ಏ.1ರಿಂದ ಜೀವ ವಿಮೆ ಪ್ರೀಮಿಯಂ ಇಳಿಕೆ ಸಂಭವ

ಮುಂಬಯಿ: ಮುಂಬರುವ ದಿನಗಳಲ್ಲಿ ಯುವ ಹಾಗೂ ಮಧ್ಯಮ ವಯಸ್ಸಿನ ಜನತೆಗೆ ಜೀವ ವಿಮೆಯ ಪ್ರೀಮಿಯಂ ವೆಚ್ಚ ಕಡಿಮೆಯಾಗುವ ಸಾಧ್ಯತೆ ಇದೆ.

22ರಿಂದ 50 ವರ್ಷ ವಯಸ್ಸಿನ ತನಕದ, ದುಡಿಯುವ ವಯೋಮಾನದ ಜನತೆಗೆ ಏಪ್ರಿಲ್‌ 1ರಿಂದ ಜೀವ ವಿಮೆ ಪ್ರೀಮಿಯಂ ಮೊತ್ತ ಇಳಿಕೆಯಾಗುವ ನಿರೀಕ್ಷೆ ಇದೆ.

ವಿಮೆ ಕಂಪನಿಗಳು ಮುಂದಿನ 2019-20ರ ಸಾಲಿನಿಂದ ವಿಮೆ ಪ್ರೀಮಿಯಂ ದರವನ್ನು ಪರಿಷ್ಕರಿಸುವ ಸಂದರ್ಭ, ಬಳಕೆದಾರರ ಸರಾಸರಿ ಜೀವಿತಾವಧಿ ಕುರಿತು ಇತ್ತೀಚಿನ ಅಂಕಿ ಅಂಶಗಳನ್ನು ಬಳಸಲು ಮುಂದಾಗಿರುವುದು ಇದಕ್ಕೆ ಕಾರಣ.

ವಿಮೆ ಉದ್ದಿಮೆಯ ಇತ್ತೀಚಿನ ಅಂಕಿ ಅಂಶಗಳ ಪ್ರಕಾರ, 22-50 ವರ್ಷಗಳ ವಯಸ್ಸಿನ ವಿಮೆದಾರರಲ್ಲಿ ಮರಣದ ಪ್ರಮಾಣ ಶೇ.4-16ರಷ್ಟಿ ಇಳಿಕೆಯಾಗಿದೆ. ಹೀಗಾಗಿ ಪ್ರೀಮಿಯಂ ದರ ಕೂಡ ಕಡಿಮೆಯಾಗುವ ನಿರೀಕ್ಷೆ ಇದೆ.

''ವಿಮೆ ಪ್ರೀಮಿಯಂ ನಿಗದಿಗೆ ಸಂಬಂಧಿಸಿದಂತೆ ಕೆಲ ರಾಷ್ಟ್ರಗಳಲ್ಲಿ ಪ್ರತಿ ವರ್ಷವೂ ಜೀವಿತಾವಧಿಯ ಸರಾಸರಿ ಅಂಕಿ ಅಂಶಗಳನ್ನು ಪರಿಗಣಿಸಲಾಗುತ್ತಿದೆ. ಭಾರತದಲ್ಲಿ 5-6 ವರ್ಷಕ್ಕೊಮ್ಮೆ ಪರಿಗಣನೆಯಾಗುತ್ತದೆ'' ಎನ್ನುತ್ತಾರೆ ತಜ್ಞರು.