ಸುಳ್ಳಿನ ಆಧಾರ್‌ಗೆ 10,000 ರೂ. ದಂಡ

ಹೊಸದಿಲ್ಲಿ: ಕಾರ್‌, ಮನೆ ಖರೀದಿ, ವಿದೇಶ ಪ್ರವಾಸ, ಹೂಡಿಕೆಗಳು ಸೇರಿದಂತೆ ದುಬಾರಿ ವ್ಯವಹಾರಗಳನ್ನು ಮಾಡಿದ ಸಂದರ್ಭದಲ್ಲಿ ನೀವು ಆಧಾರ್‌ ನೀಡಬೇಕಾಗುತ್ತದೆ. ಒಂದು ವೇಳೆ ಸುಳ್ಳಿನ ಆಧಾರ್‌ ಸಂಖ್ಯೆ ನಮೂದಿಸಿದರೆ, ಇಲ್ಲವೇ ತಪ್ಪಾಗಿ ನಮೂದಿಸಿದರೆ ದಂಡ ತೆರಬೇಕಾಗುತ್ತದೆ. ಇಂಥ ಪ್ರಕರಣಗಳಲ್ಲಿ ಪ್ರತಿಯೊಂದು ಸಲವೂ 10,000 ರೂ. ದಂಡ ಕಟ್ಟಬೇಕಾಗುತ್ತದೆ.

ಇಂಥದ್ದೊಂದು ನಿಯಮವು 2019ರ ಸೆಪ್ಟೆಂಬರ್‌ 1ರಿಂದ ಜಾರಿಗೆ ಬರುವ ನಿರೀಕ್ಷೆ ಇದೆ. ಈ ಸಂಬಂಧ ಕಾನೂನು ತಿದ್ದುಪಡಿಗಳು ಆಗಲಿದ್ದು ಆ ಬಳಿಕ ದಂಡ ನಿಯಮ ಜಾರಿಗೆ ಬರಲಿದೆ ಎಂದು ಇಬ್ಬರು ಹಿರಿಯ ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.

ಆಧಾರ್‌ ಮತ್ತು ಪ್ಯಾನ್‌ಗಳನ್ನು ಒಂದಕ್ಕೊಂದು ಪರ್ಯಾಯವಾಗಿ ಬಳಸುವ ಅವಕಾಶವನ್ನು ಸರಕಾರ ಈಗಾಗಲೇ ನೀಡಿದೆ. ಬಜೆಟ್‌ನಲ್ಲಿ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್‌ ಈ ಬಗ್ಗೆ ಪ್ರಕಟಿಸಿದ್ದಾರೆ. ದೊಡ್ಡ ಮೊತ್ತದ ಹಣಕಾಸು ವ್ಯವಹಾರಗಳ ಸಂದರ್ಭದಲ್ಲಿ ಆಧಾರ್‌ ಅನ್ನು ಕೇಳಲಾಗುತ್ತದೆ. ಆ ಸಂದರ್ಭದಲ್ಲಿ ಜನರು ಸುಳ್ಳಿನ ಆಧಾರ್‌ ನೀಡುವುದನ್ನು ತಪ್ಪಿಸುವ ನಿಟ್ಟಿನಲ್ಲಿ ದಂಡ ನಿಯಮ ಜಾರಿಗೊಳಿಸಲು ಸರಕಾರ ಮುಂದಾಗಿದೆ.

102 ಭಾರತೀಯರು ಆಧಾರ್‌ ಹೊಂದಿದ್ದು, ಪ್ಯಾನ್‌ ಅನ್ನು 22 ಕೋಟಿ ಮಂದಿ ಮಾತ್ರ ಹೊಂದಿದ್ದಾರೆ.