ಪೆಟ್ರೋಲ್‌ಗೆ ನೀವೇಕೆ ಇಮ್ಮಡಿ ದರ ಪಾವತಿಸಬೇಕು ಗೊತ್ತೇ ?

ಜಾಗತಿಕ ಕಚ್ಚಾ ತೈಲದ ದರ ಹೆಚ್ಚಳವಾಗಿರುವುದರಿಂದ ದಿಲ್ಲಿ, ಕರ್ನಾಟಕ ಸೇರಿದಂತೆ ಬಹುತೇಕ ರಾಜ್ಯಗಳಲ್ಲಿ ಪೆಟ್ರೋಲ್‌ ದರ ಲೀಟರ್‌ಗೆ 80 ರೂ.ಗಳ ಗಡಿ ದಾಟಿದೆ. ರೂಪಾಯಿಯ ಲೆಕ್ಕದಲ್ಲಿ ನೆರೆಯ ದೇಶಗಳಲ್ಲಿನ ತೈಲ ದರವನ್ನು ಹೋಲಿಸಿದರೆ ಭಾರತದಲ್ಲಿಯೇ ಹೆಚ್ಚು. ಯಾಕೆ ಹೀಗೆ? ನೀವು ಪೆಟ್ರೋಲ್‌, ಡೀಸೆಲ್‌ಗೆ ಕೊಡುವ ದರದಲ್ಲಿ ಸುಮಾರು ಅರ್ಧದಷ್ಟು ತೆರಿಗೆಯೇ ಆಗಿರುವುದು ಇದಕ್ಕೆ ಕಾರಣ!

ಸಾರ್ವಜನಿಕ ವಲಯದ ಇಂಡಿಯನ್‌ ಆಯಿಲ್‌ ಕಾರ್ಪೊರೇಷನ್‌, ತನ್ನ ಡೀಲರ್‌ಗಳಿಗೆ ವ್ಯಾಟ್‌ ಮತ್ತು ತೆರಿಗೆ ಹೊರತುಪಡಿಸಿ 39.21 ರೂ.ಗೆ ಲೀಟರ್‌ ಪೆಟ್ರೋಲ್‌ ವಿತರಿಸುತ್ತದೆ. ಆದರೆ ಗ್ರಾಹಕರು 80 ರೂ. ಕೊಡುತ್ತಾರೆ. ಇದಕ್ಕೆ ಕಾರಣ ತೆರಿಗೆ ಭಾರ. ಈ ಕುರಿತ ವಿವರ ಇಂತಿದೆ.

ಅಬಕಾರಿ ಸುಂಕ

ಪ್ರತಿ ಲೀಟರ್‌ ಸಾಮಾನ್ಯ ಪೆಟ್ರೋಲ್‌ ಮೇಲೆ 19.48 ರೂ. ಅಬಕಾರಿ ಸುಂಕ ಇದೆ. ಬ್ರ್ಯಾಂಡೆಡ್‌ ಪೆಟ್ರೋಲ್‌ಗೆ 20.66 ರೂ, ಸಾಮಾನ್ಯ ಹೈ-ಸ್ಪೀಡ್‌ ಡೀಸೆಲ್‌ಗೆ 15.33 ರೂ, ಬ್ರ್ಯಾಂಡೆಡ್‌ ಹೈ ಸ್ಪೀಡ್‌ ಡೀಸೆಲ್‌ಗೆ 17.69 ರೂ. ಆಗುತ್ತದೆ.

ವ್ಯಾಟ್‌

ವ್ಯಾಟ್‌ ಪ್ರತಿಯೊಂದು ರಾಜ್ಯದಲ್ಲೂ ಭಿನ್ನ. ಮಹಾರಾಷ್ಟ್ರ ಸರಕಾರ ಅತ್ಯಧಿಕ ವ್ಯಾಟ್‌ ನಿಗದಿಪಡಿಸಿದೆ. ಹೀಗಾಗಿ ಇಡೀ ದೇಶದಲ್ಲಿಯೇ ಮುಂಬಯಿನಲ್ಲಿ ತೈಲ ದರ ಹೆಚ್ಚು. ಅಲ್ಲಿ ಪೆಟ್ರೋಲ್‌ ಮೇಲೆ ಶೇ.39.12 ಹಾಗೂ ಡೀಸೆಲ್‌ಗೆ ಶೇ.24.78ರಷ್ಟಿದೆ. ಹೀಗಿದ್ದರೂ ಮಹಾರಾಷ್ಟ್ರದ ಇತರ ಕಡೆಗಳಲ್ಲಿ ವ್ಯಾಟ್‌ ಸ್ವಲ್ಪ ಕಡಿಮೆ. ವ್ಯಾಟ್‌ ಮಾತ್ರವಲ್ಲದೆ ಸೆಸ್‌, ವ್ಯಾಪಾರ ತೆರಿಗೆ, ಸರ್‌ಚಾರ್ಜ್‌, ಹೆಚ್ಚುವರಿ ತೆರಿಗೆ ಇತ್ಯಾದಿಗಳೂ ಜತೆಯಾಗುತ್ತವೆ.

ಬಿಹಾರ ಮತ್ತು ಪಶ್ಚಿಮ ಬಂಗಾಳದಲ್ಲಿ ವ್ಯಾಟ್‌ ಹೊರತುಪಡಿಸಿ ಹೆಚ್ಚುವರಿ ಶೇ.20ರಷ್ಟು ತೆರಿಗೆ ಇದೆ. ಅರುಣಾಚಲ ಪ್ರದೇಶ, ದಿಲ್ಲಿ, ಗುಜರಾತ್‌, ಹರಿಯಾಣ, ಮಧ್ಯಪ್ರದೇಶ, ಪಂಜಾಬ್‌, ಛತ್ತೀಸ್‌ಗಢ, ಪುದುಚೇರಿ, ಮೇಘಾಲಯ, ಅಂಡಮಾನ್‌ ನಿಕೋಬಾರ್‌ ಇತ್ಯಾದಿ ಕಡೆಗಳಲ್ಲಿ ವ್ಯಾಟ್‌, ವ್ಯಾಪಾರ ತೆರಿಗೆಯ ಜತೆಗೆ ಡೀಲರ್‌ಗಳ ಕಮಿಶನ್‌ ಮೇಲೆಯೂ ಹೆಚ್ಚುವರಿ ತೆರಿಗೆ ಇದೆ.

ಡೀಲರ್‌ ಕಮೀಶನ್‌

ಕಳೆದ ವರ್ಷ ಆಗಸ್ಟ್‌ನಲ್ಲಿ ತೈಲ ಕಂಪನಿಗಳು ಡೀಲರ್‌ಗಳ ಕಮೀಶನ್‌ ಮೊತ್ತವನ್ನು ಶೇ.55ರಷ್ಟು ಏರಿಸಿದ್ದವು. ಇದು ಪೆಟ್ರೋಲ್‌ಗೆ ಪ್ರತಿ ಲೀಟರ್‌ಗೆ 3 ರೂ.ಗಳಿಂದ 3.65 ರೂ. ತನಕ ಇದೆ. ಡೀಸೆಲ್‌ಗೆ 2 ರೂ.ಗಳಿಂದ 2.62 ರೂ.ತನಕ ಇದೆ. ಅಬಕಾರಿ ಸುಂಕ, ವ್ಯಾಟ್‌, ಡೀಲರ್‌ ಕಮೀಶನ್‌ಎಲ್ಲ ಸೇರಿದಾಗ, ಅಂತಿಮ ರಿಟೇಲ್‌ ದರ ಸುಮಾರು ಇಮ್ಮಡಿಯಾಗುತ್ತದೆ.