15 ನಿಮಿಷದಲ್ಲಿ 900 ಕೋಟಿ ರೂ. ಕಳೆದುಕೊಂಡ ಹೂಡಿಕೆ ಚತುರ ಝುಂಝುನ್‌ವಾಲಾ!

ಮುಂಬಯಿ: ಸತತ ಕುಸಿತ ಕಾಣುತ್ತಲೇ ಇರುವ ಷೇರು ಪೇಟೆ ಸೂಚ್ಯಂಕಗಳು ಶುಕ್ರವಾರದ ಬೆಳಗಿನ ವ್ಯವಹಾರದಲ್ಲಿಯೂ ಕುಸಿತ ಕಂಡಿತ್ತು. ಈ ವೇಳೆ ಕೇವಲ 15 ನಿಮಿಷಗಳಲ್ಲಿ ಖ್ಯಾತ ಷೇರು ಹೂಡಿಕೆದಾರ ರಾಕೇಶ್‌ ಝುಂಝುನ್‌ವಾಲಾ 900 ಕೋಟಿ ರೂಪಾಯಿ ಕಳೆದುಕೊಂಡರು.

ಅವರು ಹಾಗೂ ಅವರ ಪತ್ನಿ ರೇಖಾ ಝುಂಝುನ್‌ವಾಲಾ ಹೂಡಿಕೆ ಮಾಡಿದ್ದ ಟೈಟಾನ್‌ ಕಂಪನಿ, ಮೆಟ್ರೊ ಬ್ರ್ಯಾಂಡ್ಸ್‌ ಮತ್ತು ಸ್ಟಾರ್‌ ಹೆಲ್ತ್‌ ಆ್ಯಂಡ್‌ ಅಲೈಡ್‌ ಇನ್ಷೂರೆನ್ಸ್‌ ಕಂಪನಿಗಳ ಷೇರುಗಳು ಭಾರೀ ನಷ್ಟಕ್ಕೀಡಾದವು. ಇದರಿಂದ ಝುಂಝುನ್‌ವಾಲಾ ದಂಪತಿ 900 ಕೋಟಿ ರೂ. ನಷ್ಟ ಅನುಭವಿಸುವಂತಾಯಿತು. ದಿನದ ಅಂತ್ಯಕ್ಕೆ ಟೈಟಾನ್‌ ಷೇರುಗಳು ಶೇ. 6.09ರಷ್ಟು ಕುಸಿತ ಕಂಡರೆ, ಮೆಟ್ರೋ ಬ್ರ್ಯಾಂಡ್ಸ್‌ ಶೇ. 6.65 ಮತ್ತು ಸ್ಟಾರ್‌ಹೆಲ್ತ್‌ ಆ್ಯಂಡ್‌ ಅಲೈಡ್‌ ಇನ್ಷೂರೆನ್ಸ್‌ ಷೇರುಗಳು ಶೇ. 4.54ರಷ್ಟು ನಷ್ಟ ದಾಖಲಿಸಿದವು.

2022ರ ಹಣಕಾಸು ವರ್ಷದ ನಾಲ್ಕನೇ ತ್ರೈಮಾಸಿಕದಲ್ಲಿನ ವರದಿ ಪ್ರಕಾರ, ರಾಕೇಶ್‌ ಝುಂಝುನ್‌ವಾಲಾ ಅವರು ಟೈಟಾನ್‌ ಕಂಪನಿಯಲ್ಲಿ 3,53,10,395 ಷೇರುಗಳನ್ನು ಹೊಂದಿದ್ದಾರೆ. ಅವರ ಪತ್ನಿ ರೇಖಾ ಝುಂಝುನ್‌ವಾಲಾ 95,40,575 ಟೈಟಾನ್‌ ಷೇರುಗಳನ್ನು ಹೊಂದಿದ್ದಾರೆ. ಹೀಗೆ ರಾಕೇಶ್‌ ಝುಂಝುನ್‌ವಾಲಾ ಮತ್ತು ರೇಖಾ ಅವರು ಮಾರ್ಚ್ 31ರ ಹೊತ್ತಿಗೆ ಟೈಟಾನ್ ಕಂಪನಿಯಲ್ಲಿ ಒಟ್ಟಾಗಿ ಶೇ. 5.05 ರಷ್ಟು ಪಾಲನ್ನು ಹೊಂದಿದ್ದಾರೆ.

3 ಕಂಪನಿ ಷೇರುಗಳಿಂದ ಒಂದೇ ತಿಂಗಳಲ್ಲಿ ₹1,400 ಕೋಟಿ ಕಳೆದುಕೊಂಡ ಷೇರು ಪೇಟೆ ಪಂಟ ಝುಂಝುನ್‌ವಾಲಾ
ಈ ದಂಪತಿ ಮೆಟ್ರೊ ಬ್ರ್ಯಾಂಡ್‌ ಮತ್ತು ಸ್ಟಾರ್‌ಹೆಲ್ತ್‌ ಆ್ಯಂಡ್‌ ಅಲೈಡ್‌ನಲ್ಲೂ ಹೆಚ್ಚಿನ ಷೇರುಗಳನ್ನು ಹೊಂದಿದ್ದಾರೆ. ಝುಂಝುನ್‌ವಾಲಾ ಈ ಜನರಲ್ ಇನ್ಶೂರೆನ್ಸ್ ಕಂಪನಿಯಲ್ಲಿ ಮಾರ್ಚ್ 31ರ ವೇಳೆಗೆ ಶೇ. 17.51ರಷ್ಟು ಪಾಲನ್ನು ಹೊಂದಿದ್ದಾರೆ.

ಪಾದರಕ್ಷೆಗಳ ಚಿಲ್ಲರೆ ಮಾರಾಟ ಮಳಿಗೆಯಾಗಿರುವ ಮೆಟ್ರೊ ಬ್ರಾಂಡ್‌ಗಳಲ್ಲಿ ಝುಂಝುನ್‌ವಾಲಾ ಪತ್ನಿ ರೇಖಾ ಶೇ. 14.43 ಪಾಲನ್ನು ಹೊಂದಿದ್ದಾರೆ. ಈ ಎರಡು ಸಂಸ್ಥೆಗಳಲ್ಲೂ ಝುಂಝುನ್‌ವಾಲಾ ದಂಪತಿಗೆ ಹತ್ತಾರು ಕೋಟಿ ರೂ. ನಷ್ಟ ಉಂಟಾಗಿದೆ.