ಬೆಂಗಳೂರಿನಲ್ಲಿ ಆಹಾರ ಮಾರಾಟಕ್ಕೆ ವಾಟ್ಸ್‌ ಆ್ಯಪ್‌ ಗ್ರೂಪ್‌ಗಳ ಬಳಕೆ!

ಬೆಂಗಳೂರು : ಕೊನೆಗೂ ಮಳೆಗಾಲದ ವಾತಾವರಣ ಕ್ರಮೇಣ ಮೂಡುತ್ತಿದೆ. ಅಲ್ಲಲ್ಲಿ ಮಳೆಯೂ ಆಗಮನವಾಗಿದೆ. ಬೆಂಗಳೂರಿನಲ್ಲಿ ಇಂಥ ಸನ್ನಿವೇಶದಲ್ಲಿ ಬಜ್ಜಿ ಇತ್ಯಾದಿ ಕುರುಕಲು ತಿಂಡಿ ತಿನಿಸುಗಳಿಗೆ ಬೇಡಿಕೆ ಹೆಚ್ಚು. ಆದರೆ ಮನೆಯಲ್ಲಿಯೇ ತಯಾರಿಸಲು ಎಲ್ಲರಿಗೂ ಸಮಯದ ಅಭಾವ. ಒಬ್ಬಂಟಿಯಾಗಿ ಫ್ಲ್ಯಾಟ್‌ಗಳಲ್ಲೋ, ವಾಸಿಸುತ್ತಿರುವವರಿಗೆ ಅಡುಗೆ ತಯಾರಿಸಲೂ ಬೋರ್‌ ಎನ್ನಿಸಬಹುದು. ಆದರೆ ಇದೀಗ ಈ ಕೊರತೆ ನೀಗಿಸಲು ವಾಟ್ಸ್‌ಆ್ಯಪ್‌ನಂಥ ಜಾಲತಾಣಗಳೂ ಸಹಕರಿಸುತ್ತಿವೆ!

ಹೌದು. ಬೆಂಗಳೂರಿನಲ್ಲಿ ನಾನಾ ವಿಧದ ಆಹಾರ ಮಾರಾಟಕ್ಕೆ ಸ್ವಿಗ್ಗಿ, ಜೊಮಾಟೊ ಮಾತ್ರವಲ್ಲದೆ ವಾಟ್ಸ್‌ ಆ್ಯಪ್‌ ಗ್ರೂಪ್‌ ಹಾಗೂ ಮೊಬೈಲ್‌ ಆ್ಯಪ್‌ಗಳೂ ವ್ಯಾಪಕವಾಗಿ ಬಳಕೆಯಾಗುತ್ತಿರುವುದು ಹೊಸತು.

ಅಪಾರ್ಟ್‌ಮೆಂಟ್‌ಗಳಲ್ಲಂತೂ ವಾಟ್ಸ್‌ ಆ್ಯಪ್‌ ಗ್ರೂಪ್‌ಗಳನ್ನು ಮಾಡಿಕೊಂಡು ಬಳಕೆದಾರರನ್ನು ಸಂಪರ್ಕಿಸಿ ಮನೆಯ ಅಡುಗೆ, ವಿಶೇಷ ಖಾದ್ಯ ಇತ್ಯಾದಿಗಳ ಮಾರಾಟ ಅತ್ಯಂತ ಜನಪ್ರಿಯವಾಗುತ್ತಿದೆ.

ಆನ್‌ಲೈನ್‌ ಫುಡ್‌ ವಲಯದ ಸ್ವಿಗ್ಗಿ ಮತ್ತು ಜೊಮಾಟೊದ ಭರಾಟೆಯ ನಡುವೆಯೇ ಬೆಂಗಳೂರಿನಲ್ಲಿ ಸಾಮಾಜಿಕ ಜಾಲತಾಣ ವಾಟ್ಸ್‌ ಆ್ಯಪ್‌ ಹಾಗೂ ನಾನಾ ಮೊಬೈಲ್‌ ಆ್ಯಪ್‌ಗಳ ಮೂಲಕ ಗ್ರಾಹಕರನ್ನು ಸಂಪರ್ಕಿಸಿ ಬಗೆಬಗೆಯ ಮನೆ ಅಡುಗೆ, ಸಿಹಿ ತಿಂಡಿ, ಭಕ್ಷ್ಯ ಭೋಜ್ಯಗಳ ಮಾರಾಟ ಜನಪ್ರಿಯತೆ ಗಳಿಸಿಕೊಳ್ಳುತ್ತಿದೆ. ಇದರಿಂದ ಗೃಹಿಣಿಯರಿಗೆ ಮನೆಯಲ್ಲಿಯೇ ಅಡುಗೆ ಮಾಡುವುದಲ್ಲದೆ ಆದಾಯದ ಮೂಲವಾಗಿಯೂ ಬಳಸಿಕೊಳ್ಳಲು ಸಾಧ್ಯವಾಗುತ್ತಿದೆ. ಜತೆಗೆ ಬಳಕೆದಾರರಿಗೂ ಮನೆ ಅಡುಗೆ, ವಿಶೇಷ ಖಾದ್ಯಗಳನ್ನು ಕೊಳ್ಳಲು ಅನುಕೂಲಕರವೆನಿಸುತ್ತಿದೆ. ಕಚೇರಿ ಕೆಲಸಗಳ ಒತ್ತಡದಲ್ಲಿ ಕಾಲಾವಕಾಶದ ಕೊರತೆ ಇರುವವರಿಗಂತೂ ಮನೆ ಅಡುಗೆ ರುಚಿಯನ್ನು ಆಸ್ವಾದಿಸಲು ಇದು ಸುಲಭ ಸಾಧನವಾಗಿದೆ.

ನೆರೆಹೊರೆಯ ಮನೆಯಿಂದ ತಿಂಡಿ ವ್ಯಾಪಾರ!

ಬೆಂಗಳೂರಿನ ಮಹದೇವಪುರ ಬಡಾವಣೆಯ ಅಪಾರ್ಟ್‌ಮೆಂಟ್‌ ಒಂದರಲ್ಲಿ 15 ಅಂತಸ್ತಿನ ಮೇಲಿರುವ ಫ್ಲ್ಯಾಟ್‌ ಒಂದರ ನಿವಾಸಿ ಜಯಶ್ರೀ ಗೋಪಾಲನ್‌. ತಮಗೆ ಬೇಕೆನಿಸಿದಾಗ ವಾಟ್ಸ್‌ ಆ್ಯಪ್‌ ಗ್ರೂಪ್‌ ತೆರೆದು ಮೆಸೇಜ್‌ಗಳನ್ನು ವೀಕ್ಷಿಸುತ್ತಾರೆ. ಆ ಗ್ರೂಪ್‌ನಲ್ಲಿ ಅಪಾರ್ಟ್‌ಮೆಂಟ್‌ನ ನೆರೆಹೊರೆಯವರು ತಾವು ಮಾಡಿದ ತಿಂಡಿ ತಿನಿಸುಗಳ ಬಗ್ಗೆ ವಿವರಿಸುತ್ತಾರೆ. ''ನನಗೆ ಬೇಕಾದ ತಿಂಡಿಯನ್ನು ವಾಟ್ಸ್‌ ಆ್ಯಪ್‌ ಮೂಲಕ ತಿಳಿಸಿ ಮನೆಗೇ ತರಿಸಿಕೊಳ್ಳುತ್ತೇನೆ. ದುಡ್ಡು ಕೊಟ್ಟರಾಯಿತು'' ಎನ್ನುತ್ತಾರೆ ಜಯಶ್ರೀ ಗೋಪಾಲನ್‌.

ಬೆಂಗಳೂರಿನ ವೈಟ್‌ಫೀಲ್ಡ್‌, ಮಹದೇವಪುರ, ಸರ್ಜಪುರ, ಬನ್ನೇರುಘಟ್ಟ, ಹೆಣ್ಣೂರು ಮುಂತಾದ ಕಡೆಗಳಲ್ಲಿ ಕಳೆದ ಕೆಲ ವರ್ಷಗಳಿಂದ ಇಂಥ ಪದ್ಧತಿ ಜನಪ್ರಿಯವಾಗಿದೆ.

ಅಪಾರ್ಟ್‌ಮೆಂಟ್‌ ನಿವಾಸಿಗಳಿಗೆ ಪರಸ್ಪರ ಸಂಪರ್ಕಕ್ಕೆ ವಾಟ್ಸ್‌ ಆ್ಯಪ್‌ ಸುಲಭ ಸಾಧನವಾಗಿದೆ. ತಿಂಡಿ ತಿನಿಸು, ಬ್ರೇಕ್‌ಫಾಸ್ಟ್‌, ಭೋಜನ ಇತ್ಯಾದಿಗಳನ್ನು ಸಿದ್ಧಪಡಿಸುತ್ತಾರೆ. ಖರೀದಿದಾರರಿಗೂ ಮನೆಯ ಊಟ ಸೇವಿಸಲು ಅನುಕೂಲ. ಇದು ಒಂದು ರೀತಿಯಲ್ಲಿ ಸ್ವಿಗ್ಗಿ, ಜೊಮಾಟೊದಂಥ ದಿಗ್ಗಜ ಕಂಪ ನಿಗಳ ಹೈಪರ್‌ ಲೋಕಲ್‌ ಮಾದರಿಯ ಸ್ವರೂಪದಲ್ಲಿ ಇರುತ್ತವೆ. ಬೆಂಗಳೂರಿನಲ್ಲಿ ಅಡುಗೆ ಉದ್ಯಮ ಅಗಾಧವಾಗಿ ವಿಸ್ತರಿಸುತ್ತಿದೆ. ಕೋರಮಂಗಲ ಒಂದರಲ್ಲೇ 500ಕ್ಕೂ ಹೆಚ್ಚು ರೆಸ್ಟೊರೆಂಟ್‌ಗಳು ಇವೆ. ಆನ್‌ಲೈನ್‌ ಮೂಲಕ ಆಹಾರ ಮಾರಾಟ ಕೂಡ ಬೆಳೆಯುತ್ತಿದೆ.

ಮೊಬೈಲ್‌ ಆ್ಯಪ್‌ಗಳ ಲಗ್ಗೆ:

ಒಂದು ಕಡೆ ವಾಟ್ಸ್‌ ಆ್ಯಪ್‌ ಗ್ರೂಪ್‌ಗಳ ಮೂಲಕ ಆಹಾರ ಮಾರಾಟ ನಡೆಯುತ್ತಿದ್ದರೆ, ಮತ್ತೊಂದು ಕಡೆ ಮೊಬೈಲ್‌ ಆ್ಯಪ್‌ಗಳೂ ಜನಪ್ರಿಯವಾಗುತ್ತಿವೆ. ಅಪಾರ್ಟ್‌ಮೆಂಟ್‌ಗಳಲ್ಲಿ ವಾಸಿಸುವವರು ಸಾಮಾನ್ಯವಾಗಿ ವಾಟ್ಸ್‌ ಆ್ಯಪ್‌ ಗ್ರೂಪ್‌ಗಳ ಮೂಲಕ ಪರಸ್ಪರ ಸಂಪರ್ಕಿಸುತ್ತಾರೆ. ಇದು ಹೊರಗಿನವರಿಗೆ ದೊರೆಯುವುದಿಲ್ಲ. ಆದರೆ ಮೊಬೈಲ್‌ ಆ್ಯಪ್‌ಗಳು ಮತ್ತಷ್ಟು ವಿಸ್ತಾರ ಮಾರುಕಟ್ಟೆಯನ್ನು ಕಲ್ಪಿಸುತ್ತವೆ. ಇದರಿಂದ ನೆರೆ ಹೊರೆಯ ಅಪಾರ್ಟ್‌ಮೆಂಟ್‌ಗಳಲ್ಲಿ ಇರುವವರಿಗೂ ಆಹಾರ ಮಾರಾಟ ಸಾಧ್ಯವಾಗುತ್ತದೆ. ಫುಡ್ಡಿಬುಡ್ಡಿ, ಊಟ ಬಾಕ್ಸ್‌ ಮತ್ತು ಮಸಾಲಾ ಬಾಕ್ಸ್‌ ಮುಂತಾದ ಆ್ಯಪ್‌ ಆಧಾರಿತ ಸ್ಟಾರ್ಟಪ್‌ಗಳು ಇದಕ್ಕೆ ಉದಾಹರಣೆ.

''ನೀವು ಮನೆಯಲ್ಲಿಯೇ ಭಕ್ಷ್ಯ ಭೋಜ್ಯಗಳನ್ನು, ತಿಂಡಿ ತಿನಿಸುಗಳನ್ನು ಮಾಡುವುದರಲ್ಲಿ ಪರಿಣತಿ ಹೊಂದಿದ್ದೀರಾ? ಹಾಗಿದ್ದರೆ ಫುಡ್ಡಿ ಬುಡ್ಡಿಯನ್ನು ಸೇರಿಕೊಂಡು ಮಾರಾಟಗಾರರೂ ಆಗಬಹುದು!'' ಎನ್ನುತ್ತದೆ ಬೆಂಗಳೂರು ಮೂಲದ ಫುಡ್ಡಿ ಬುಡ್ಡಿ ಎಂಬ ಸ್ಟಾರ್ಟಪ್‌. 2016ರಲ್ಲಿ ಮೊಬೈಲ್‌ ಆ್ಯಪ್‌ ತಂತ್ರಜ್ಞಾನದ ಮೂಲಕ ಸಣ್ಣ ಮಟ್ಟಿನಲ್ಲಿ ಆರಂಭವಾದ ಈ ಸ್ಟಾರ್ಟಪ್‌ ಈಗ ಸಾವಿರಕ್ಕೂ ಹೆಚ್ಚು ಮಂದಿ ಮನೆಯಲ್ಲಿಯೇ ಅಡುಗೆ ತಯಾರಿಸುವವರ ನೆಟ್‌ವರ್ಕ್‌ ಹೊಂದಿದೆ. 20,000ಕ್ಕೂ ಹೆಚ್ಚು ಮನೆಗಳಿಗೆ ಸೇವೆ ಒದಗಿಸಿದೆ.