ತನಗಿಷ್ಟ‌ವಾದುದನ್ನು ಓದಲು ಬಿಡುತ್ತಿಲ್ಲವೆಂದು ಅಪ್ಪನ ವಿರುದ್ಧ ಮಗಳ ಕಾನೂನು ಹೋರಾಟ

ಚೆನ್ನೈ: ತನಗಿಷ್ಟವಾದ ಕೋರ್ಸ್‌ನ್ನು ಓದಲು ಅವಕಾಶ ನೀಡದ ತಂದೆ ವಿರುದ್ಧ ಚೆನ್ನೈನ ಯುವತಿಯೊಬ್ಬಳು ಮಕ್ಕಳ ಸಹಾಯವಾಣಿಯಲ್ಲಿ ದೂರು ದಾಖಲಿಸಿದ್ದಾಳೆ. ಸಮಸ್ಯೆಯನ್ನು ಬಗೆಹರಿಸುವಲ್ಲಿ ಚೆನ್ನೈ ಪೊಲೀಸರು ಯಶ ಕಂಡಿದ್ದು ಪ್ರಕರಣ ಸುಖಾಂತ್ಯವಾಗಿದೆ.

ಯುವತಿ ಚೆನ್ನೆ ನಿವಾಸಿಯಾಗಿರುವ 17 ವರ್ಷದ ಯುವತಿ ಇತ್ತೀಚಿಗೆ ದ್ವಿತೀಯ ಪಿಯುಸಿ ಮುಗಿಸಿದ್ದಾಳೆ.ಆಕೆಗೆ ಕಾನೂನು ಅಥವಾ ಪತ್ರಿಕೋದ್ಯಮ ಓದಬೇಕೆಂಬ ಮಹಾದಾಸೆ. ಆದರೆ ತಂದೆ ಬಿಎಸ್ಸಿ - ರಸಾಯನಶಾಸ್ತ್ರ ಓದಿ ಶಿಕ್ಷಕಿಯಾಗು ಎನ್ನುತ್ತಿದ್ದರು. ಕಾಲೇಜಿಗೆ ಅರ್ಜಿ ಸಲ್ಲಿಸೋಣವೆಂದರೆ ಹಠ ಬಿಡದ ತಂದೆ ಅಂಕಪಟ್ಟಿ ಮತ್ತು ಇತರ ಶೈಕ್ಷಣಿಕ ದಾಖಲೆಗಳನ್ನು ಕೊಡದೆ ಸತಾಯಿಸುತ್ತಿದ್ದರು. ಮಂಗಳವಾರ ಪುಸ್ತಕದ ಹಿಂದಿದ್ದ ಮಕ್ಕಳ ಸಹಾಯವಾಣಿ ಸಂಖ್ಯೆಯನ್ನು ನೋಡಿದ ಆಕೆ ಫೋನ್ ಕರೆ ಮಾಡಿ ಸಹಾಯ ಯಾಚಾಯಿಸಿದ್ದಳು. ಮಕ್ಕಳ ಸಹಾಯವಾಣಿ ಅಧಿಕಾರಿಗಳು ಸ್ಥಳೀಯ ಪೊಲೀಸರಲ್ಲಿ ಈ ಬಗ್ಗೆ ಪರಿಶೀಲಿಸುವಂತೆ ಸೂಚಿಸಿದ್ದರು.

ಪ್ರತಿಭಾವಂತ ಯುವತಿ 10 ನೇ ತರಗತಿಯಲ್ಲಿ ಆಕೆಯ ಓದಿದ ಶಾಲೆಯ ಟಾಪರ್‌ಗಳಲ್ಲಿ ಒಬ್ಬಳಾಗಿದ್ದಳು. ಆದರೆ ದ್ವಿತೀಯ ಪಿಯುಸಿ ಪರೀಕ್ಷೆಯ ಸಂದರ್ಭದಲ್ಲಿ ಆಕೆಯ ತಂದೆ- ತಾಯಿಯ ನಡುವಿನ ಕಲಹ ಆಕೆ 65%ವಷ್ಟೇ ಅಂಕ ಪಡೆಯಲು ಕಾರಣವಾಯಿತು.

ಪತ್ನಿ ಜತೆ ಮುನಿಸಿಕೊಂಡಿದ್ದರೂ ಮಗಳ ವಿದ್ಯಾಭ್ಯಾಸದ ಬಗ್ಗೆ ತೀವ್ರ ತಲೆಕೆಡಿಸಿಕೊಂಡಿದ್ದ ತಂದೆಯಲ್ಲಿ ಆಕೆ ತನ್ನ ಕನಸಿನ ಬಗ್ಗೆ ಹೇಳಿಕೊಂಡಿದ್ದಳು. ಆದರೆ ವಿರೋಧಿಸಿದ ಅಪ್ಪ ವಿಜ್ಞಾನ ವಿಭಾಗದಲ್ಲಿ ಮುಂದುವರಿ. ಉತ್ತಮ ಭವಿಷ್ಯವಿರುವುದು ಅದರಲ್ಲೇ ಎಂದಿದ್ದಾರೆ ಮತ್ತು ಮಗಳು ತನ್ನ ಮಾತು ಮೀರಿ ತನಗಿಷ್ಟವಾದ ಕೋರ್ಸ್‌ಗೆ ಪ್ರವೇಶಾತಿ ಪಡೆಯಬಹುದೆಂಬ ಭೀತಿಯಲ್ಲಿ ಆಕೆಯ ಶಾಲಾ ಪ್ರಮಾಣಪತ್ರ, ಅಂಕಪಟ್ಟಿಗಳನ್ನೆಲ್ಲ ಬಚ್ಚಿಟ್ಟಿದ್ದರು.

ಮತ್ತೀಗ ಆಕೆಯ ಸ್ನೇಹಿತೆಯರೆಲ್ಲ ಕಾಲೇಜು ಪ್ರವೇಶಾತಿ ಪಡೆಯುತ್ತಿದ್ದು, ನಾನೇನು ಮಾಡುವುದು ತಿಳಿಯುತ್ತಿಲ್ಲ ಎಂದಾಕೆ ದೂರಿದ್ದಳು.

ತಂದೆ- ಮಗಳ ಜತೆ ನಾವು ಮಾತನಾಡಿದ್ದು, ಸಮಸ್ಯೆಯನ್ನು ಬಗೆಹರಿಸಲಾಗಿದೆ. ಆಕೆಗೆ ಅಂಕಪಟ್ಟಿ ಕೊಡಲು ಅವರು ಒಪ್ಪಿದ್ದಾರೆ ಎಂದು ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ.