ಟಾಟಾ ಸ್ಟೀಲ್‌ಗೆ ಸೆಪ್ಟೆಂಬರ್‌ ತ್ರೈಮಾಸಿಕದಲ್ಲಿ ₹6,196 ಕೋಟಿ ಭಾರೀ ನಷ್ಟ, ಷೇರು ಬೆಲೆ ಏರಿಕೆ!

ಟಾಟಾ ಸ್ಟೀಲ್ ಸೆಪ್ಟೆಂಬರ್‌ಗೆ ಅಂತ್ಯಗೊಂಡ ತ್ರೈಮಾಸಿಕದಲ್ಲಿ 6,196 ಕೋಟಿ ರೂ.ಗಳ ಭಾರೀ ನಷ್ಟ ಅನುಭವಿಸಿದೆ. ಟಾಟಾ ಸಮೂಹಕ್ಕೆ ಸೇರಿದ ಕಂಪನಿ ದೊಡ್ಡ ಮಟ್ಟಕ್ಕೆ ನಷ್ಟ ಅನುಭವಿಸಿರುವುದು ತೀವ್ರ ಅಚ್ಚರಿ ಮೂಡಿಸಿದೆ. ಕಂಪನಿಯ ಯುರೋಪಿಯನ್ ಕಾರ್ಯಾಚರಣೆಗಳ ದುರ್ಬಲವಾಗಿದ್ದ ಹಿನ್ನೆಲೆಯಲ್ಲಿ ಎಲ್ಲಾ ಅಂದಾಜುಗಳನ್ನು ಮೀರಿ ಕಂಪನಿ ನಷ್ಟಕ್ಕೀಡಾಗಿದೆ.ಪ್ರಮುಖ ಉಕ್ಕು ಕಂಪನಿಯು ಕಳೆದ ವರ್ಷದ ಇದೇ ಅವಧಿಯಲ್ಲಿ 1,514.42 ಕೋಟಿ ರೂ. ನಿವ್ವಳ ಲಾಭ ದಾಖಲಿಸಿತ್ತು. ಜುಲೈ - ಸೆಪ್ಟೆಂಬರ್‌ ಅವಧಿಯಲ್ಲಿ ಟಾಟಾ ಗ್ರೂಪ್ ಸಂಸ್ಥೆಯು 55,682 ಕೋಟಿ ರೂ. ಆದಾಯ ಗಳಿಸಿದೆ. ಕಳೆದ ವರ್ಷದ ಇದೇ ಅವಧಿಯಲ್ಲಿ ಕಂಪನಿ 59,878 ಕೋಟಿ ರೂ. ಆದಾಯ ಗಳಿಸಿತ್ತು. ಇದಕ್ಕೆ ಹೋಲಿಸಿದರೆ ಈ ಬಾರಿ ಆದಾಯ ಶೇ. 7ರಷ್ಟು ಕುಸಿದಿದೆ.

ಬ್ಲೂಮ್‌ಬರ್ಗ್ ವಿಶ್ಲೇಷಕರು ಕಂಪನಿಯು 55,982 ಕೋಟಿ ರೂ. ಆದಾಯ ಗಳಿಸಲಿದ್ದು, 441 ಕೋಟಿ ರೂ. ನಿವ್ವಳ ಲಾಭ ಗಳಿಸಲಿದೆ ಎಂದು ಅಂದಾಜಿಸಿದ್ದರು. ಆದರೆ ಲಾಭ ಗಳಿಸುವ ಬದಲು ಟಾಟಾ ಗ್ರೂಪ್‌ ಕಂಪನಿಯು ಭಾರೀ ನಷ್ಟ ಅನುಭವಿಸಿದೆ.
Tata Steel | ಟಾಟಾದಲ್ಲಿ ವಿಲೀನ ಪರ್ವ, 7 ಲೋಹ ಕಂಪನಿಗಳು ಟಾಟಾ ಸ್ಟೀಲ್‌ನಲ್ಲಿ ಮರ್ಜ್‌
"ಭಾರತದ ವ್ಯಾಪಾರವು ಸುಮಾರು ಶೇ. 20ರಷ್ಟು ಮಾರ್ಜಿನ್ ಅನ್ನು ನೀಡಿದ್ದರೆ, 6,841 ಕೋಟಿ ರೂ. ತೆರಿಗೆ ಪೂರ್ವ ಲಾಭ ದಾಖಲಿಸಿದೆ. ಆದರೆ, ಯುರೋಪ್‌ನಲ್ಲಿ, ಅದರಲ್ಲೂ ಬ್ರಿಟನ್‌ನಲ್ಲಿ ಮಾರ್ಜಿನ್‌ ಇಳಿಕೆಯಾಗಿದೆ. ಈ ಅವಧಿಯಲ್ಲಿ ನೆದರ್‌ಲ್ಯಾಂಡ್ಸ್ ವ್ಯವಹಾರ ಸರಿಸುಮಾರು ಸ್ಥಿರವಾಗಿತ್ತು,” ಎಂದು ಟಾಟಾ ಸ್ಟೀಲ್ ಕಾರ್ಯನಿರ್ವಾಹಕ ನಿರ್ದೇಶಕ ಮತ್ತು ಮುಖ್ಯ ಹಣಕಾಸು ಅಧಿಕಾರಿ ಕೌಶಿಕ್ ಚಟರ್ಜಿ ಹೇಳಿದ್ದಾರೆ.

ಟಾಟಾ ಸ್ಟೀಲ್‌ನ ಯುರೋಪ್ ಘಟಕವು 1,812 ಮಿಲಿಯನ್ ಡಾಲರ್‌ ಆದಾಯ ಗಳಿಸಿದ್ದರೆ, 242 ಮಿಲಿಯನ್ ಡಾಲರ್‌ ನಷ್ಟ ಅನುಭವಿಸಿದೆ. ಈ ಅವಧಿಯಲ್ಲಿ 18.1 ಲಕ್ಷ ಟನ್‌ ಉಕ್ಕು ಮಾರಾಟ ಮಾಡಲಾಗಿದ್ದು, ಕಳೆದ ವರ್ಷಕ್ಕೆ ಹೋಲಿಸಿದರೆ ಮಾರಾಟ ಕಡಿಮೆಯಾಗಿದೆ.

ಆದರೆ ಯೂರೋಪ್‌ನಲ್ಲಿ ಲಿಕ್ವಿಡ್ ಸ್ಟೀಲ್ ಉತ್ಪಾದನೆಯು ಕಳೆದ ತ್ರೈಮಾಸಿಕಕ್ಕೆ ಹೋಲಿಸಿದರೆ 19.5 ಲಕ್ಷ ಟನ್‌ಗಳಿಗೆ ಏರಿಕೆ ಕಂಡಿದೆ. ನೆದರ್‌ಲ್ಯಾಂಡ್ಸ್‌ನಲ್ಲಿನ ಉತ್ತಮ ವಹಿವಾಟಿನಿಂದ ಇದು ಸಾಧ್ಯವಾಗಿದೆ.

ಕಂಪನಿಯು ಭಾರತದ ವ್ಯವಹಾರದಿಂದ 33,922 ಕೋಟಿ ರೂ. ಆದಾಯ ಗಳಿಸಿದ್ದು, 6,841 ಕೋಟಿ ರೂ. ತೆರಿಗೆ ಪೂರ್ವ ಲಾಭ ಗಳಿಸಿದೆ.

ಷೇರು ಬೆಲೆ ಏರಿಕೆ

ಟಾಟಾ ಸಮೂಹಕ್ಕೆ ಸೇರಿದ ಕಂಪನಿಯು ದ್ವಿತೀಯ ತ್ರೈಮಾಸಿಕದಲ್ಲಿ ಭಾರೀ ನಷ್ಟ ಅನುಭವಿಸಿದ್ದರೂ ಟಾಟಾ ಸ್ಟೀಲ್‌ ಷೇರುಗಳು ಗುರುವಾರ ಏರಿಕೆ ಕಂಡಿವೆ. ಆರಂಭದಲ್ಲಿ ಷೇರು ಕುಸಿತ ಕಂಡಿತ್ತು. ಆದರೆ ಮಧ್ಯಾಹ್ನದ ವೇಳೆಗೆ ಶೇ. 0.94 ಅಥವಾ 1.10 ರೂ. ಏರಿಕೆ ಕಂಡಿದ್ದು 117.70 ರೂ.ನಲ್ಲಿ ವಹಿವಾಟು ನಡೆಸುತ್ತಿದೆ.