ಭಾರತದಲ್ಲಿ ಕಾರ್ಮಿಕರ ಮಾಸಿಕ ಕನಿಷ್ಠ ದಿನಗೂಲಿ ಪಾಕಿಸ್ತಾನಕ್ಕಿಂತಲೂ ಕಡಿಮೆ!

ಹೊಸದಿಲ್ಲಿ: ಭಾರತದಲ್ಲಿ ದಿನಗೂಲಿ ಕಾರ್ಮಿಕರ ಮಾಸಿಕ ಕನಿಷ್ಠ ಸರಾಸರಿ ವೇತನ 4,300 ರೂ.ಗಳಿದ್ದರೆ, ಪಾಕಿಸ್ತಾನದಲ್ಲಿ 9,820 ರೂ. ಇದೆ ಎಂದು ವಿಶ್ವಸಂಸ್ಥೆಯ ಕಾರ್ಮಿಕ ವಿಭಾಗದ ಅಧ್ಯಯನ ವರದಿ ತಿಳಿಸಿದೆ.

ಭಾರತದಲ್ಲಿ ಒಟ್ಟಾರೆಯಾಗಿ ದಿನಗೂಲಿ ಕಾರ್ಮಿಕರ ಕನಿಷ್ಠ ವೇತನವು ಪಾಕಿಸ್ತಾನ, ಶ್ರೀಲಂಕಾ, ನೇಪಾಳದಲ್ಲಿರುವುದಕ್ಕಿಂತಲೂ ಕಡಿಮೆ ಎಂದು ವರದಿ ತಿಳಿಸಿದೆ. ಲಾಕ್‌ ಡೌನ್‌ ಅವಧಿಯ ಮೊದಲ 40 ದಿನಗಳಲ್ಲಿ ದಿನಗೂಲಿ ಕಾರ್ಮಿಕರಿಗೆ ಯಾವುದೇ ವೇತನ ಸಿಕ್ಕಿರಲಿಲ್ಲ. ಇದರ ಪರಿಣಾಮ ವಾರ್ಷಿಕ ಆದಾಯದಲ್ಲಿ ದಿನಗೂಲಿ ಕಾರ್ಮಿಕರಿಗೆ ಶೇಕಡಾ 22‌ರಷ್ಟು ಕಡಿತವಾದಂತಾಗಿದೆ. ಸಂಘಟಿತ ವಲಯದ ಕಾರ್ಮಿಕರ ಸ್ಥಿತಿ ಸುಧಾರಿಸಿದ್ದು, ಅವರಿಗೆ ಆಗಿರುವ ವಾರ್ಷಿಕ ವೇತನ ನಷ್ಟ ಶೇ.3.6 ಎಂದು ವರದಿ ತಿಳಿಸಿದೆ.

ಜಾಗತಿಕ ಮಟ್ಟದಲ್ಲಿ ಸರಾಸರಿ ದಿನಗೂಲಿ ವೇತನ 9,720 ರೂ.ಗಳಾಗಿದೆ. ಚೀನಾದಲ್ಲಿ 7,060 ರೂ, ನೇಪಾಳದಲ್ಲಿ 7,920 ರೂ, ಭಾರತದಲ್ಲಿ 4,300 ರೂ, ಶ್ರೀಲಂಕಾದಲ್ಲಿ 4,940 ರೂ. ಇದೆ ಎಂದು ವರದಿ ಹೇಳಿದೆ.