ಕಾಮಿಡಿ ನಕ್ಕು ಬಿಡಿ: ರಚ್ಚೆ ಹಿಡಿದ 'ಸರ್ದಾರಿಣಿ' ಕಿವಿಯಲ್ಲಿ ಪೈಲಟ್ ಪಿಸುಗುಟ್ಟಿದ್ದೇನು..?

ಪ್ರಯಾಣಿಕರ ವಿಮಾನವೊಂದು ಚಂಡೀಗಡಕ್ಕೆ ಹೊರಟಿತ್ತು. ವಿಮಾನದ ಎಕಾನಮಿ ಕ್ಲಾಸ್‌ನಲ್ಲಿ ಪ್ರಯಾಣಿಸಬೇಕಿದ್ದ ಹರ್‌ಪ್ರೀತ್‌ ಕೌರ್‌ ಎಂಬಾಕೆ, ಫಸ್ಟ್‌ ಕ್ಲಾಸ್‌ ವಿಭಾಗಕ್ಕೆ ಹೋಗಿ ಕುಳಿತುಕೊಳ್ಳಲು ಯತ್ನಿಸಿದರು. ವಿಮಾನದಲ್ಲಿದ್ದ ಗಗನಸಖಿ ನಿಮ್ಮ ಟಿಕೆಟ್‌ ಕೊಡಿ ಎಂದು ಕೇಳಿದರು. ಹರ್‌ಪ್ರೀತ್ ಕೌರ್‌ ಬಳಿಯಿದ್ದ ಟಿಕೆಟ್‌ನಲ್ಲಿ ಎಕಾನಮಿ ಕ್ಲಾಸ್‌ ಎಂದು ಬರೆದಿತ್ತು. ಹೀಗಾಗಿ, ಗಗನಸಖಿ ಕೌರ್‌ ಅವರಿಗೆ ನೀವು ಅಲ್ಲಿಗೆ ಹೋಗಬಾರದು, ಇಲ್ಲಿ ಈ ಕಡೆ ಬನ್ನಿ ಎಕಾನಮಿ ಕ್ಲಾಸ್‌ನಲ್ಲಿ ಕುಳಿತುಕೊಳ್ಳಿ ಎಂದು ಸೂಚಿಸಿದರು.

ಆದ್ರೆ ಹರ್‌ಪ್ರೀತ್ ತಮ್ಮ ವರಸೆ ತೋರಿಸೋಕೆ ಹೊರಟೇಬಿಟ್ಟಳು..! ನಾನು ಸರದಾರಿಣಿ! ಸುಂದರಿ! ಚಂಡೀಗಢಕ್ಕೆ ಹೊರಟಿದ್ದೇನೆ. ನಾನು ಫಸ್ಟ್‌ ಕ್ಲಾಸ್‌ನಲ್ಲೇ ಕೂರೋದು, ಎಕಾನಮಿ ಕ್ಲಾಸ್‌ಗೆ ಹೋಗೋದಿಲ್ಲ ಎಂದು ಪಟ್ಟು ಹಿಡಿದಳು.

ದಿಕ್ಕು ತೋಚದಂತಾದ ಗಗನಸಖಿ ಕಾಕ್‌ಪಿಟ್‌ಗೆ ತೆರಳಿ ಪೈಲಟ್ ಹಾಗೂ ಕೋ ಪೈಲಟ್‌ಗೆ ಈ ವಿಚಾರವನ್ನು ತಿಳಿಸಿದಳು. ಈ ವೇಳೆಗಾಗಲೇ ಹರ್‌ಪ್ರೀತ್‌ ಕೌರ್‌ ವಿಮಾನದ ಫಸ್ಟ್‌ ಕ್ಲಾಸ್‌ ಸೀಟ್‌ನಲ್ಲಿ ವಿರಾಜಮಾನಳಾಗಿಬಿಟ್ಟಿದ್ಲು. ತಾನು ಕೂರಬೇಕಾದ ಎಕಾನಮಿ ಕ್ಲಾಸ್‌ಗೆ ಹೋಗೋದಿಲ್ಲ ಎಂದು ನಿರ್ಧರಿಸಿಬಿಟ್ಟಿದ್ದಳು.

ಪರಿಸ್ಥಿತಿಯ ತೀವ್ರತೆ ಅರಿತ ಕೋ ಪೈಲಟ್, ಫಸ್ಟ್‌ ಕ್ಲಾಸ್ ವಿಭಾಗಕ್ಕೆ ಹೋಗಿ ಹರ್‌ಪ್ರೀತ್‌ ಕೌರ್‌ ಅವರಿಗೆ ವಿವರಿಸಲು ಯತ್ನಿಸಿದರು. ನೀವು ಹಣ ಪಾವತಿ ಮಾಡಿರೋದು ಎಕಾನಮಿ ವಿಭಾಗಕ್ಕೆ, ಹೀಗಾಗಿ ನೀವು ಫಸ್ಟ್‌ ಕ್ಲಾಸ್‌ನಲ್ಲಿ ಕೂರುವಂತಿಲ್ಲ, ಎಕಾನಮಿ ವಿಭಾಗಕ್ಕೇ ಹೋಗಬೇಕೆಂದು ಪರಿಪರಿಯಾಗಿ ವಿನಂತಿಸಿದರು. ಇಷ್ಟಾದ್ರೂ ಹರ್‌ಪ್ರೀತ್‌ ಪಟ್ಟುಬಿಡಲಿಲ್ಲ. ‘ನಾನು ಸರದಾರಿಣಿ, ನಾನು ಸುಂದರಿ, ನಾನು ಚಂಡೀಗಢಕ್ಕೆ ಹೊರಟಿದ್ದೇನೆ, ನಾನು ಇಲ್ಲೇ ಕೂರೋದು’ ಎಂದು ಅದೇ ಹಳೇ ಡೈಲಾಗನ್ನ ಮತ್ತೆ ಮತ್ತೆ ಉಲಿದಳು!

ತಲೆಕೆಟ್ಟು ಹೋದ ಕೋ ಪೈಲಟ್ ವಾಪಸ್‌ ಹೋಗಿ ಪೈಲಟ್‌ಗೆ ಈ ವಿಚಾರವನ್ನು ತಿಳಿಸಿದರು. ಪೈಲಟ್‌ಗೆ ನಡೆದ ಸಂಗತಿಯನ್ನು ಕೋ ಪೈಲಟ್ ಹಾಗೂ ಗಗನ ಸಖಿ ವಿವರಿಸಿದರು. ಆಗ ಪೈಲಟ್, ಆಕೆ ಸರದಾರಿಣಿಯಾ ಎಂದು ಪ್ರಶ್ನಿಸಿದರು. ಹೌದು ಎಂದಿದ್ದಕ್ಕೆ. ಆಕೆಯನ್ನು ನಾನು ಸಂಭಾಳಿಸುತ್ತೇನೆ. ಏಕೆಂದರೆ, ನಾನು ಸರದಾರಿಣಿಯನ್ನೇ ಮದುವೆ ಆಗಿರೋದು. ಆಕೆಯ ಭಾಷೆ ನನಗೆ ಬರುತ್ತೆ ಎಂದು ಹೇಳಿದರು.

ಹರ್‌ಪ್ರೀತ್ ಕೌರ್‌ ಕುಳಿತಿದ್ದ ಫಸ್ಟ್‌ ಕ್ಲಾಸ್ ಕಂಪಾರ್ಟ್‌ಮೆಂಟ್‌ಗೆ ಹೋದ ಪೈಲಟ್, ಹರ್‌ಪ್ರೀತ್ ಅವರ ಕಿವಿಯಲ್ಲಿ ಅದೇನೋ ಉಸುರಿದರು. ಅಷ್ಟೇ.. ಹರ್‌ಪ್ರೀತ್‌ ಅವರ ಮುಖ ಕಳೆಗಟ್ಟಿತು! ‘ಓ.. ಸಾರಿ’ ಎಂಬ ಉದ್ಘಾರ ಆಕೆಯ ಬಾಯಿಯಿಂದ ಬಂತು..

ಮರು ಮಾತನಾಡದೇ ತಾನು ಕೂರಬೇಕಾದ ಎಕಾನಮಿ ಕ್ಲಾಸ್‌ಗೆ ಸರದಾರಿಣಿ ವಾಪಸ್‌ ಆಗಿಬಿಟ್ಟಳು! ಫಸ್ಟ್‌ ಕ್ಲಾಸ್‌ ಕಂಪಾರ್ಟ್‌ಮೆಂಟ್‌ನಿಂದ ಕೆಲವೇ ಕ್ಷಣದಲ್ಲಿ ಜಾಗ ಖಾಲಿ ಮಾಡಿಬಿಟ್ಟಳು!

ಈ ಬೆಳವಣಿಗೆಯನ್ನು ನೋಡಿ ವಿಮಾನದ ಗಗನಸಖಿ ಹಾಗೂ ಕೋ-ಪೈಲಟ್‌ಗೆ ಭಾರೀ ಅಚ್ಚರಿಯಾಯ್ತು. ಇದೆಲ್ಲಾ ಹೇಗೆ ಸಾಧ್ಯ? ನೀವು ಆಕೆಯ ಕಿವಿಯಲ್ಲಿ ಅದೇನು ಹೇಳಿದಿರಿ? ಒಂಚೂರು ಕಿತಾಪತಿ ಮಾಡದೇ ಆಕೆ ಮನಃಪರಿವರ್ತನೆ ಆಗಿದ್ದು ಹೇಗೆ ಎಂದು ಪೈಲಟ್‌ ಬಳಿ ಕೇಳಿದರು.

ಆಗ ಪೈಲಟ್ ಹೇಳಿದರು. ನಾನು ಆಕೆಗೆ ಏನಂತಾ ಹೇಳಿದೆ ಅಂದ್ರೆ.. ವಿಮಾನದ ಫಸ್ಟ್‌ ಕ್ಲಾಸ್‌ ವಿಭಾಗ ಚಂಡೀಗಢಕ್ಕೆ ಹೋಗೋದಿಲ್ಲ…!