ಉತ್ತರ ಕೊರಿಯಾಗೆ ಲಕ್ಷ್ಮಣರೇಖೆ ಎಳೆಯುವವರು ಯಾರು?
ಟ್ರಂಪ್ 'ಉಗ್ರಪ್ರತಾಪಿ'ಯಂತೆ ಆಡುತ್ತಿದ್ದರೂ ಅವರು ಒಬಾಮಾ ಹೊಂದಿದ್ದ ಉತ್ತರ ಕೊರಿಯಾ ನೀತಿಗೆ ಅಂಟಿಕೊಳ್ಳುವ ಸಾಧ್ಯತೆಯೇ ಹೆಚ್ಚು.
ಕೆ.ವೆಂಕಟೇಶ್
ಟ್ರಂಪ್ 'ಉಗ್ರಪ್ರತಾಪಿ'ಯಂತೆ ಆಡುತ್ತಿದ್ದರೂ ಅವರು ಒಬಾಮಾ ಹೊಂದಿದ್ದ ಉತ್ತರ ಕೊರಿಯಾ ನೀತಿಗೆ ಅಂಟಿಕೊಳ್ಳುವ ಸಾಧ್ಯತೆಯೇ ಹೆಚ್ಚು.
ಆಧುನಿಕ ಯುದ್ಧಗಳು ತಲೆದೋರಿದರ ಗೆದ್ದವರು ಮತ್ತು ಸೋತವರು ಎಂಬ ವರ್ಗಗಳು ಇರುವುದಿಲ್ಲ. ಅದೊಂದು ನಾಗರಿಕತೆಯ ಹಿಮ್ಮುಖ ಪಯಣ. ಶಿಲಾಯುಗದಲ್ಲಿ ಮನುಷ್ಯರಿಗೆ ಆರೋಗ್ಯವಾದರೂ ಇತ್ತು. ಆದರೆ ಅಣ್ವಸ್ತ್ರ ಬಳಕೆಯ ಆಧುನಿಕ ಸಮರಗಳು ಆರೋಗ್ಯವನ್ನೂ ಕಿತ್ತುಕೊಂಡು ನರಕವನ್ನು ಮಾತ್ರ ಉಳಿಸುತ್ತದೆ.
''ನಮ್ಮ ಮೇಲೆ ದಾಳಿ ಮಾಡಿದರೆ ಹುಷಾರ್... ಇಡೀ ಅಮೆರಿಕ ಪಡೆಗಳನ್ನೇ ಗುಡಿಸಿ ಹಾಕುತ್ತೇವೆ. ಯಾರೊಬ್ಬರೂ ಬದುಕಿ ಉಳಿಯುವುದಿಲ್ಲ ,'' ಎಂದು ಉತ್ತರ ಕೊರಿಯಾ ಧಮಕಿ ಹಾಕಿದೆ. ಮತ್ತೊಂದು ಕಡೆ, ''ಇಡೀ ಜಗತ್ತಿಗೆ ಉತ್ತರ ಕೊರಿಯಾ ದೊಡ್ಡ ಅಪಾಯ. ದಶಕಗಳಿಂದ ಕಣ್ಣಿಗೆ ಬಟ್ಟೆ ಕಟ್ಟಿಕೊಂಡಿದ್ದೇವೆ. ಇದೀಗ ಕಣ್ತೆರೆದು ಸಮಸ್ಯೆಯನ್ನು ಬಗೆಹರಿಸುವ ಕಾಲ ಸನ್ನಿಹಿತವಾಗಿದೆ,'' ಎಂದು ಅಮೆರಿಕ ಘೋಷಿಸಿದೆ. ಅಹಿಂಸೆಯನ್ನು ಪಾಲಿಸಿ ಎಲ್ಲರ ಕೈಯಿಂದ ಕಚ್ಚಿಸಿಕೊಂಡು ನಿಶ್ಯಕ್ತಗೊಂಡ ಸರ್ಪವೊಂದಕ್ಕೆ ಸನ್ಯಾಸಿಯೊಬ್ಬ ''ಕಚ್ಚಬೇಡ ಬುಸ್ ಎಂದರೆ ಸಾಕು,'' ಎಂದು ಮರು ಉಪದೇಶ ಮಾಡಿದ ಕತೆಯನ್ನು ನಾವೆಲ್ಲರೂ ಕೇಳಿದ್ದೇವೆ.
ವಾಗ್ಯುದ್ಧಗಳು ಆಧುನಿಕ ರಾಜನೀತಿಯ ಒಂದು ಅನಿವಾರ್ಯ ಭಾಗವೇ ಆಗಿಬಿಟ್ಟಿದೆ. ಏಕೆಂದರೆ ಆಧುನಿಕ ಯುದ್ಧಗಳು ತಲೆದೋರಿದರೆ ಗೆದ್ದವರು ಮತ್ತು ಸೋತವರು ಎಂಬ ವರ್ಗಗಳು ಇರುವುದಿಲ್ಲ. ಅದೊಂದು ನಾಗರಿಕತೆಯ ಹಿಮ್ಮುಖ ಪಯಣ. ಶಿಲಾಯುಗದಲ್ಲಿ ಮನುಷ್ಯರಿಗೆ ಆರೋಗ್ಯವಾದರೂ ಇತ್ತು. ಆದರೆ ಅಣ್ವಸ್ತ್ರ ಬಳಕೆಯ ಆಧುನಿಕ ಸಮರಗಳು ಆರೋಗ್ಯವನ್ನೂ ಕಿತ್ತುಕೊಂಡು ನರಕವನ್ನು ಮಾತ್ರ ಉಳಿಸುತ್ತವೆ. ಅಮೆರಿಕ ಮತ್ತು ಉತ್ತರ ಕೊರಿಯಾ ನಡುವಣ ಸಂಘರ್ಷ ಮೂರನೇ ಮಹಾಯುದ್ಧಕ್ಕೆ ನಾಂದಿ ಹಾಡಲಿದೆ ಎಂದು ಕೆಲ ಮಾಧ್ಯಮಗಳು ಪ್ರತಿದಿನ ಶಂಖ ಊದುತ್ತಿವೆ. ಇಂಥ ಆತಂಕಕ್ಕೆ ಸೊಪ್ಪು ಹಾಕುವ ರೀತಿಯಲ್ಲಿ ಕೆಲ ವಿದ್ಯಮಾನಗಳು ಜರುಗುತ್ತಿರುವುದು ಸುಳ್ಳಲ್ಲ. ಅಮೆರಿಕ ಕಾರ್ಲ್ ವಿನ್ಸನ್ ಯುದ್ಧ ನೌಕೆ ಫಿಲಿಪ್ಪೀನ್ಸ್ನಲ್ಲಿ ಬೀಡು ಬಿಟ್ಟಿದೆ.
ಇರಾಕ್ ಸೇರಿದಂತೆ ಹಲವು ಯುದ್ಧಕೋರ ಕಾರ್ಯಾಚರಣೆಯಲ್ಲಿ ಇದು ಸಕ್ರಿಯವಾಗಿತ್ತು. 90 ಯುದ್ಧ ವಿಮಾನಗಳು ಇದರಲ್ಲಿ ಲಂಗರು ಹಾಕಿವೆ. ಜತೆಗೆ ಹೆಲಿಕಾಪ್ಟರ್ಗಳೂ ಇದ್ದು, ಸೀಳು ನಾಯಿಗಳಂತೆ ಯಾವುದೇ ಸಮಯದಲ್ಲಿ ಎದುರಾಳಿಗಳ ಮೇಳೆ ಮುಗಿಬೀಳಬಲ್ಲವು. ಜಪಾನ್ನ ಅಶಿಗರಾ ಮತ್ತು ಸಮಿದರೆ ಸಮರ ನೌಕೆಗಳು- ಕಾರ್ಲ್ವಿನ್ಸನ್ ವಿಮಾನ ಸಾಗಣೆ ನೌಕೆಯ ಜತೆಗೂಡಿ ಉತ್ತರ ಕೊರಿಯಾಕ್ಕೆ ಸಮೀಪವಿರುವ ಪಶ್ಚಿಮ ಪೆಸಿಫಿಕ್ ಸಮುದ್ರದಲ್ಲಿ ತಾಲೀಮು ನಡೆಸುತ್ತಿವೆ. ಸರ್ವರೀತಿಯಲ್ಲೂ ಸಜ್ಜಾಗಿರಿ ಎಂದು ದಕ್ಷಿಣ ಕೊರಿಯಾ ತನ್ನ ಸೇನೆಗೆ ಆದೇಶಿಸಿದೆ.
''ಒಂದೇ ಒಂದು ಶಾಟ್ನಲ್ಲಿ ಅವುಗಳನ್ನೆಲ್ಲ ಟೈಟಾನಿಕ್ನಂತೆ ಮುಳುಗಿಸಿಬಿಡುತ್ತೇವೆ. ನಮ್ಮ ಮೇಲೆ ದಾಳಿ ಮಾಡಿದರೆ ನಮ್ಮ ಪ್ರತಿ ಆಕ್ರಮಣ ಹೇಗಿರುತ್ತದೆ ಎಂದರೆ ಶರಣಾಗತಿ ಪತ್ರಕ್ಕೆ ಸಹಿ ಹಾಕಲು ಕೂಡ ಒಂದು ನರಪಿಳ್ಳೆ ಇರಬಾರದು ಹಾಗೆ ಮಾಡುತ್ತೇವೆ,'' ಎಂದು ಉತ್ತರ ಕೊರಿಯಾ ಬಿಡಿಬೀಸು ಹೇಳಿಕೆ ನೀಡಿದೆ. ಇಷ್ಟೇ ಅಲ್ಲ ಯಾವುದೇ ಕ್ಷ ಣದಲ್ಲಿ ಅಣ್ವಸ್ತ್ರ ಪರೀಕ್ಷೆ ನಡೆಸುವ ಸನ್ನಾಹದಲ್ಲಿದೆ. ಉತ್ತರ ಕೊರಿಯಾದ ಶಕ್ತಿ ಯಾವ ಪರಿ ಇದೆ ಎಂದರೆ ಅದು ಪ್ರತಿ ಆರೇಳು ವಾರಗಳಿಗೊಮ್ಮೆ ಅಣುಬಾಂಬ್ ಅನ್ನು ಉತ್ಪಾದಿಸಬಲ್ಲದು. ಕಳೆದ ಹತ್ತು ವರ್ಷಗಳಿಂದ ಉತ್ತರ ಕೊರಿಯಾದ ಮಾರಕ ಅಣ್ವಸ್ತ್ರ ಕಾರ್ಯಕ್ರಮಗಳಿಗೆ ತಡೆ ಹಾಕಲು ಶ್ವೇತಭವನ ಯತ್ನಿಸುತ್ತಲೇ ಬಂದಿದೆ. ಆದರೆ ಅದು ಯಶಸ್ವಿಯಾಗಿಲ್ಲ.
ಆದ್ದರಿಂದಲೇ ಈ ದೇಶ ಜಗತ್ತಿನ ಪಾಲಿಗೆ ಉಡಿಯಲ್ಲಿ ಕಟ್ಟಿಕೊಂಡ ಕೆಂಡ ಎಂದು ಟ್ರಂಪ್ ಆತಂಕ ವ್ಯಕ್ತಪಡಿಸಿದ್ದಾರೆ. ಟ್ರಂಪ್ ಅವರು ಇಡೀ ಸೆನೆಟ್ಗೆ ಉತ್ತರ ಕೊರಿಯಾ ಹೇಗೆ ಗಂಡಾಂತರಕಾರಿ ಎಂಬುದನ್ನು ವಿವರಿಸಿದ್ದಾರೆ. 2020ರ ವೇಳೆಗೆ ಉತ್ತರಕೊರಿಯಾದ ಸರ್ವಾಧಿಕಾರಿ ಕಿಮ್ ಕೈಯಲ್ಲಿ ಏನಿಲ್ಲವೆಂದರೂ 50 ಅಣ್ವಸ್ತ್ರಗಳಿರುತ್ತವೆ. ಇವುಗಳನ್ನು ಕ್ಷಿಪಣಿಗಳಿಗೆ ಜೋಡಿಸಿ ಜಪಾನ್, ದಕ್ಷಿಣ ಕೊರಿಯಾಗಳ ಮೇಲೆ ಅಪ್ಪಳಿಸಬಹುದು. ಅಮೆರಿಕದ ಮೇಲೆ ದಾಳಿ ಮಾಡಬಹುದಾದ ಬಹುದೂರದ ಗುರಿಗಳತ್ತ ಸಾಗಬಲ್ಲ ಖಂಡಾಂತರ ಕ್ಷಿಪಣಿಗಳು ಸದ್ಯಕ್ಕೆ ಆ ದೇಶದ ಆಯುಧಾಗಾರದಲ್ಲಿಲ್ಲ. ಆದರೆ ಅವುಗಳ ಸೇರ್ಪಡೆ ಮಾಡುವ ದಿನಗಳು ದೂರವಿಲ್ಲ.
ನಮಗೆ ನಾವೇ ಎಲ್ಲ ಎಂದು ಒಂಟಿತನವನ್ನು ಆಯ್ಕೆ ಮಾಡಿಕೊಂಡಿರುವ ಉತ್ತರಕೊರಿಯಾದ ಅಧ್ಯಕ್ಷ ಕಿಮ್ ತಲೆಕೆಟ್ಟ ಆದ್ಮಿ. ನನ್ನ ಒಂದು ಕಣ್ಣು ಹೋದರೂ ಚಿಂತೆ ಇಲ್ಲ ಎದುರಾಳಿಯ ಎರಡು ಕಣ್ಣು ಹೋಗಬೇಕು ಎನ್ನುವ ವಿಲಕ್ಷ ಣ ವ್ಯಕ್ತಿ. ಇಡೀ ದೇಶವನ್ನು ತನ್ನ ವಿಲಕ್ಷ ಣ ನಡವಳಿಕೆಗೆ ತಕ್ಕಂತೆ ಬುಗುರಿಯಂತೆ ಆಡಿಸುತ್ತಿರುವಾತ. ಇಂಥವನ ಸುಪರ್ದಿಯಲ್ಲಿ ಅಣ್ವಸ್ತ್ರಗಳಿವೆ ಎಂಬುದೇ ಅಸಲಿ ಅಪಾಯ. ದಕ್ಷಿಣ ಕೊರಿಯಾದ ಸೋಲ್ ಅನ್ನು ಕಿಮ್ ಹೊಂದಿರುವ ಸಾಂಪ್ರದಾಯಿಕ ಅಸ್ತ್ರಗಳೇ ನಾಶಮಾಡಿಬಿಡಬಲ್ಲವು. ಕಿಮ್ ಜತೆ ತೀವ್ರ ವೈಮನಸ್ಯಹೊಂದಿರುವ ಈ ಎರಡೂ ದೇಶಗಳು ಅಮೆರಿಕಕ್ಕೆ ನಿಕಟ ಒಡನಾಡಿಗಳು.
ಇಡೀ ದೇಶವನ್ನು ಇದ್ದಂತೆ ಇರಿಸಿ, ನ್ಯೂಕ್ಲಿಯರ್ ಅಸ್ತ್ರಗಳನ್ನು ಮಾತ್ರ ಜಮಾವಣೆ ಮಾಡಿಕೊಳ್ಳುತ್ತಿರುವ ಕಿಮ್ ಅನ್ನು ಕಮಕ್ ಕಿಮಕ್ ಆಗಿಸುವುದು ಅಷ್ಟು ಸುಲಭವಲ್ಲ. ಏಕೆಂದರೆ ಈತ ಯಾರ ಮಾತನ್ನೂ ಕೇಳುವುದಿಲ್ಲ. ಇಡೀ ದೇಶಕ್ಕೆ ಎರಡೇ ಎರಡು ಹೇರ್ಸ್ಟೈಲ್ ಇರಬೇಕು ಎಂದು ಕಟ್ಟಾಜ್ಞೆ ಹೊರಡಿಸುವ ವಿಚಿತ್ರ ಮನುಷ್ಯ. ಸೊಳ್ಳೆಯನ್ನು ಹೊಡೆಯುವಷ್ಟೇ ನಿರಾಯಾಸವಾಗಿ ಮನುಷ್ಯರನ್ನು ಢಂ ಎಂದುರುಳಿಸಿ ಬಿಡುವ ಆಸಾಮಿ.
ವಿಚಿತ್ರವೆಂದರೆ ತನ್ನ ಕುರಿತು ಇಡೀ ಪಶ್ಚಿಮ ದೇಶಗಳು ಯಾವ ಚಿತ್ರವನ್ನು ಕಟ್ಟಿಕೊಡುತ್ತವೆಯೊ ಟ್ರಂಪ್ ಬಗ್ಗೆ ಕೂಡ ಕಿಮ್ ತನ್ನ ದೇಶಕ್ಕೆ ಅದೇ ಚಿತ್ರವನ್ನು ಕಟ್ಟಿಕೊಡುತ್ತಾರೆ. ''ಅಮೆರಿಕದ ನೌಕೆಗಳು, ಜಲಾಂತರ್ಗಾಮಿಗಳೆಲ್ಲ ಬಂದಿಳಿದಿವೆ ನೋಡಿ... ನಾವೇನು ಅಮೆರಿಕದತ್ತ ಹೋಗಿದ್ದೇವೆಯೇ? ಅಣ್ವಸ್ತ್ರಗಳು ನಮ್ಮ ಆತ್ಮರಕ್ಷ ಣೆಗೆ ಮಾತ್ರ,'' ಎಂದು ಕಿಮ್ ಎದುರು ಪ್ರಶ್ನೆ ಹಾಕುತ್ತಾರೆ. ಆದರೆ 11 ವರ್ಷದಲ್ಲಿ ಆರು ಬಾರಿ ಅಣ್ವಸ್ತ್ರ ಪರೀಕ್ಷೆ ಮಾಡಿ ಈಗ ಮತ್ತೊಂದಕ್ಕೆ ಸಜ್ಜಾಗಿರುವ ಆ ದೇಶದ ನಡೆಯೇ ಸರಿ ಇಲ್ಲ. ಅಭಿವೃದ್ಧಿಯ ಚಕ್ರವನ್ನು ಹಿಂದಕ್ಕೋಡಿಸಿ ಸರ್ವಸಂಪನ್ಮೂಲವನ್ನೂ ಅಣ್ವಸ್ತ್ರ ತಯಾರಿಕೆಗೆ ಅದು ಸುರಿಯುತ್ತಿದೆ. ಸುಖಾಸುಮ್ಮನೆ ಅದೇಕೆ ಹೀಗೆ ಮನುಕುಲಕ್ಕೇ ಅಪಾಯಕಾರಿ ಎಂದೆನಿಸುವ ಶಸ್ತ್ರಾಸ್ತ್ರಗಳನ್ನು ಹೊಂದಬೇಕು ಎನ್ನುವ ತಾರ್ಕಿಕ ಪ್ರಶ್ನೆಗಳು ಇದ್ದೇ ಇವೆ.
ಇಷ್ಟೆಲ್ಲ ವಿಷಮ ವಿದ್ಯಮಾನಗಳು ನಡೆಯುತ್ತಿದ್ದರೂ ಇದರ ಅರ್ಥ ಯುದ್ಧ ಅನಿವಾರ್ಯ ಎಂದೂ ಅಲ್ಲ; ಅಥವಾ ಯುದ್ಧ ಸಂಭವ ಎಂಬುದೂ ಅಲ್ಲ. ಏಕೆಂದರೆ ಅಮೆರಿಕದ ರಕ್ಷ ಣಾ ಕೋವಿದರು ಮತ್ತು ಗುಪ್ತಚರ ಮಂದಿ ಉತ್ತರಕೊರಿಯಾದ ಇಂಚಿಂಚೂ ಅಳೆದುಬಿಟ್ಟಿದ್ದಾರೆ. ಮೇಲ್ನೋಟಕ್ಕೆ ಟ್ರಂಪ್ 'ಉಗ್ರಪ್ರತಾಪಿ'ಯಂತೆ ಆಡುತ್ತಿದ್ದರೂ ಅವರು ಒಬಾಮಾ ಹೊಂದಿದ್ದ ಉತ್ತರ ಕೊರಿಯಾ ನೀತಿಗೆ ಅಂಟಿಕೊಳ್ಳುವ ಸಾಧ್ಯತೆಯೇ ಹೆಚ್ಚಿದೆ. ದಕ್ಷಿಣ ಕೊರಿಯಾದ ಸೇನಾಬಲಕ್ಕೆ ಕಸುವು ತುಂಬಿದ್ದಾರೆ. ಸಮರ ನೌಕೆಗಳನ್ನು ನಿಯೋಜಿಸಿದ್ದಾರೆ ಎಂಬುದು ಕೂಡ ನಿಜ.
ಇದೆಲ್ಲವೂ ಕಿಮ್ ಜತೆ ಉತ್ತಮ ನಂಟನ್ನು ಹೊಂದಿರುವ ಚೀನಾ ಮೇಲೆ ಒತ್ತಡ ಹೇರುವ ತಂತ್ರದ ಕಾರ್ಯಯೋಜನೆಗಳಾಗಿವೆ. ಏನಾದರೂ ಸರಿ ನಿಮ್ಮ ದೋಸ್ತಿಯನ್ನು ಹದ್ದುಬಸ್ತಿನಲ್ಲಿಡಿ ಎಂಬ ಸಂದೇಶವನ್ನು ಟ್ರಂಪ್ ಅವರು, ಚೀನಾಕ್ಕೆ ನೀಡಿದ್ದಾರೆ. ಜತೆಗೆ ಉತ್ತರ ಕೊರಿಯಾ ಮೇಲೆ ಕಠಿಣ ನಿರ್ಬಂಧಗಳನ್ನು ಹೇರಲು ಸಜ್ಜಾಗಿದ್ದಾರೆ. ಶಾಂತಿ ಸಮಾಧಾನದಿಂದ ಇರಿ ಎನ್ನುವ ಸಾಮಾನ್ಯ ಹೇಳಿಕೆಗೆ ತನ್ನನ್ನು ಮಿತಿಗೊಳಿಸಿಕೊಂಡಂತೆ ಕಾಣುತ್ತಿದೆ. ವಿಶ್ವಸಂಸ್ಥೆ ತನ್ನೆಲ್ಲ ಶಕ್ತಿಯನ್ನು ಒಟ್ಟುಗೂಡಿಸಿಕೊಂಡು ಈ ಅಣ್ವಸ್ತ್ರದಾಹಿ ದೇಶವನ್ನು ಹದ್ದುಬಸ್ತಿಗೆ ತರಬೇಕಾಗಿದೆ.
ಉತ್ತರ ಕೊರಿಯಾ ತನ್ನ ಶಕ್ತಿಗಿಂತ ಮಿಗಿಲಾಗಿ ಬಡಾಯಿ ಕೊಚ್ಚಿಕೊಳ್ಳುತ್ತಿದ್ದರೂ ತನ್ನ ಕ್ರಿಯೆಯನ್ನು ಕ್ಷಿಪಣಿ ಪರೀಕ್ಷೆ ಮತ್ತು ರಾಜಧಾನಿ ಪಿಯಾಂಗ್ಗಾಂಗ್ನಲ್ಲಿ ಮಿಲಿಟರಿ ಪರೇಡ್ಗೆ ಮಾತ್ರ ಸೀಮಿತಗೊಳಿಸಿಕೊಂಡಿದೆ. ಹೊಸ ಅಣ್ವಸ್ತ್ರ ಪರೀಕ್ಷೆ ಎಂಬ ಅಪಾಯದ ಗಂಟೆ ಮೊಳಗುತ್ತಿದೆ ಎಂಬುದು ನಿಜ. ಹಾಗೆಂದು ಇದು ಕಿಮ್ ಅವರ ಹೊಸ ಕೃತ್ಯವೇನೂ ಅಲ್ಲ. ಅದು ಇದ್ದಕ್ಕಿದ್ದಂತೆ ತನ್ನ ನೀತಿಯನ್ನು ಮಾರ್ಪಡಿಸಿಕೊಳ್ಳುವಷ್ಟು ನಮ್ಯತೆ ಇರುವ ದೇಶವೂ ಅಲ್ಲ. ಚೀನಾ ಸೇರಿದಂತೆ ವಿಶ್ವ ಸಮುದಾಯದ ಪ್ರಬಲ ಒತ್ತಡ, ಒತ್ತಾಸೆಯಿಂದ ಮಾತ್ರ ಉತ್ತರ ಕೊರಿಯಾಗೆ ಲಕ್ಷ ್ಮಣರೇಖೆ ಎಳೆಯಬಹುದು. ಇಂಥ ಎಲ್ಲ ಲೆಕ್ಕಾಚಾರಗಳನ್ನು ಕಿಮ್ ಜಾಂಗ್ ಉನ್ ಮತ್ತು ಡೊನಾಲ್ಡ್ ಟ್ರಂಪ್ ಬದಲಾಯಿಸಬಲ್ಲರು ಎಂಬುದನ್ನು ಯಾರೂ ಅಲ್ಲಗಳೆಯಲಾರರು.