತವೆ. ಆದರೆ ಸೂಕ್ತ ನಿಯಂತ್ರಕಗಳಿಂದ ಅನುಮೋದನೆ ಪಡೆಯದಿರುವ ಅಥವಾ ಪ್ರಾಯೋಗಿಕ ಹಂತದಲ್ಲಿರುವ ಚಿಕಿತ್ಸಾ ಕ್ರಮಗಳಿಗೆ ವಿಮೆ ಪಾಲಿಸಿಗಳಲ್ಲಿ ಪರಿಹಾರ ಸಾಮಾನ್ಯವಾಗಿ ಸಿಗುವುದಿಲ್ಲ. ಉದಾಹರಣೆಗೆ ರೊಬೋಟಿಕ್‌ ಸರ್ಜರಿ, ಸೈಬರ್‌ ನೈಫ್‌ ಇತ್ಯಾದಿಗಳ ಮೂಲಕ ಮಾಡುವ ಸರ್ಜರಿಗಳಿಗೆ ಪಾಲಿಸಿಯಲ್ಲಿ ಅವಕಾಶ ಇಲ್ಲದಿರಲೂ ಸಾಕು.

2. ರೆಸಿಡೆಂಟ್‌ ಡಾಕ್ಟರ್‌ಗಳ ಶುಲ್ಕ

ನಿಮ್ಮ ಆಸ್ಪತ್ರೆ ಕೊಠಡಿಯ ಬಾಡಿಗೆ ಹಾಗೂ ರೆಸಿಡೆಂಟ್‌ ವೈದ್ಯರ ಶುಲ್ಕಗಳನ್ನು ಪ್ರತ್ಯೇಕಿಸಿದ್ದರೆ, ಅದಕ್ಕೆ ವಿಮೆ ಕಂಪನಿಗಳು ಪರಿಹಾರ ನೀಡದಿರುವ ಸಾಧ್ಯತೆಯೂ ಇರುತ್ತದೆ. ತಾಂತ್ರಿಕವಾಗಿ ರೆಸಿಡೆಂಟ್‌ ಡಾಕ್ಟರರ ಶುಲ್ಕಗಳು ಕೊಠಡಿಯ ಬಾಡಿಗೆಯಲ್ಲಿ ಅಡಕವಾಗಿರುತ್ತವೆ. ಹೀಗಾಗಿ ಪ್ರತ್ಯೇಕವಾಗಿ ರೆಸಿಡೆಂಟ್‌ ವೈದ್ಯರ ಶುಲ್ಕಗಳಿಗೆ ವಿಮೆ ಸಿಗುವ ಅವಕಾಶ ಕಡಿಮೆ.

3. ಸ್ಪೆಷಲಿಸ್ಟ್‌ ವೈದ್ಯರ ದಿನದ ಹಲವು ಭೇಟಿ

ಕೆಲವು ಆರೋಗ್ಯ ವಿಮೆಗಳಲ್ಲಿ ಸ್ಪೆಷಲಿಸ್ಟ್‌ ವೈದ್ಯರು ರೋಗಿಯ ಚಿಕಿತ್ಸೆಯ ಸಲುವಾಗಿ ಮಾಡುವ ಹಲವು ಭೇಟಿಗಳಿಗೆ ಪರಿಹಾರ ನೀಡಲಾರವು. ದಿನಕ್ಕೆ 1 ಭೇಟಿಗೆ ಮಾತ್ರ ಕ್ಲೇಮ್‌ ಎಂಬ ಷರತ್ತುಗಳು ಇರಬಹುದು. ಅದನ್ನು ಗಮನಿಸಬೇಕು.

4. ನಿರ್ದಿಷ್ಟ ಔಷಧಗಳ ಬಳಕೆ

ಕ್ಯಾನ್ಸರ್‌ ಕುರಿತ ಚಿಕಿತ್ಸೆಗಳಲ್ಲಿ ಕೆಲವು ಔಷಧಗಳಿಗೆ ಆರೋಗ್ಯ ವಿಮೆ ಸೌಲಭ್ಯ ಸಿಗದೆಯೂ ಇರಬಹುದು. ಕೆಲವು ಕೆಮೊಥೆರಪಿಗಳ ಚಿಕಿತ್ಸೆಯಲ್ಲೂ ನಿರ್ದಿಷ್ಟ ಔಷಧಗಳಿಗೆ ವಿಮೆ ಕ್ಲೇಮ್‌ ಸಾಧ್ಯವಾಗದೆ ಇರಬಹುದು.

5. ಮದ್ಯಪಾನ ವ್ಯಸನ

ಗಂಭೀರ ಕಾಯಿಲೆಯಿಂದ ಬಳಲುತ್ತಿದ್ದರೂ, ಮದ್ಯಪಾನ ಅಥವಾ ಧೂಮಪಾನ ಇತ್ಯಾದಿ ದುಶ್ಚಟಗಳಿಂದ ಕಾಯಿಲೆ ಉಂಟಾಗಿದ್ದರೆ ಆರೋಗ್ಯ ವಿಮೆ ಪರಿಹಾರ ಸಿಗುವ ಸಾಧ್ಯತೆ ಕಡಿಮೆ. ಮನೆಯಲ್ಲಿಯೇ ಚಿಕಿತ್ಸೆ ಪಡೆಯುತ್ತಿದ್ದರೂ ವಿಮೆ ಪರಿಹಾರ ಸಿಗದಿರಬಹುದು.