ಪರೀಕ್ಷೆ ಚೆನ್ನಾಗಿ ಬರೆಯಲು ಸಾಮಾಜಿಕ ಜಾಲತಾಣದಿಂದ ದೂರ ಉಳಿಯುವ ಅಗತ್ಯವಿಲ್ಲ: ಕ್ಲ್ಯಾಟ್‌ ರಾಜ್ಯ ಟಾಪರ್

ಬೆಂಗಳೂರು: ಕಾನೂನು ಸಾಮಾನ್ಯ ಪ್ರವೇಶ ಪರೀಕ್ಷೆ (ಕ್ಲ್ಯಾಟ್‌) 2019 ಪರೀಕ್ಷೆಯ ರಾಜ್ಯದ ಟಾಪರ್ ಆಗಿ ಲಹರ್‌ ಜೈನ್‌ ಹೊರಹೊಮ್ಮಿದ್ದಾಳೆ. ಆಲ್‌ ಇಂಡಿಯಾ ರ‍್ಯಾಂಕಿಂಗ್‌ನಲ್ಲೂ ಬೆಂಗಳೂರಿನ ಮೌಂಟ್‌ ಕಾರ್ಮೆಲ್‌ ಕಾಲೇಜು ವಿದ್ಯಾರ್ಥಿ 11ನೇ ಸ್ಥಾನ ಪಡೆದುಕೊಂಡಿದ್ದಾಳೆ.

200 ಅಂಕಗಳ ಪ್ರಶ್ನೆ ಪತ್ರಿಕೆಯಲ್ಲಿ ಈ ವರ್ಷ ಒಂದು ಪ್ರಶ್ನೆಯನ್ನು ರದ್ದುಗೊಳಿಸಿದ ಕಾರಣ ಒಂದು ಅಂಕ ಕಡಿತಗೊಳಿಸಲಾಗಿದೆ. ಈ ಹಿನ್ನೆಲೆ 199 ಅಂಕಗಳ ಪೈಕಿ ಲಹರ್ 171.75 ಅಂಕಗಳನ್ನು ಪಡೆದುಕೊಂಡಿದ್ದಾಳೆ. ಬೆಂಗಳೂರಿನ ನ್ಯಾಷನಲ್ ಲಾ ಸ್ಕೂಲ್ ಆಫ್ ಇಂಡಿಯಾ ವಿಶ್ವವಿದ್ಯಾಲಯದ ತಾತ್ಕಾಲಿಕ ಪಟ್ಟಿಯಲ್ಲಿ ಲಹರ್ ಸ್ಥಾನ ಪಡೆದುಕೊಂಡಿದ್ದಾಳೆ.

''ನನಗೆ ಮೊದಲಿನಿಂದಲೂ ಕಾನೂನಿನ ಅಧ್ಯಯನದ ಬಗ್ಗೆ ಒಲವಿದೆ. ನ್ಯಾಯ, ಸಮಾನತೆ ಮತ್ತು ಕಾನೂನಿನ ಪರಿಕಲ್ಪನೆ ನನಗೆ ಇಷ್ಟ'' ಎಂದು ದ್ವಿತೀಯ ಪಿಯುಸಿ ವಾಣಿಜ್ಯ ವಿಭಾಗದಲ್ಲಿ ಶೇ. 98ರಷ್ಟು ಅಂಕಗಳನ್ನು ಪಡೆದುಕೊಂಡಿರುವ ಲಹರ್ ಹೇಳಿಕೊಂಡಿದ್ದಾಳೆ.

ಕಳೆದ ವರ್ಷದ ಜೂನ್‌ನಿಂದಲೇ ಕ್ಲ್ಯಾಟ್‌ ಪರೀಕ್ಷೆಗೆ ತಯಾರಿ ಆರಂಭಿಸಿದ್ದ ಲಹರ್‌ಗೆ ತನ್ನ ಕುಟುಂಬದ ಬೆಂಬಲ ಇತ್ತು ಎಂದು ಹೇಳಿಕೊಳ್ಳುವುದನ್ನು ಮರೆಯಲಿಲ್ಲ. ಜತೆಗೆ, ''ಬೆಂಗಳೂರಿನ ಮಲ್ಲೇಶ್ವರಂನ ಕೆರಿಯರ್ ಲಾಂಚರ್‌ ಸಹ ತನ್ನ ಪರೀಕ್ಷೆ ಅಧ್ಯಯನಕ್ಕೆ ಸಹಕಾರಿಯಾಗಿದೆ. ಅಣಕು ಪರೀಕ್ಷೆಗಳನ್ನು ಬರೆಯುವುದು, ಪ್ರತಿನಿತ್ಯ ಓದಿದ್ದು ಸಹಾಯಕವಾಗಿದೆ'' ಎಂದೂ ರಾಜ್ಯದ ಟಾಪರ್ ಆಗಿರುವ ಲಹರ್ ಹೇಳಿಕೊಂಡಿದ್ದಾಳೆ.

ಲಹರ್ ತಂದೆ ಸುನಿಲ್ ಸಿಂಘಿ ಉದ್ಯಮಿಯಾಗಿದ್ದು, ತಾಯಿ ಅಮಿತಾ ಜೈನ್‌ ಗೃಹಿಣಿಯಾಗಿದ್ದಾರೆ. ಓದುವ ಹವ್ಯಾಸವಿಟ್ಟುಕೊಂಡಿರುವ ಲಹರ್‌ಗೆ ಸ್ಕೆಚಿಂಗ್‌ ಅಂದರೆ ಇಷ್ಟ. ಜತೆಗೆ, ಕಾಲೇಜಿನಲ್ಲಿ ಚರ್ಚೆ, ಸಾರ್ವಜನಿಕ ಭಾಷಣದಲ್ಲಿ ಭಾಗವಹಿಸುವುದನ್ನು ಸಹ ಇಷ್ಟಪಡುತ್ತಾಳೆ. ಅಲ್ಲದೆ, ಪರೀಕ್ಷೆ ಚೆನ್ನಾಗಿ ಬರೆಯಲು ಸಾಮಾಜಿಕ ಜಾಲತಾಣಗಳಿಂದ ಕಣ್ಮರೆಯಾಗುವ ಅಗತ್ಯವಿಲ್ಲ ಎಂದೂ ಲಹರ್ ಹೇಳಿದ್ದಾಳೆ.

ಪ್ರತಿನಿತ್ಯ ಒಂದು ಗಂಟೆ ಸಾಮಾಜಿಕ ಜಾಲತಾಣಕ್ಕೆಂದೇ ಮೀಸಲಿಡುತ್ತಿದ್ದೆ. ಆದರೆ, ಒಂದು ಗಂಟೆಗೂ ಹೆಚ್ಚು ಕಾಲ ಸಮಯ ಕಳೆಯದಂತೆ ಮಾಡಲು ಆ್ಯಪ್‌ಗಳನ್ನು ಡೌನ್ಲೋಡ್‌ ಮಾಡಿಕೊಂಡಿದ್ದೆ. ಅಲ್ಲದೆ, ಪರೀಕ್ಷೆಗೂ ಮೂರು ತಿಂಗಳು ಮುನ್ನ ಸಾಮಾಜಿಕ ಜಾಲತಾಣಗಳಿಂದ ದೂರ ಉಳಿದಿದ್ದೆ ಎಂದೂ ರಾಜ್ಯದ ಟಾಪರ್ ಹಾಗೂ ಬೆಂಗಳೂರಿನ ಲಹರ್ ಜೈನ್‌ ಹೇಳಿಕೊಂಡಿದ್ದಾಳೆ.