Adani Wilmar: ಷೇರು ಪೇಟೆಗೆ ಅದಾನಿ ವಿಲ್ಮಾರ್‌ ಎಂಟ್ರಿ, ಮೊದಲ ದಿನವೇ ಬಂಪರ್‌ ವಹಿವಾಟು

ಹೊಸದಿಲ್ಲಿ: ಫಾರ್ಚ್ಯೂನ್‌ ಬ್ರಾಂಡ್‌ನ್ನು ಮುನ್ನಡೆಸುವ ಅದಾನಿ ವಿಲ್ಮಾರ್‌ ಮಂಗಳವಾರ ಷೇರು ಮಾರುಕಟ್ಟೆ ಪ್ರವೇಶಿಸಿತು. ಪ್ರತಿ ಷೇರಿಗೆ 221 ರೂ. ದರದೊಂದಿಗೆ ಬಾಂಬೆ ಷೇರುಪೇಟೆಯ ಪಟ್ಟಿಗೆ ಕಂಪನಿ ಸೇರಿತು. ಇದು ಕೊಡುಗೆ ದರವಾದ 230 ರೂ.ಗಿಂತ ಶೇ. 4ರಷ್ಟು ಕಡಿಮೆ ದರವಾಗಿದೆ. ರಾಷ್ಟ್ರೀಯ ಷೇರು ವಿನಿಮಯ ಮಾರುಕಟ್ಟೆ (ಎನ್‌ಎಸ್‌ಇ)ಯಲ್ಲಿ ಶೇ. 1 ರಿಯಾಯಿತಿ ದರ ಅಂದರೆ 227 ರೂ. ದರದೊಂದಿಗೆ ಪ್ರವೇಶ ಪಡೆಯಿತು. ಆದರೆ ನಂತರ ಷೇರು ತೀವ್ರ ಏರಿಕೆ ಕಂಡು ಮಧ್ಯಾಹ್ನದ ವೇಳೆಗೆ 266.50 ರೂ.ಗೆ ತಲುಪಿತ್ತು.

ಅದಾನಿ ವಿಲ್ಮಾರ್ ಗೌತಮ್ ಅದಾನಿ ಅವರ ಅದಾನಿ ಸಮೂಹ ಮತ್ತು ಸಿಂಗಾಪುರ ಮೂಲದ ವಿಲ್ಮಾರ್ ಸಮೂಹದ ನಡುವಿನ 50:50 ಜಂಟಿ ಉದ್ಯಮವಾಗಿದೆ. ಇದು ಫಾರ್ಚೂನ್ ಬ್ರಾಂಡ್ ಅಡಿಯಲ್ಲಿ ಅಡುಗೆ ಎಣ್ಣೆಗಳು ಮತ್ತು ಇತರ ಕೆಲವು ಉತ್ಪನ್ನಗಳನ್ನು ದೇಶದಲ್ಲಿ ಮಾರಾಟ ಮಾಡುತ್ತದೆ.

ಷೇರುಪೇಟೆಯಲ್ಲಿ ಪಟ್ಟಿಮಾಡುವ ಒಂದು ದಿನದ ಮೊದಲು ಅಂದರೆ ಮಂಗಳವಾರ ಗೌತಮ್ ಅದಾನಿ ನೇತೃತ್ವದ ಕಂಪನಿಯು ಅನಧಿಕೃತ ಮಾರುಕಟ್ಟೆಯಲ್ಲಿ 22-25 ರೂ. ಪ್ರೀಮಿಯಂ ದರವನ್ನು ಪಡೆದುಕೊಂಡಿತ್ತು. ಅಂದರೆ ವಿತರಣೆ ಬೆಲೆಗಿಂತ ಶೇ. 10ರಷ್ಟು ಹೆಚ್ಚಿನ ದರವನ್ನು ಪಡೆದಿತ್ತು. ಆದರೆ ವಿತರಣೆ ಸಂದರ್ಭದಲ್ಲಿ ಷೇರಿಗೆ 100 ರೂ.ವರೆಗೂ ಪ್ರೀಮಿಯಂ ದರವಿತ್ತು.

ಗುರುವಾರದಿಂದ ಆರಂಭವಾಗಲಿದೆ 3,600 ಕೋಟಿ ರೂ. ಗಾತ್ರದ ಅದಾನಿ ವಿಲ್ಮಾರ್‌ ಐಪಿಒ
ಅದಾನಿ ವಿಲ್ಮಾರ್‌ನ ಐಪಿಒ ಜನವರಿ 27-31ರ ನಡುವೆ ಚಂದಾದಾರಿಕೆಗೆ ತೆರೆದಿತ್ತು. ಈ ವೇಳೆ ಕಂಪನಿಯು ತನ್ನ ಷೇರುಗಳನ್ನು 218-230 ರೂ. ಬೆಲೆಯಲ್ಲಿ ಮಾರಾಟ ಮಾಡಿತ್ತು.

ಕಂಪನಿಯು ತನ್ನ ಆರಂಭಿಕ ಷೇರು ಮಾರಾಟದ ಮೂಲಕ 3,600 ಕೋಟಿ ರೂ.ಗಳನ್ನು ಸಂಗ್ರಹಿಸಿದೆ. ಷೇರು ಕೊಡುಗೆ ವೇಳೆ 17.37 ಪಟ್ಟು ಬೇಡಿಕೆ ಕಂಡು ಬಂದಿತ್ತು. ಎಚ್‌ಎನ್‌ಐ ಹೂಡಿಕೆದಾರರು ಭಾರೀ ಬಿಡ್ಡಿಂಗ್‌ ಮಾಡಿದ್ದೇ ಇದಕ್ಕೆ ಪ್ರಮುಖ ಕಾರಣ. ಎಚ್‌ಎನ್‌ಐ ಎಂದರೆ ಹೆಚ್ಚಿನ ಆಸ್ತಿ ಹೊಂದಿರುವ ವ್ಯಕ್ತಿಗಳಾಗಿದ್ದಾರೆ. ಚಿಲ್ಲರೆ ಹೂಡಿಕೆದಾರರು ಐಪಿಒ ವೇಳೆ 2 ಲಕ್ಷ ರೂ.ಗಿಂತ ಹೆಚ್ಚಿನ ಮೊತ್ತದ ಷೇರುಗಳಿಗೆ ಅರ್ಜಿ ಸಲ್ಲಿಸಿದರೆ ಅವರನ್ನು ಎಚ್‌ಎನ್‌ಐ ಎಂದು ಪರಿಗಣಿಸಲಾಗುತ್ತದೆ.

ಕ್ಯೂಐಬಿ ಕೋಟಾಗೆ 5.73 ಪಟ್ಟು ಚಂದಾದಾರಿಕೆ ಬೇಡಿಕೆ ಕಂಡು ಬಂದರೆ, ಎಚ್‌ಎನ್‌ಐ ಭಾಗದಲ್ಲಿ 56.3 ಪಟ್ಟು ಬೇಡಿಕೆ ಕಂಡು ಬಂತು. ಚಿಲ್ಲರೆ ಷೇರು ಹಂಚಿಕೆಗೆ 4 ಪಟ್ಟಿಗಿಂತ ಸ್ವಲ್ಪ ಕಡಿಮೆ ಬೇಡಿಕೆ ಕಂಡು ಬಂತು. ನೌಕರರಿಗೆ ಮೀಸಲಾಗಿದ್ದ ಷೇರುಗಳಿಗೆ ಕೇವಲ ಶೇ. 50ರಷ್ಟು ಮಾತ್ರ ಚಂದಾದಾರಿಕೆಗೆ ಬೇಡಿಕೆ ಕಂಡು ಬಂದಿತ್ತು.

ಅದಾನಿ ವಿಲ್ಮಾರ್ ಅದಾನಿ ಗ್ರೂಪ್‌ನಿಂದ ಷೇರು ಮಾರುಕಟ್ಟೆ ಪ್ರವೇಶಿಸಿದ 7ನೇ ಕಂಪನಿಯಾಗಿದೆ. ಇದು ಈಗಾಗಲೇ ಎಫ್‌ಎಂಸಿಜಿ ವಲಯದಲ್ಲಿ ಬ್ರಾಂಡ್ ಆಗಿ ಗುರುತಿಸಿಕೊಂಡಿದೆ. ಕಂಪನಿಯು ಭಾರತದಲ್ಲಿ ಖಾದ್ಯ ತೈಲಗಳು ಮತ್ತು ಪ್ಯಾಕ್ ಮಾಡಿದ ಆಹಾರಗಳ ಮಾರಾಟದಲ್ಲಿ ಮುಂಚೂಣಿಯಲ್ಲಿದೆ.

ವಾಣಿಜ್ಯ ಕ್ಷೇತ್ರದ 20 ಕ್ಕೂ ಹೆಚ್ಚು ವಲಯಗಳಿಗೆ ಸಂಬಂಧಿಸಿದ ಅತ್ಯುತ್ತಮ ಲೇಖನಗಳು ಮತ್ತು ಉದ್ಯಮಕ್ಕೆ ಸಂಬಂಧಿಸಿದ ಆಳವಾದ ಮಾಹಿತಿಗಾಗಿ ನೀವು ಎಕನಾಮಿಕ್ ಟೈಮ್ಸ್‌ ಓದಬಹುದು. ಮಾಹಿತಿಯುಕ್ತ ಲೇಖನಗಳನ್ನು ಓದಲು ಎಕನಾಮಿಕ್ ಟೈಮ್ಸ್ ಇಲ್ಲಿ ಕ್ಲಿಕ್ ಮಾಡಿ.