ಕೇಂದ್ರ ಬಜೆಟ್‌ ಪರಿಣಾಮ: ಒಂದೇ ದಿನದಲ್ಲಿ ಪೆಟ್ರೋಲ್‌ ದರ 2.54 ರೂ. ಹೆಚ್ಚಳ

ಹೊಸದಿಲ್ಲಿ: ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್‌ ಅವರು ಶುಕ್ರವಾರ ಮಂಡಿಸಿದ ಚೊಚ್ಚಲ ಬಜೆಟ್‌ನಲ್ಲಿ ಪೆಟ್ರೋಲ್‌ ಮತ್ತು ಡೀಸೆಲ್‌ ಮೇಲೆ 2 ರೂ. ಸೆಸ್‌ ಹೇರಿಕೆ ಮಾಡಿದ್ದರು. ಅದರ ನೇರ ಪರಿಣಾಮ ಬೀರಿದ್ದು ಪೆಟ್ರೋಲ್‌ ದರ ಲೀಟರ್‌ಗೆ 2.54 ರೂ. ಹೆಚ್ಚಾಗಿದೆ.

ಜುಲೈ 5, ಶುಕ್ರವಾರ ಬೆಂಗಳೂರಲ್ಲಿ ಪೆಟ್ರೋಲ್‌ ದರ 72.83 ರೂ. ಇತ್ತು. ಇದೀಗ ಒಂದೇ ದಿನಕ್ಕೆ 75.37 ರೂ. ತಲುಪಿದೆ. ದಿಲ್ಲಿಯಲ್ಲಿ ಲೀಟರ್‌ ಪೆಟ್ರೋಲ್‌ಗೆ 2.45 ರೂ. ಹೆಚ್ಚಳವಾಗಿದ್ದು, 72.96 ರೂ.ಗೆ ತಲುಪಿದೆ. ಕೋಲ್ಕತಾದಲ್ಲಿ 2.40 ರೂ., ಚೆನ್ನೈನಲ್ಲಿ 2.57 ರೂ. ಮತ್ತು ಮುಂಬಯಿನಲ್ಲಿ 2.42 ರೂ. ಹೆಚ್ಚಾಗಿದೆ.

ಡೀಸೆಲ್‌ ದರವೂ ಅಷ್ಟೇ ಹೆಚ್ಚಾಗಿದ್ದು ರಾಷ್ಟ್ರಾದ್ಯಂತ ಸುಮಾರು 2.50 ರೂ. ಹೆಚ್ಚಾಗಿದೆ. ಬೆಂಗಳೂರು ಲೀಟರ್‌ ಡೀಸೆಲ್‌ ದರ 2.43 ರೂ. ಹೆಚ್ಚಾಗಿದ್ದು, 68.88 ರೂ. ತಲುಪಿದೆ. ದಿಲ್ಲಿಯಲ್ಲಿ 2.36 ರೂ., ಕೋಲ್ಕತಾದಲ್ಲಿ 2.36 ರೂ., ಚೆನ್ನೈನಲ್ಲಿ 2.52 ರೂ. ಮತ್ತು ಮುಂಬಯಿನಲ್ಲಿ 2.50 ರೂ. ಹೆಚ್ಚಾಗಿದೆ.

ಬಜೆಟ್‌ನಲ್ಲಿ ಪೆಟ್ರೋಲಿಯಂ ಉತ್ಪನ್ನಗಳ ಮೇಲಿನ ತೆರಿಗೆ ದರ ಹೆಚ್ಚಳ ಪ್ರಸ್ತಾಪದ ಪರಿಣಾಮ ಪ್ರತಿ ಲೀಟರ್‌ ಪೆಟ್ರೋಲ್‌ ದರದಲ್ಲಿ ಲೀಟರ್‌ಗೆ 2.5 ರೂ. ಹಾಗೂ ಡೀಸೆಲ್‌ ದರದಲ್ಲಿ 2.30 ರೂ. ಏರಿಕೆಯಾಗುವ ಸಂಭವವನ್ನು ನಿರೀಕ್ಷಿಸಲಾಗಿತ್ತು. ಪ್ರತಿ ಲೀಟರ್‌ ಪೆಟ್ರೋಲ್‌ ಮತ್ತು ಡೀಸೆಲ್‌ ಮೇಲೆ ವಿಶೇಷ ಹೆಚ್ಚುವರಿ ಅಬಕಾರಿ ಸುಂಕ ಮತ್ತು ರಸ್ತೆ ಹಾಗೂ ಮೂಲಸೌಕರ್ಯ ಸೆಸ್‌ಅನ್ನು 2 ರೂ. ಹೆಚ್ಚಿಸಿದ್ದರಿಂದ ಸುಮಾರು 28,000 ಕೋಟಿ ರೂ. ತೆರಿಗೆ ಸಂಗ್ರಹಿಸುವ ಉದ್ದೇಶದಿಂದ ಈ ಕ್ರಮ ಕೈಗೊಳ್ಳಲಾಗಿದೆ.