JEE Main 2019 Topper: ಮೈಸೂರಿನ ಕೇಂದ್ರೀಯ ವಿದ್ಯಾಲಯದ ನಾರ್ಮಿನ್‌ ಕೌಸರ್‌ ಟಾಪರ್‌

ಹೊಸದಿಲ್ಲಿ: 2019ರ ಜಾಯಿಂಟ್‌ ಎಂಟ್ರೆನ್ಸ್‌ ಮೇನ್‌ ಪರೀಕ್ಷೆಯಲ್ಲಿ ಕೇಂದ್ರೀಯ ವಿದ್ಯಾಲಯ ಸಂಘಟನ್‌ (ಕೆವಿಎಸ್‌) ವಿದ್ಯಾರ್ಥಿಗಳು ಉತ್ತಮ ಫಲಿತಾಂಶ ಗಳಿಸಿದ್ದು, ಸುಮಾರು 6,094 ವಿದ್ಯಾರ್ಥಿಗಳು ಮೇ 27ರಂದು ನಡೆಯುವ ಜೆಇಇ ಅಡ್ವಾನ್ಸಡ್‌ ಪರೀಕ್ಷೆಗೆ ಅರ್ಹತೆ ಗಿಟ್ಟಿಸಿದ್ದಾರೆ. ಈ ವರ್ಷ ಒಟ್ಟು 21,299 ಕೇಂದ್ರೀಯ ವಿದ್ಯಾಲಯ ವಿದ್ಯಾರ್ಥಿಗಳು ಜೆಇಇ ಮೇನ್ಸ್‌ ಪರೀಕ್ಷೆ ಬರೆದಿದ್ದರು.

ಮೈಸೂರು ಕೇಂದ್ರೀಯ ವಿದ್ಯಾಲಯದ ವಿದ್ಯಾರ್ಥಿ ನಾರ್ಮಿನ್‌ ಕೌಸರ್‌ ಅತಿಹೆಚ್ಚು ಪರ್ಸೆಂಟೈಲ್‌ (99.98) ಗಳಿಸಿದ್ದು , ಸೂರತ್‌ನ ಒಎನ್‌ಜಿಸಿ ಕೇಂದ್ರೀಯ ವಿದ್ಯಾಲಯದ ಅಭಿಜಿತ್‌ ಮಿಶ್ರಾ ಎರಡನೇ ಅತಿಹೆಚ್ಚು ಪರ್ಸೆಂಟೈಲ್‌ (99.95) ಪಡೆದ ವಿದ್ಯಾರ್ಥಿಯಾಗಿದ್ದಾರೆ. ಮುಂಬೈನ ಐಐಟಿ ಪೊವಾಯ್‌ ಕೇಂದ್ರೀಯ ವಿದ್ಯಾಲಯದ ಅದಿತ್‌ ಪ್ರಕಾಶ್‌ ಮೂರನೇ (99.93) ಸ್ಥಾನ ಪಡೆದಿದ್ದಾರೆ.

ಏ. 29ರಂದು ಜೆಇಇ ಮೇನ್ಸ್‌ ಫಲಿತಾಂಶ ಪ್ರಕಟವಾಗಿತ್ತು. ದೇಶಾದ್ಯಂತ ಒಟ್ಟು 1,204 ಕೇಂದ್ರೀಯ ವಿದ್ಯಾಲಯಗಳಿದ್ದು, ತೆಹ್ರಾನ್‌, ಕಾಠ್ಮಂಡು ಮತ್ತು ಮಾಸ್ಕೊ ರಾಯಭಾರ ಕಚೇರಿಯಲ್ಲಿ ಕೂಡ ಕೇಂದ್ರೀಯ ವಿದ್ಯಾಲಯ ಕಾರ್ಯನಿರ್ವಹಿಸುತ್ತಿದೆ. ಸುಮಾರು 12.75 ಲಕ್ಷ ವಿದ್ಯಾರ್ಥಿಗಳು ಶಿಕ್ಷಣ ಪಡೆಯುತ್ತಿದ್ದಾರೆ.