ಆಗಸ್ಟ್‌ನಿಂದ ಟೋಫೆಲ್‌ ಪರೀಕ್ಷಾ ಮಾದರಿ ಬದಲಾವಣೆ: ಏನೇನು ಬದಲಾಗಲಿದೆ ಗೊತ್ತಾ?

ಹೊಸದಿಲ್ಲಿ: ವಿದೇಶಿ ಭಾಷೆಯಾಗಿ ಇಂಗ್ಲಿಷ್ ಪರೀಕ್ಷೆ ( ಟೋಫೆಲ್‌) ಪರೀಕ್ಷಾ ಮಾದರಿಯಲ್ಲಿ ಅನೇಕ ಬದಲಾವಣೆಗಳಾಗಲಿವೆ. ಆಗಸ್ಟ್‌ 2019ರಿಂದ ಈ ಬದಲಾವಣೆಗಳನ್ನು ಕಾಣಬಹುದಾಗಿದೆ.

ಆಗಸ್ಟ್‌ ತಿಂಗಳಿನಿಂದ ಪರೀಕ್ಷೆಯ ಅವಧಿ ಕಡಿತಗೊಳ್ಳಲಿದ್ದು, ಜತೆಗೆ ಅಭ್ಯರ್ಥಿಗಳು ಒಂದಕ್ಕಿಂತ ಅಧಿಕ ಬಾರಿ ಟೆಸ್ಟ್‌ ತೆಗೆದುಕೊಂಡಿದ್ದರೆ ಅಭ್ಯರ್ಥಿ ಗಳಿಸಿರುವ ಉತ್ತಮ ಅಂಕಗಳನ್ನು ಗಣನೆಗೆ ತೆಗೆದುಕೊಳ್ಳಲಾಗುತ್ತದೆ. ಜಾಗತಿಕ ಟೋಫೆಲ್‌ ಹಾಗೂ ಜಿಆರ್‌ಇ ಪರೀಕ್ಷೆಗಳನ್ನು ನಡೆಸುವ ಶೈಕ್ಷಣಿಕ ಪರೀಕ್ಷಾ ಸೇವೆಗಳು (ಇಟಿಎಸ್‌) ಶೈಕ್ಷಣಿಕ ಸಂಸ್ಥೆಗಳ ಬೇಡಿಕೆಗೆ ತಕ್ಕಂತೆ ಟೋಫೆಲ್‌ ಪರೀಕ್ಷೆಯಲ್ಲಿ ಬದಲಾವಣೆಗಳನ್ನು ಮಾಡಲು ತಯಾರಾಗುತ್ತಿದೆ. ಈ ಸಂಬಂಧ ಟೋಫೆಲ್‌ ಪ್ರೋಗ್ರಾಮ್‌ನ ಕಾರ್ಯನಿರ್ವಾಹಕ ನಿರ್ದೇಶಕ ಮಾಹಿತಿ ನೀಡಿದ್ದಾರೆ.

ಟೆಸ್ಟ್ ಅವಧಿ ಅರ್ಧ ಗಂಟೆ ಕಡಿತಗೊಳ್ಳಲಿದ್ದು, ಓದುವುದು, ಕೇಳುವುದು ಮತ್ತು ಮಾತನಾಡುವ ವಿಭಾಗಗಳಲ್ಲಿ ಪ್ರಶ್ನೆಗಳ ಸಂಖ್ಯೆಯೂ ಕಡಿತಗೊಳ್ಳಲಿದೆ ಎಂದು ತಿಳಿದುಬಂದಿದೆ. ಆಗಸ್ಟ್‌ 1 ರಿಂದಲೇ ಈ ಬದಲಾವಣೆಗಳಾಗಲಿದ್ದು, ಸದ್ಯ ಟೋಫೆಲ್‌ ಪರೀಕ್ಷೆಗೆ ಮೂರೂವರೆ ಗಂಟೆ ಸಮಯ ನಿಗದಿಪಡಿಸಲಾಗಿದೆ.

ಟೋಫೆಲ್ - ಇಂಗ್ಲಿಷ್ ಭಾಷೆಯ ಜಾಗತಿಕ ಪರೀಕ್ಷೆಯಾಗಿದ್ದು ಇದನ್ನು ವಿಶ್ವದಾದ್ಯಂತ 150ಕ್ಕೂ ಅಧಿಕ ದೇಶಗಳಲ್ಲಿ ಹಾಗೂ 10 ಸಾವಿರಕ್ಕೂ ಅಧಿಕ ಶೈಕ್ಷಣಿಕ ಸಂಸ್ಥೆಗಳಲ್ಲಿ ಈ ಪರೀಕ್ಷೆಯಲ್ಲಿ ಪಡೆದ ಅಂಕಗಳನ್ನು ಪರಿಗಣಿಸಲಾಗುತ್ತದೆ. ಅಮೆರಿಕ, ಕೆನಡಾ, ಆಸ್ಟ್ರೇಲಿಯಾ, ನ್ಯೂಜಿಲೆಂಡ್ ಹಾಗೂ ಯುಕೆಯ ಶೇ. 98ಕ್ಕೂ ಅಧಿಕ ಸಂಸ್ಥೆಗಳಲ್ಲಿ ಇದನ್ನು ಒಪ್ಪಿಕೊಳ್ಳಲಾಗುತ್ತದೆ.