ಗೆಲಾಕ್ಸಿ ನೋಟ್ 7 ಬಳಸಬೇಡಿ, ಸ್ವಿಚ್ ಆಫ್ ಮಾಡಿ: ಸ್ಯಾಮ್ಸಂಗ್ ಎಚ್ಚರಿಕೆ

ಸಿಯೋಲ್: ಬೆಂಕಿ ಕಾಣಿಸಿಕೊಂಡ ವರದಿಗಳ ಹಿನ್ನೆಲೆಯಲ್ಲಿ ಗೆಲಾಕ್ಸಿ ನೋಟ್ 7 ಬಳಸದಂತೆ ಅಥವಾ ಸ್ವಿಚ್ ಆಫ್ ಮಾಡುವಂತೆ ಸ್ಯಾಮ್ಸಂಗ್ ತನ್ನ ಬಳಕೆದಾರರಿಗೆ ಸೂಚಿಸಿದೆ.

ಅಮೆರಿಕ ಹಾಗೂ ಆಸ್ಟ್ರೇಲಿಯಾಗಳಲ್ಲಿ ಪ್ರಮುಖ ಟೆಲಿಕಾಂ ಮಾರಾಟಗಾರರು ನೋಟ್ 7 ಮಾರಾಟ ಅಥವಾ ವಿನಿಮಯ ಕೊಡುಗೆಗಳನ್ನು ಸ್ಥಗಿತಗೊಳಿಸಿದ್ದಾರೆ. ಹಲವಾರು ವಿಮಾನಯಾನ ಕಂಪನಿಗಳು ಕೂಡ ಗೆಲಾಕ್ಸಿ ನೋಟ್ 7 ಒಯ್ಯುವುದಕ್ಕೆ ನಿಷೇಧ ವಿಧಿಸಿವೆ. ಕಳೆದ ವಾರ ಅಮೆರಿಕದಲ್ಲಿ ಪ್ರಯಾಣಿಕರೊಬ್ಬರ ಬಳಿಯಿದ್ದ ಸ್ಯಾಮ್ಸಂಗ್ ಗೆಲಾಕ್ಸಿ ನೋಟ್ 7ನಿಂದ ಹೊಗೆ ಬರಲಾರಂಭಿಸಿದ ಬಳಿಕ, ಜಾಗತಿಕವಾಗಿ ಆತಂಕ ಹೆಚ್ಚಾಗಿತ್ತು.

ನೋಟ್ 7 ಸಾಧನವನ್ನು ಮಾರಾಟ ಮಾಡದಂತೆ ಈಗಾಗಲೇ ಜಾಗತಿಕವಾಗಿ ಮಾರಾಟಗಾರರಿಗೆ ಸೂಚಿಸಿರುವುದಾಗಿ ತಿಳಿಸಿರುವ ಸ್ಯಾಮ್ಸಂಗ್, ಈ ಸಮಸ್ಯೆಯ ಬಗ್ಗೆ ತನಿಖೆ ಆರಂಭಿಸಿರುವುದಾಗಿ ತಿಳಿಸಿದೆ.

ಗೆಲಾಕ್ಸಿ ನೋಟ್ 7 ಇರುವ ಗ್ರಾಹಕರು ಅದನ್ನು ಸ್ವಿಚ್ ಆಫ್ ಮಾಡಬೇಕು ಇಲ್ಲವೇ ಬಳಸಬಾರದು ಎಂದು ಕಂಪನಿಯು ಹೇಳಿಕೆಯಲ್ಲಿ ತಿಳಿಸಿದೆ.

ಬ್ಯಾಟರಿ ಓವರ್-ಹೀಟಿಂಗ್ ಸಮಸ್ಯೆಯಿಂದಾಗಿ ಎರಡು ತಿಂಗಳಲ್ಲಿ ಎರಡನೇ ಬಾರಿಗೆ ಸ್ಯಾಮ್ಸಂಗ್ ತನ್ನ ನೋಟ್ 7 ಸಾಧನದ ಮಾರಾಟಕ್ಕೆ ತಡೆಯೊಡ್ಡಬೇಕಾಗಿಬಂದಿದೆ. ಈ ಸಾಧನವು ಆಗಸ್ಟ್ ತಿಂಗಳಲ್ಲಿ ಬಿಡುಗಡೆಯಾಗಿತ್ತು ಮತ್ತು ಆ್ಯಪಲ್‌ನ ಐಫೋನ್ 7ಗೆ ಸ್ಫರ್ಧೆ ಒಡ್ಡುವುದಾಗಿ ನಿರೀಕ್ಷಿಸಲಾಗಿತ್ತು. ಆರಂಭದಲ್ಲಿ ಗ್ರಾಹಕರಿಂದ ಉತ್ತಮ ಪ್ರತಿಕ್ರಿಯೆ ಬಂದರೂ ವಾರದೊಳಗೆ ನೋಟ್7 ಸಾಧನದ ಸ್ಫೋಟಗೊಂಡ ಮತ್ತು ಸುಟ್ಟು ಕರಕಲಾದ ಪ್ರಕರಣಗಳು ಬೆಳಕಿಗೆ ಬಂದು, ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಾ, ಗ್ರಾಹಕರಲ್ಲಿ ಆತಂಕ ಹುಟ್ಟಿಸಿದ್ದವು. ಅಂದಿನಿಂದ ಈ ಬ್ಯಾಟರಿ ಸಮಸ್ಯೆಯಿಂದಾಗಿ ಸ್ಯಾಮ್ಸಂಗ್ ಇದುವರೆಗೆ 25 ಲಕ್ಷ ನೋಟ್ 7 ಸಾಧನಗಳನ್ನು ವಾಪಸ್ ಕರೆಸಿಕೊಂಡಿದೆ.