ಜೂನ್ 2 ರಂದು ಜಿಪ್‌ಮರ್ ಎಂಬಿಬಿಎಸ್‌ ಪ್ರವೇಶ ಪರೀಕ್ಷೆ: ಇಲ್ಲಿದೆ ವಿವರ

ಪುದುಚೆರ್ರಿ: ಜವಹರಲಾಲ್ ಸ್ನಾತಕೋತ್ತರ ವೈದ್ಯಕೀಯ ಶಿಕ್ಷಣ ಮತ್ತು ಸಂಶೋಧನೆ ಸಂಸ್ಥೆ ಜೂನ್ 2ರಂದು ಸಾಮಾನ್ಯ ಆನ್‌ಲೈನ್‌ ಪ್ರವೇಶ ಪರೀಕ್ಷೆಯನ್ನು ನಡೆಸಲಿದೆ. 2019 ರ ಶೈಕ್ಷಣಿಕ ವರ್ಷದ ಎಂಬಿಬಿಎಸ್‌ ಪ್ರವೇಶಕ್ಕೆ ಪ್ರವೇಶಾತಿ ಪರೀಕ್ಷೆ ನಡೆಯಲಿದೆ.

ದೇಶದ 25 ರಾಜ್ಯಗಳ 280 ಪರೀಕ್ಷಾ ಕೇಂದ್ರಗಳಲ್ಲಿ ಎರಡು ಶಿಫ್ಟ್‌ಗಳಲ್ಲಿ ಪರೀಕ್ಷೆ ನಡೆಯಲಿದೆ. ಬೆಳಗ್ಗೆ 10 ಗಂಟೆಯಿಂದ ಮಧ್ಯಾಹ್ನ 12.30ರವರೆಗೆ ಒಂದು ಶಿಫ್ಟ್ ಹಾಗೂ ಮಧ್ಯಾಹ್ನ 3ರಿಂದ ಸಂಜೆ 5.30 ರವರೆಗೆ ಸಂಜೆಯ ಶಿಫ್ಟ್ ನಡೆಯಲಿದೆ.

ಜಿಪ್‌ಮರ್‌ ಪುದುಚೆರ್ರಿ ಕ್ಯಾಂಪಸ್‌ನಲ್ಲಿ 150 ಸೀಟುಗಳು ಹಾಗೂ ಕಾರೈಕಲ್ ಕ್ಯಾಂಪಸ್‌ನಲ್ಲಿ 50 ಸೀಟುಗಳು ಲಭ್ಯವಿದೆ. ಪ್ರವೇಶ ಪರೀಕ್ಷೆಗೆ 1 ಲಕ್ಷ 84 ಸಾವಿರ 272 ಅಭ್ಯರ್ಥಿಗಳು ಅರ್ಜಿ ಸಲ್ಲಿಸಿದ್ದಾರೆ. ದಕ್ಷಿಣ ವಲಯದಲ್ಲಿ 156 ಪರೀಕ್ಷಾ ಕೇಂದ್ರಗಳು, ಉತ್ತರದಲ್ಲಿ 63, ಪೂರ್ವದಲ್ಲಿ 34 ಹಾಗೂ ಪಶ್ಚಿಮ ವಲಯದಲ್ಲಿ 27 ಪರೀಕ್ಷಾ ಕೇಂದ್ರಗಳಿವೆ.

ಪರೀಕ್ಷಾ ಕೇಂದ್ರವನ್ನು ಪರೀಕ್ಷೆ ನಡೆಯುವ ಒಂದು ದಿನ ಮೊದಲೇ ಒಮ್ಮೆ ಭೇಟಿ ಕೊಡುವಂತೆಯೂ ಅಭ್ಯರ್ಥಿಗಳು ಹಾಗೂ ಪೋಷಕರಿಗೆ ಸಂಸ್ಥೆ ಸಲಹೆ ನೀಡಿದೆ. ಆದರೆ, ಪರೀಕ್ಷಾ ಕೇಂದ್ರದೊಳಗೆ ಪೋಷಕರಿಗೆ ಪ್ರವೇಶವಿಲ್ಲ.

ಹೆಚ್ಚುವರಿ ಮಾಹಿತಿಗಾಗಿ ಅಭ್ಯರ್ಥಿಗಳು ಜಿಪ್‌ಮರ್ ಸಂಸ್ಥೆಯ ಅಧಿಕೃತ ವೆಬ್‌ಸೈಟ್ www.jipmer.edu.in ಗೆ ಭೇಟಿ ಕೊಡಿ