ಭಾರತೀಯ ವಿಮಾನಯಾನ ಸಂಸ್ಥೆಗೆ ಟ್ರಂಪ್ ಥ್ಯಾಂಕ್ಸ್ ಸಲ್ಲಿಸಿದ್ದೇಕೆ?

ಹೊಸದಿಲ್ಲಿ: ಅಮೆರಿಕ ಪ್ರವಾಸದಲ್ಲಿರುವ ಭಾರತ ಪ್ರಧಾನ ಮಂತ್ರಿ ನರೇಂದ್ರ ಮೋದಿ, ಯುಎಸ್ ಅಧ್ಯಕ್ಷ ಡೋನಾಲ್ಡ್ ಟ್ರಂಪ್ ಜೊತೆಗೆ ಮಹತ್ವದ ಭೇಟಿ ಮಾಡಿ ಮಾತುಕತೆ ನಡೆಸಿದ್ದಾರೆ. ಈ ನಡುವೆ ಅಮೆರಿಕ ಅಧ್ಯಕ್ಷರು ಭಾರತೀಯ ವಿಮಾನಯಾನ ಸಂಸ್ಥೆಯೊಂದಕ್ಕೆ ಧನ್ಯವಾದವನ್ನು ಸಮರ್ಪಿಸಿರುವುದು ಹೆಚ್ಚಿನ ಗಮನ ಸೆಳೆದಿದೆ.

ಗುರ್ಗಾಂವ್ ತಳಹದಿಯ ಭಾರತದ ನಾಲ್ಕನೇ ಅತಿ ದೊಡ್ಡ ವಿಮಾನಯಾನ ಸಂಸ್ಥೆ ಸ್ಪೈಸ್‌ಜೆಟ್‌ಗೆ ಅಮೆರಿಕ ಅಧ್ಯಕ್ಷ ಡೋನಾಲ್ಡ್ ಟ್ರಂಪ್ ಥ್ಯಾಂಕ್ಸ್ ಹೇಳಿದ್ದಾರೆ.

ಥ್ಯಾಂಕ್ಸ್ ಏಕೆ?
ಅಮೆರಿಕದ ಖ್ಯಾತ ವೈಮಾನಿಕ ತಾಂತ್ರಿಕ, ಉಪಕರಣಗಳ ತಯಾರಿ ಕಂಪನಿ ಬೋಯಿಂಗ್‌ನಿಂದ ದೊಡ್ಡ ಸಂಖ್ಯೆಯಲ್ಲಿ ವಿಮಾನಗಳನ್ನು ಖರೀದಿಸಿರುವ ಹಿನ್ನಲೆಯಲ್ಲಿ ಸ್ಪೈಸ್‌ಜೆಟ್‌ಗೆ ಟ್ರಂಪ್ ಚಪ್ಪಾಳೆ ತಟ್ಟಿದ್ದಾರೆ. ಇದರಿಂದ ಅಮೆರಿಕದಲ್ಲಿ ಭಾರಿ ಗಾತ್ರದಲ್ಲಿ ಉದ್ಯೋಗ ಸೃಷ್ಟಿಯಾಗಲಿದೆ.

ಸೋಮವಾರದಂದು ವಾಷಿಂಗ್ಟನ್‌ನ ವೈಟ್ ಹೌಸ್‌ನಲ್ಲಿ ಅಮೆರಿಕ ಅಧ್ಯಕ್ಷ ಡೋನಾಲ್ಡ್ ಟ್ರಂಪ್ ಹಾಗೂ ಪ್ರಥಮ ಮಹಿಳೆ ಮೆಲನಿಯ ಟ್ರಂಪ್ ಅವರನ್ನು ಮೋದಿ ಭೇಟಿಯಾಗಿದ್ದರು.

ಸ್ಪೈಸ್‌ಜೆಟ್ ನೀಡಿರುವ ಬರೋಬ್ಬರಿ 2200 ಕೋಟಿ ರೂ.ಗಳ (22 ಬಿಲಿಯನ್ ಅಮೆರಿಕನ್ ಡಾಲರ್) ಆದೇಶದಂತೆ 205 ವಿಮಾನಗಳನ್ನು ಅಮೆರಿಕದಲ್ಲಿ ನಿರ್ಮಿಸಲಾಗುವುದು. ತನ್ಮೂಲಕ ಅಮೆರಿಕದಲ್ಲಿ 1,32,000 ಉನ್ನತ-ನುರಿತ, ಉನ್ನತ ವೇತನದ ಉದ್ಯೋಗವನ್ನು ಸೃಷ್ಟಿ ಮಾಡಲಿದೆ ಎಂದು ಅಮೆರಿಕದ ವಾಣಿಜ್ಯ ಇಲಾಖೆ ತಿಳಿಸಿದೆ.

ಕುತೂಹಲವೆಂಬಂತೆ ಟ್ರಂಪ್ ಕಾಮರ್ಸ್ ಕಾರ್ಯದರ್ಶಿ ವಿಲ್ಬರ್ ರೋಸ್‌ನ ಖಾಸಗಿ ಕಂಪನಿ ವಿಲ್ಬರ್ ರೋಸ್ ಆ್ಯಂಡ್ ಕಂಪನಿ 20008ರಲ್ಲಿ ಸ್ಪೈಸ್‌ಜೆಟ್‌ನಲ್ಲಿ 86 ಮಿಲಿಯನ್ ಅಮೆರಿಕನ್ ಡಾಲರ್ ಹೂಡಿಕೆ ಮಾಡಿತ್ತು. ಹಾಗಿದ್ದರೂ 2010ರಲ್ಲಿ ಶೇಕಡಾ 30ರಷ್ಟು ಶೇರನ್ನು (ಅಂದಾಜು 127 ಮಿಲಿಯನ್ ಅಮೆರಿಕನ್ ಡಾಲರ್) ಸ್ಪೈಸ್‌ಜೆಟ್‌ಗೆ ಮಾರಾಟ ಮಾಡಿತ್ತು.

ವಿಶ್ವದಲ್ಲೇ ಅತಿ ವೇಗದಲ್ಲಿ ಬೆಳೆದು ಬರುತ್ತಿರುವ ವಿಮಾನಯಾನ ಮಾರುಕಟ್ಟೆಯಾಗಿರುವ ಭಾರತ ಕಳೆದ ವರ್ಷ ಚೀನಾವನ್ನು ಮೀರುವ ರೀತಿಯಲ್ಲಿ ಬೆಳೆದು ನಿಂತಿತ್ತು.

ಜಾಗತಿಕ ವಿಮಾನಯಾನ ಉದ್ಯಮದ ವ್ಯಾಪಾರ ಸಂಸ್ಥೆ ಏರ್ ಟ್ರಾನ್ಸ್‌ಪೋರ್ಟ್ ಅಸೋಸಿಯೇಷನ್ (ಐಎಟಿಎ) ಬಿಡುಗಡೆ ಮಾಡಿರುವ ಅಂಕಿಅಂಶಗಳ ಪ್ರಕಾರ ದೇಶೀಯ ವಿಮಾನಯಾನ ಮಾರುಕಟ್ಟೆಯಲ್ಲಿ ಕಳೆದೊಂದು ವರ್ಷದಲ್ಲಿ ಚೀನಾ ಶೇಕಡಾ 15.1ರಷ್ಟು ಪ್ರಯಾಣಿಕ ಟ್ರಾಫಿಕ್ ಏರುಗತಿ ಸಾಧಿಸಿದ್ದರೆ ಭಾರತದಲ್ಲಿ ಶೇಕಡಾ 14.6ರಷ್ಟು ವರ್ಧನೆಯುಂಟಾಗಿತ್ತು. ಈಗ ಬೋಯಿಂಗ್‌ ಭಾರತದಲ್ಲಿ ತನ್ನ ವ್ಯಾಪಾರವನ್ನು ಮತ್ತಷ್ಟು ಕುದುರಿಸಿಕೊಳ್ಳುವ ಇರಾದೆಯಲ್ಲಿದೆ.