35 ಪರೀಕ್ಷೆಗಳಲ್ಲಿ ಸೋತು, ಯುಪಿಎಸ್ಸಿಯಲ್ಲಿ 104ನೇ Rank ಪಡೆದವನ ಯಶೋಗಾಥೆ

ಸೋಲೇ ಗೆಲುವಿನ ಮೆಟ್ಟಿಲು ಎಂಬ ಮಾತಿದೆ. ಹರಿಯಾಣದ ವಿಜಯ್‌ ವರ್ಧನ್‌ ಯುಪಿಎಸ್‌ಸಿ 2018ರ ನಾಗರಿಕ ಸೇವಾ ಪರೀಕ್ಷೆಯಲ್ಲಿ 104ನೇ ರಾರ‍ಯಂಕ್‌ ಪಡೆಯುವ ಮೊದಲು ವಿವಿಧ ಸ್ಪರ್ಧಾತ್ಮಕ ಪರೀಕ್ಷೆಗಳಲ್ಲಿ ಬರೋಬ್ಬರಿ 35ಕ್ಕೂ ಹೆಚ್ಚು ಬಾರಿ ಫೇಲ್‌ ಆಗಿದ್ದರು ಎಂಬ ಅಚ್ಚರಿಯ ಸುದ್ದಿ ಈಗ ಬಹಿರಂಗಗೊಂಡಿದ್ದು, ಒಂದೆರಡು ಸ್ಪರ್ಧಾತ್ಮಕ ಪರೀಕ್ಷೆಗಳಲ್ಲಿ ವಿಫಲರಾಗಿ ಹಿಂದೆ ಸರಿಯುವವರಿಗೆ ಸ್ಫೂರ್ತಿಯಾಗಿದೆ.

ಹರಿಯಾಣದ ಹಿಸ್ಸಾರ್‌ನಲ್ಲಿ ಎಂಜಿನಿಯರಿಂಗ್‌ ಓದಿದ ಬಳಿಕ ಯುಪಿಎಸ್‌ಸಿ ಪರೀಕ್ಷೆ ಸಿದ್ಧತೆಗೆ ವಿಜಯ್‌ ದಿಲ್ಲಿಗೆ ಬಂದಿದ್ದರು. ಕೇಂದ್ರ ನಾಗರಿಕ ಸೇವಾ ಪರೀಕ್ಷೆಯಲ್ಲಿ ಗೆಲುವು ಪಡೆಯಲು ಸುಮಾರು 6 ವರ್ಷಗಳು ಹಿಡಿದವು. ಈ ಸಮಯದಲ್ಲಿ ಇವರು 35ಕ್ಕೂ ಹೆಚ್ಚು ಸರಕಾರಿ ಸ್ಪರ್ಧಾತ್ಮಕ ಪರೀಕ್ಷೆಗಳನ್ನು ಬರೆದಿದ್ದು, ಸಾಲುಸಾಲು ಸೋಲುಗಳನ್ನು ಕಂಡಿದ್ದಾರೆ.

2014ರಲ್ಲಿ ಯುಪಿಎಸ್‌ಸಿ ಪರೀಕ್ಷೆಯಲ್ಲಿ ಫೇಲ್‌ ಆದರು. 2015ರಲ್ಲಿ ಐಎಎಸ್‌ ಪ್ರಿಲಿಮ್ಸ್‌ ಪಾಸ್‌ ಆಗಿ, ಮೇನ್ಸ್‌ನಲ್ಲಿ ಫೇಲ್‌ ಆದರು. 2016 ಮತ್ತು 2017ರಲ್ಲಿಯೂ ಯುಪಿಎಸ್‌ಸಿ ಪರೀಕ್ಷೆಯಲ್ಲಿ ಅನುತೀರ್ಣರಾದರು. 2018ರಲ್ಲಿ ಪ್ರಿಲಿಮ್ಸ್‌, ಮೇನ್ಸ್‌ ಮತ್ತು ಇಂಟರ್‌ವ್ಯೂನಲ್ಲಿ ಪಾಸ್‌ ಆಗಿ ಯುಪಿಎಸ್‌ಸಿ ನಾಗರಿಕ ಸೇವಾ ಪರೀಕ್ಷೆಯಲ್ಲಿ ಅಗ್ರ 104ನೇ ರಾರ‍ಯಂಕ್‌ ಪಡೆದರು.

ಇವರ ಪ್ರಯತ್ನ ಯುಪಿಎಸ್‌ಸಿ ಸಿವಿಲ್‌ ಸವೀರ್‍ಸ್‌ಗೆ ಸೀಮಿತವಾಗಿರಲಿಲ್ಲ. ವಿವಿಧ ಗ್ರೇಡ್‌-ಎ ಮತ್ತು ಗ್ರೇಡ್‌-ಬಿ ಹುದ್ದೆಗಳಿಗೆ ನಡೆಸುವ ಪರೀಕ್ಷೆಗಳಿಗೂ ಪ್ರಯತ್ನಿಸಿದ್ದರು. ಯುಪಿ ಪಿಸಿಎಸ್‌, ಹರಿಯಾಣ ಪಿಸಿಎಸ್‌, ಪಂಜಾಬ್‌ ಪಿಸಿಎಸ್‌, ಎಸ್‌ಎಸ್‌ಸಿ ಸಿಜಿಎಲ್‌, ಎಲ್‌ಐಸಿ, ನಬಾರ್ಡ್‌, ಇಸ್ರೊ, ಎಕ್ಸೈಸ್‌ ಇನ್‌ಸ್ಪೆಕ್ಟರ್‌, ಆರ್‌ಆರ್‌ಬಿ ಎನ್‌ಟಿಪಿಸಿ, ಆರ್‌ಬಿಐ ಗ್ರೇಡ್‌ ಬಿ... ಹೀಗೆ ವಿವಿಧ ಸ್ಪರ್ಧಾತ್ಮಕ ಪರೀಕ್ಷೆ ಬರೆದರೂ ಆಯ್ಕೆಯಾಗಿರಲಿಲ್ಲ. ಕೊನೆಗೂ ಅವರ ಸತತ ಪ್ರಯತ್ನಕ್ಕೆ ಯಶಸ್ಸು ದೊರಕಿದೆ.