ಸ್ನಾಯು ಕ್ಷಯದಿಂದ ಹಾಸಿಗೆ ಹಿಡಿದವನಿಗೆ ಪಿಯುಸಿಯಲ್ಲಿ 72% ಅಂಕ

ಬೆಂಗಳೂರು: ಆತ ಹಾಸಿಗೆ ಹಿಡಿದಿದ್ದು ಕೈ ಕಾಲನ್ನು ಚಲಿಸಲಾರದ ಸ್ಥಿತಿಯಲ್ಲಿದ್ದಾನೆ. ಆದರೆ ಆತನ ಛಲ, ಆತ್ಮವಿಶ್ವಾಸ ಮತ್ತು ದೃಢ ನಿಶ್ಚಯಕ್ಕೆ ಈ ದಾರುಣ ಸ್ಥಿತಿ ಅಡ್ಡಿಯಾಗಿಲ್ಲ. ಕಳೆದ ತಿಂಗಳು ನಡೆದ ದ್ವಿತೀಯ ಪಿಯುಸಿ ಪರೀಕ್ಷೆಯಲ್ಲಿ, ವಾಣಿಜ್ಯ ವಿಭಾಗದಲ್ಲಾತ 72% ಅಂಕ ಗಳಿಸಿದ್ದಾನೆ.

ಹೌದು ಆನುವಂಶಿಕ ಕಾಯಿಲೆಯಾದ ಸ್ನಾನು ಕ್ಷಯದಿಂದ ಬಳಲುತ್ತಿರುವ ಕನ್ಹಯ್ಯ ಎಂಬ ಬಾಲಕ ಕಳೆದ ಹಲವು ವರ್ಷಗಳಿಂದ ಚಲಿಸಲಾಗದ ಸ್ಥಿತಿಯಲ್ಲಿದ್ದಾನೆ. 7 ವರ್ಷದವನಾಗಿದ್ದಾಗಲೇ ಆತನಿಗೆ ಈ ಕಾಯಿಲೆ ಕಾಣಿಸಿಕೊಂಡಿತ್ತು. ಆದರಾತ ಶಿಕ್ಷಣವನ್ನು ಮುಂದುವರಿಸಲು ಬಯಸಿದ. ಮಲ್ಲೇಶ್ವರಂನ ಬಿಇಎಸ್ ಪಿಯು ಕಾಲೇಜಿನಲ್ಲಾತ ರೆಗ್ಯೂಲರ್ ಸ್ಟುಡೆಂಟ್ ಆಗಿಯೇ ಓದಿದ್ದ.

ಆದರೆ ಆತನ ಸ್ಥಿತಿ ಚಿಂತಾಜನಕವಾಗಿತ್ತು. ಏಳಲಾರದ ಸ್ಥಿತಿಯಲ್ಲಿದ್ದ ಆತ ಪರೀಕ್ಷೆ ಬರೆಯುವುದು ಬೇಡ ಎಂದೇ ನಾನು ಬಯಸಿದ್ದೆ. ವ್ಹೀಲ್ ಚೇರ್‌ನಲ್ಲಿ ಕುಳಿತು ಒಂದು ತರಗತಿಯನ್ನು ಮುಗಿಸಲು ಸಹ ಅವನಿಗೆ ಕಷ್ಟವಾಗುತ್ತಿತ್ತು. ಕಳೆದ ಮೂರು ತಿಂಗಳಿಂದಂತೂ ಅಸಾಧ್ಯವೆನ್ನುವಷ್ಟು ಸಮಸ್ಯೆ ಬಿಗಡಾಯಿಸಿತ್ತು. ಆದರೂ ಓದಬೇಕೆಂಬ ಆತನ ಹಂಬಲಕ್ಕೆತೊಡಕಾಗಬಾರದೆಂದು ನಾನು ಕಾಲೇಜಿಗೆ ಕರೆದೊಯ್ಯುತ್ತಿದ್ದೆ, ಎಂದು ತಾಯಿ ಶ್ರೀ ಲಕ್ಷ್ಮಿ ಹೇಳುತ್ತಾರೆ.


ಪರೀಕ್ಷಾ ಕೊಠಡಿಯಲ್ಲಿ ಸಹ ಆತ ಮಲಗಿಕೊಂಡೇ ಇದ್ದ. ಸಹಾಯಕ ಬರಹಗಾರರು ಉತ್ತರ ಬರೆದರಾದರೂ 100 ಅಂಕಗಳ ಪ್ರಶ್ನೆ ಪತ್ರಿಕೆಯನ್ನು ಸಂಪೂರ್ಣವಾಗಿ ಬರೆಯಲು ಆತನಿಂದಾಗಲಿಲ್ಲ. ಆತ ಬಲ ಕುಸಿಯುತ್ತಲೇ ಇತ್ತು, ಎಂದು ಶ್ರೀಲಕ್ಷ್ಮಿ ಹೇಳಿದ್ದಾರೆ.

ಅಧ್ಯಯನ ಕೂಡ ಆತನಿಗೆ ಅಗ್ನಿಪರೀಕ್ಷೆಯಾಗಿತ್ತು. ಅವನಿಂದ ಕುಳಿತುಕೊಳ್ಳಲು ಸಹ ಸಾಧ್ಯವಾಗುತ್ತಿರಲಿಲ್ಲ. ಆತನ ಬೆಡ್ ಮುಂದೆ ಮೇಜು ಹಾಕಿ, ಅದಕ್ಕೆ ಗ್ಲಾಸ್ ಪರದೆ ಅಳವಡಿಸಿ ಪುಸ್ತಕವನ್ನು ಇಡಲಾಗುತ್ತಿತ್ತು. ಒಂದು ಪುಟ ಓದಿಯಾದ ಮೇಲೆ ಅದನ್ನು ತಿರುಗಿಸಲು ಸಹ ಆತ ನನ್ನನ್ನು ಕರೆಯುತ್ತಿದ್ದ. ತನ್ನ ಹದಗೆಡುತ್ತಿರುವ ಸ್ಥಿತಿಯ ಬಗ್ಗೆ ಆತನಿಗೆ ಅರಿವಿತ್ತು. ಆದರೂ ಆತನ ಮನೋಬಲ ಮಾತ್ರ ಗಟ್ಟಿಯಾಗಿತ್ತು ಎಂದು ಅವರು ಮಗನ ಬಗ್ಗೆ ಹೆಮ್ಮೆಯಿಂದ ನುಡಿಯುತ್ತಾರೆ.

ಆತನ ಸಾಧನೆ ಬಗ್ಗೆ ಹೆಮ್ಮೆಯಾಗುತ್ತಿದೆ. ಮುಂದಕ್ಕೆ ಆತ ಬಿ.ಕಾಂ ಗೆ ಪ್ರವೇಶ ಪಡೆಯಲಿದ್ದಾನೆ ಎಂದು, ಕಾಲೇಜಿನ ಪ್ರಾಚಾರ್ಯರಾದ ರಮೇಶ್ ಕೆ ಹೇಳಿದ್ದಾರೆ.