ಆರ್‌ಬಿಐ ಹೊಡೆತಕ್ಕೆ ಪೇಟಿಎಂ ತತ್ತರ, 13% ಕುಸಿದ ಷೇರು, ಹೂಡಿಕೆದಾರರಿಗೆ ನಷ್ಟದ ಮೇಲೆ ನಷ್ಟ

ಹೊಸದಿಲ್ಲಿ: ಪೇಟಿಎಂನ ಮೂಲ ಕಂಪನಿಯಾದ 'ಒನ್‌ 97 ಕಮ್ಯುನಿಕೇಷನ್ಸ್' ಷೇರುಗಳು ಸೋಮವಾರ ತಮ್ಮ ಕುಸಿತವನ್ನು ಮುಂದುವರಿಸಿವೆ. ಕಂಪನಿ ಬಗೆಗಿನ ನಕಾರಾತ್ಮಕ ಸುದ್ದಿಯ ಹಿನ್ನೆಲೆಯಲ್ಲಿ ಮತ್ತೆ ಶೇ. 13ರಷ್ಟು ಕುಸಿತ ಕಂಡಿದೆ.

ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್‌ಬಿಐ) ಪೇಟಿಎಂನ ತಂತ್ರಜ್ಞಾನ ವ್ಯವಸ್ಥೆಗಳಲ್ಲಿನ ಸಂಭವನೀಯ ಅಂತರಗಳ ಕಾರಣದಿಂದ ಹೊಸ ಗ್ರಾಹಕರನ್ನು ಸೇರಿಸಿಕೊಳ್ಳದಂತೆ ಪೇಟಿಎಂ ಪೇಮೆಂಟ್ಸ್ ಬ್ಯಾಂಕ್‌ಗೆ ಶುಕ್ರವಾರ ರಾತ್ರಿ ನಿರ್ಬಂಧ ವಿಧಿಸಿತ್ತು.

ಅಷ್ಟೇ ಅಲ್ಲದೆ, "ತನ್ನ ಐಟಿ ವ್ಯವಸ್ಥೆಯ ಸಮಗ್ರ ಸಿಸ್ಟಮ್ ಆಡಿಟ್ ನಡೆಸಲು ಐಟಿ ಲೆಕ್ಕ ಪರಿಶೋಧನಾ ಸಂಸ್ಥೆಯನ್ನು ನೇಮಿಸುವಂತೆ ಪೇಟಿಎಂ ಪೇಮೆಂಟ್ಸ್‌ ಬ್ಯಾಂಕ್‌ಗೆ ಸೂಚಿಸಲಾಗಿದೆ," ಎಂದೂ ಆರ್‌ಬಿಐ ತನ್ನ ಪ್ರಕಟಣೆಯಲ್ಲಿ ತಿಳಿಸಿತ್ತು.

ಈ ಬೆಳವಣಿಗೆ ನಂತರ ಪೇಟಿಎಂ ಷೇರುಗಳು ಶೇ. 13ರಷ್ಟು ಕುಸಿತ ಕಂಡಿದ್ದು 672.10 ರೂ.ಗೆ ಇಳಿಕೆಯಾಗಿವೆ. ಆರಂಭಿಕ ಕುಸಿತದ ನಂತರ ಇದೀಗ ಅಲ್ಪ ಚೇತರಿಕೆ ಕಂಡಿದ್ದು, ಕುಸಿತದ ಮಟ್ಟವನ್ನು ಒಂದಿಷ್ಟು ಕಡಿಮೆ ಮಾಡಿಕೊಂಡಿವೆ. ಹೀಗಿದ್ದೂ ಶೇ. 8.50ಯಷ್ಟು ಕುಸಿತ ಅಥವಾ 65.90 ರೂ. ಕುಸಿತ ಕಂಡಿದ್ದು, ಪೇಟಿಎಂ ಷೇರುಗಳು 709.15 ರೂ.ನಲ್ಲಿ ವಹಿವಾಟು ನಡೆಸುತ್ತಿವೆ.

Paytm Payments Bank; ಹೊಸ ಗ್ರಾಹಕರ ಸೇರ್ಪಡೆಗೆ ನಿಷೇಧ ಹೇರಿದ ಆರ್‌ಬಿಐ! ಹಾಲಿ ಗ್ರಾಹಕರ ಕಥೆ ಏನಾಗಲಿದೆ?
ಈ ವರದಿಯನ್ನು ಬರೆಯುವ ಹೊತ್ತಿಗೆ ಬಿಎಸ್‌ಇ ಮಾಪಕ ಮತ್ತು ಬೆಂಚ್‌ಮಾರ್ಕ್ ಸೆನ್ಸೆಕ್ಸ್ 527.29 ಅಂಕ ಅಥವಾ ಶೇ. 0.95ರಷ್ಟು ಏರಿಕೆ ಕಂಡಿದ್ದು 56,077.59ರಲ್ಲಿ ವಹಿವಾಟು ನಡೆಸುತ್ತಿತ್ತು.

ಫಿನ್‌ಟೆಕ್ ಸ್ಟಾರ್ಟ್‌ಅಪ್ ಪೇಟಿಎಂ ನವೆಂಬರ್‌ನಲ್ಲಿ 18,300 ಕೋಟಿ ರೂ. ಮೊತ್ತದ ಭಾರತದ ಅತಿದೊಡ್ಡ ಐಪಿಒ ಅನ್ನು ಪ್ರಾರಂಭಿಸಿತ್ತು. 2,150 ರೂ. ಬೆಲೆಯಲ್ಲಿ ಷೇರು ಮಾರುಕಟ್ಟೆಗೆ ಗ್ರ್ಯಾಂಡ್‌ ಎಂಟ್ರಿ ಕೊಟ್ಟು ಪೇಟಿಎಂ ಭಾರೀ ಸದ್ದು ಮಾಡಿತ್ತು. ಆದರೆ ಅಲ್ಲಿಂದ ನಂತರ ಪೇಟಿಎಂ ಷೇರುಗಳು ಒಂದೇ ಸಮನೆ ಕುಸಿಯುತ್ತಿದ್ದು ಸುಮಾರು ಶೇ. 70ರಷ್ಟು ನಷ್ಟ ಅನುಭವಿಸಿವೆ.

Paytm: ₹1.39 ಲಕ್ಷ ಕೋಟಿಯಿಂದ ₹50,000 ಕೋಟಿಗಿಳಿದ ಪೇಟಿಎಂ ಮಾರುಕಟ್ಟೆ ಮೌಲ್ಯ, ಹೂಡಿಕೆದಾರರಿಗೆ ಭಾರಿ ನಷ್ಟ
ಬ್ರೋಕರೇಜ್ ಸಂಸ್ಥೆ ಮ್ಯಾಕ್ವಾರಿ ಪೇಟಿಎಂಗೆ 'ಅಂಡರ್‌ಪರ್ಫಾರ್ಮ್' ರೇಟಿಂಗ್‌ನೊಂದಿಗೆ 700 ರೂ. ಟಾರ್ಗೆಟ್‌ ಪ್ರೈಸ್‌ ನಿಗದಿಪಡಿಸಿದೆ. ಗ್ರಾಹಕರನ್ನು ಸೇರಿಸಿದಂತೆ ಆರ್‌ಬಿಐ ನಿರ್ಬಂಧ ವಿಧಿಸಿರುವುದರಿಂದ ಪೇಟಿಎಂನ ವ್ಯವಹಾರದ ಮೇಲೆ ಯಾವುದೇ ಗಣನೀಯ ಪರಿಣಾಮ ಬೀರುವುದಿಲ್ಲ ಎಂದು ಅದು ಹೇಳಿದೆ.

ಐಪಿಒ ವೇಳೆ ಕಂಪನಿಯ ಮಾರುಕಟ್ಟೆ ಮೌಲ್ಯ 1.5 ಲಕ್ಷ ಕೋಟಿ ರೂ. ಇತ್ತು. ಇದೀಗ ಷೇರುಗಳ ಮೌಲ್ಯ ಕುಸಿದಿರುವುದರಿಂದ ಕಂಪನಿ ಮಾರುಕಟ್ಟೆ ಮೌಲ್ಯ 44,000 ಕೋಟಿ ರೂ.ಗಿಂತ ಕೆಳಕ್ಕಿಳಿದಿದೆ. ಪೇಟಿಎಂ ಪೇಮೆಂಟ್ಸ್ ಬ್ಯಾಂಕ್ ಸಣ್ಣ ಹಣಕಾಸು ಬ್ಯಾಂಕ್ ಪರವಾನಗಿಗಾಗಿ ಅರ್ಜಿ ಸಲ್ಲಿಸಲು ಚಿಂತನೆಯನ್ನೂ ನಡೆಸುತ್ತಿತ್ತು.

"ಹೊಸ ಗ್ರಾಹಕರನ್ನು ಸೇರಿಸಿಕೊಳ್ಳಲು ಸಾಧ್ಯವಾಗದ ಕಾರಣ ತಕ್ಷಣದ ಪರಿಣಾಮವು ಋಣಾತ್ಮಕವಾಗಿರುತ್ತದೆ. ಇದು ಆಂತರಿಕ ನಿಯಂತ್ರಣಗಳ ಬಗ್ಗೆ, ವಿಶೇಷವಾಗಿ ಹೊಸ ಗ್ರಾಹಕರ ಸೇರಿಸಿಕೊಳ್ಳುವ ಪ್ರಕ್ರಿಯೆಯ ಬಗ್ಗೆ ಮಾತನಾಡುತ್ತದೆ,” ಎಂದು ಸ್ವತಂತ್ರ ಮಾರುಕಟ್ಟೆ ತಜ್ಞ ಅಂಬರೀಶ್ ಬಾಳಿಗಾ ‘ಇಟಿ’ಗೆ ತಿಳಿಸಿದ್ದಾರೆ.

ತೀಕ್ಷ್ಣ ಒಳನೋಟ ಹಾಗೂ 20ಕ್ಕೂ ಹೆಚ್ಚು ವಲಯಗಳ ವಿಸ್ತೃತ ಮಾಹಿತಿ ಒಳಗೊಂಡ 'ಎಕನಾಮಿಕ್ ಟೈಮ್ಸ್' ವಿಶೇಷ ಲೇಖನಗಳಿಗಾಗಿ ಈಗಲೇ ಸಬ್‌ಸ್ಕ್ರೈಬ್ ಆಗಿ.