ಕ್ಯಾಶ್‌ಲೆಸ್‌ ಯೂಸ್‌ಲೆಸ್‌ ಎಂದ ದೇವೇಗೌಡ

ಹುಬ್ಬಳ್ಳಿ: ಮೂರು ವರ್ಷಗಳಿಂದ ಬರಗಾಲ ಎದುರಿಸುತ್ತಿರುವ ರೈತರಿಗೆ ಕ್ಯಾಶ್‌ಲೆಸ್‌ ವ್ಯವಹಾರ ಬೇಕಿಲ್ಲ. ಅದು ಯೂಸ್‌ಲೆಸ್ ಎಂದು ಮಾಜಿ ಪ್ರಧಾನಿ ದೇವೇಗೌಡ ವ್ಯಂಗ್ಯವಾಡಿದ್ದಾರೆ.

ಕ್ಯಾಶ್‌ಲೆಸ್‌ ಜಾರಿಗೆ ಮೊದಲು ರೈತರ ಬಗ್ಗೆ ಚಿಂತಿಸಬೇಕಿತ್ತು. ಮೊದಲು ಅವರ ರಕ್ಷಣೆ ಆಗಬೇಕು ಎಂದು ಗೌಡರು ಆಗ್ರಹಿಸಿದ್ದಾರೆ.

'ಎಚ್.ಡಿ ಕುಮಾರಸ್ವಾಮಿ ಹುಬ್ಬಳ್ಳಿಯಲ್ಲಿ ಮನೆ ಮಾಡಿದ್ದು ಜನಸಾಮಾನ್ಯರ ಸಮಸ್ಯೆಗೆ ಸ್ಪಂದಿಸಲು. ವಿರೋಧಿಗಳ ಟೀಕೆಗೆ ಉತ್ತರಿಸುವ ಅಗತ್ಯವಿಲ್ಲ. ಹುಬ್ಬಳ್ಳಿಯಲ್ಲಿದ್ದರೆ ಉತ್ತರ ಕರ್ನಾಟಕ ಭಾಗದ ಜಿಲ್ಲೆಗಳ ಸಂಪರ್ಕ ಸುಲಭ ಸಾಧ್ಯ. ಹಾಗಾಗಿ ಮನೆ ಮಾಡಿದ್ದಾರೆ,'ಎಂದು ಪುತ್ರನ ನಡೆಯನ್ನು ದೇವೇಗೌಡರು ಸಮರ್ಥಿಸಿಕೊಂಡಿದ್ದಾರೆ.

'ಕಾವೇರಿ ಹಾಗೂ ಮಹಾದಾಯಿ ವಿಚಾರದಲ್ಲಿ ಎರಡೆರಡು ರಾಷ್ಟ್ರೀಯ ಪಕ್ಷಗಳು ರಾಜಕೀಯ ಮಾಡುತ್ತಿರುವುದರಿಂದ ಜನ ಸಮಾನ್ಯರಿಗೆ ನಂಬಿಕೆ ಉಳಿದಿಲ್ಲ. ಇದರಿಂದಾಗಿ ಪ್ರಾದೇಶಿಕ ಪಕ್ಷಕ್ಕೆ ಬೆಂಬಲಿಸಬೇಕೆಂಬ ಭಾವನೆ ಜನರಲ್ಲಿದೆ. ಮುಂದಿನ ಬಾರಿ ಕುಮಾರಸ್ವಾಮಿ ಮುಖ್ಯಮಂತ್ರಿ ಆಗಬೇಕು ಎಂದು ಜನ ಬಯಸಿದ್ದಾರೆ. ರಾಜ್ಯದಲ್ಲಿ ಈ ಬಾರಿ 224 ಸ್ಥಾನಗಳಿಗೆ ಸ್ಪರ್ಧಿಸುತ್ತವೆ.
ನನಗೆ ವಿಶ್ವಾವಿದೆ, ನಾವು ಅಧಿಕಾರ ಬರುತ್ತವೆ. ಇದೇ ನಂಬಿಕೆಯೊಂದಿಗೆ ಹೋರಾಟ ಮಾಡುತ್ತಿದ್ದೇನೆ,'ಎಂದಿದ್ದಾರೆ.

'ಉತ್ತರ ಕರ್ನಾಟಕಕ್ಕೆ ಜೆಡಿಎಸ್ ಏನು ಮಾಡಿದೆ ಎಂದು ಬಿಜೆಪಿ ಪ್ರಶ್ನಿಸುತ್ತಿದೆ. ಈಗ ಬಿಜೆಪಿಯವರು ದೇಶ ಆಳುತ್ತಿದ್ದಾರೆ. ಉತ್ತರ ಕನಾ೯ಟಕ, ಬೆಂಗಳೂರಿಗೆ ಏನು ಮಾಡಿದ್ದಾರೆ ತಿಳಿಸಲಿ.
ಮಾತನಾಡುವವರು ಏನಾದರೂ ಮಾತಾಡಲಿ. ಶಾಸಕರಿಗೆ ಕೊಟ್ಟ ಅದೇಶ ಧಿಕ್ಕರಿಸಿದಾಗ ಏನು ಮಾಡಬೇಕು,' ಎಂದು ಪ್ರಶ್ನಿಸಿದ್ದಾರೆ.

ಕೃಷ್ಣ ಅವರನ್ನು ಪಕ್ಷ ಕರೆತರುವ ಸ್ಥಿತಿಯಲ್ಲಿಲ್ಲ:

ಎಸ್.ಎಂ ಕೃಷ್ಣಾ ರಾಜಕೀಯ ನಿವೃತ್ತಿ ‌ಬಗ್ಗೆ ಪ್ರತಿಕ್ರಿಯಿಸಿದ ದೇವೇಗೌಡರು, 'ಅವರ ಮನಸ್ಸಲ್ಲಿ ಏನಿದೆಯೋ ಗೊತ್ತಿಲ್ಲ. ಕೃಷ್ಣ ಭೇಟಿ ಮಾಡಿ ಪಕ್ಷಕ್ಕೆ ಕರೆತರುವ ಪರಿಸ್ಥಿತಿಯಲ್ಲಿ‌ ನಾವಿಲ್ಲ,' ಎಂದರು.

'ಭಾವನಿ ರೇವಣ್ಣ, ಪ್ರಜ್ವಲ್ ರೇವಣ್ಣ, ನಿಖಿಲ್ ಗೌಡ ಯಾರು ಚುನಾವಣೆಯಲ್ಲಿ ಸ್ಪರ್ಧಿಸುವುದಿಲ್ಲ. ನಾನೇ ಬಿ ಫಾರಂ ಕೊಡೋದು. ಅವರು ಚುನಾವಣೆಗೆ ಸ್ಪರ್ಧಿಸಲು ಅವಕಾಶ ಇಲ್ಲ. ಇದು ನನ್ನ ಖಂಡತುಂಡಾದ ಮಾತು,' ಎಂದರು.