ಟಿಸಿಎಸ್‌ ಬಳಿಕ ವಿಪ್ರೋಗೂ 3ನೇ ತ್ರೈಮಾಸಿಕದಲ್ಲಿ ಭಾರಿ ಲಾಭ, ಕೊರೊನಾ ಮೆಟ್ಟಿ ನಿಂತ ಐಟಿ ಕಂಪನಿಗಳು

ಹೊಸದಿಲ್ಲಿ: ಸಾಫ್ಟ್‌ವೇರ್‌ ದೈತ್ಯ ವಿಪ್ರೋ ಮೂರನೇ ತ್ರೈಮಾಸಿಕದಲ್ಲಿ 2,968 ಕೋಟಿ ರೂ. ನಿವ್ವಳ ಲಾಭ ಗಳಿಸಿರುವುದಾಗಿ ಹೇಳಿದೆ. ಸಂಸ್ಥೆಯ ಲಾಭದಲ್ಲಿ ಶೇ.21ರಷ್ಟು ಏರಿಕೆಯಾಗಿದೆ ಎಂದು ವಿಪ್ರೋ ಹೇಳಿದೆ.

ಕಳೆದ ವರ್ಷ ಇದೇ ಅವಧಿಯಲ್ಲಿ ಕಂಪನಿ 2,456 ಕೋಟಿ ರೂ. ಲಾಭ ಗಳಿಸಿತ್ತು. 2019ಕ್ಕೆ ಹೋಲಿಸಿದರೆ ಕಂಪನಿಯ ಆದಾಯ ಕೂಡ ಶೇ. 1.3ರಷ್ಟು ಏರಿಕೆಯಾಗಿದ್ದು 15,470.5 ಕೋಟಿ ರೂ.ನಿಂದ 15,670 ಕೋಟಿ ರೂ.ಗೆ ಏರಿಕೆಯಾಗಿದೆ.

ಸತತ ಎರಡನೇ ತ್ರೈಮಾಸಿಕದಲ್ಲೂ ಕಂಪನಿ ಉತ್ತಮ ಪ್ರದರ್ಶನ ನೀಡಿದೆ ಎಂದು ಕಂಪನಿಯ ಸಿಇಒ ಮತ್ತು ವ್ಯವಸ್ಥಾಪಕ ನಿರ್ದೇಶನ ಥಿಯರಿ ಡೆಲಾಪೋರ್ಟ್‌ ಹೇಳಿದ್ದಾರೆ.

ಕೊರೊನಾ ಬಿಕ್ಕಟ್ಟಿನ ನಡುವೆಯೂ ಟಿಸಿಎಸ್‌ಗೆ 8,701 ಕೋಟಿ ರೂ. ಲಾಭ
ಕೆಲ ದಿನಗಳ ಹಿಂದೆ ಟಾಟಾ ಕನ್ಸಲ್ಟೆನ್ಸಿ ಸರ್ವಿಸಸ್‌ (ಟಿಸಿಎಸ್‌) ಕೂಡ ಡಿಸೆಂಬರ್‌ 31ಕ್ಕೆ ಅಂತ್ಯವಾದ ಮೂರನೇ ತ್ರೈಮಾಸಿಕದಲ್ಲಿ ನಿವ್ವಳ ಲಾಭ ಶೇ. 7ರಷ್ಟು ಏರಿಕೆಯಾಗಿದೆ ಎಂದು ಹೇಳಿತ್ತು. ಸಂಸ್ಥೆಯ ನಿವ್ವಳ ಲಾಭ 8,701 ಕೋಟಿ ರೂ.ಗೆ ಹೆಚ್ಚಳವಾಗಿತ್ತು.

ಇದಾದ ಬಳಿಕ ಷೇರು ಪೇಟೆಯಲ್ಲಿ ಐಟಿ ಕಂಪನಿಗಳ ಷೇರುಗಳಿಗೆ ಹೆಚ್ಚಿನ ಬೇಡಿಕೆ ಕಂಡು ಬಂದಿತ್ತು. ಇದೀಗ ವಿಪ್ರೋ ಕಂಪನಿಯೂ ನಿರೀಕ್ಷೆ ಮೀರಿ ಲಾಭಗಳಿಸಿದೆ.