ವಿದ್ಯಾಲಕ್ಷ್ಮೀ ಶೈಕ್ಷಣಿಕ ಸಾಲಕ್ಕಾಗಿ ಅರ್ಜಿ ಸಲ್ಲಿಸುವುದು ಹೇಗೆ? ಕಂಪ್ಲೀಟ್‌ ಡೀಟೇಲ್ಸ್ ಇಲ್ಲಿದೆ..
How to apply for Vidya Lakshmi Education Loan: ಎಜುಕೇಷನ್‌ಗಾಗಿ ಸಾಲ ಪಡೆಯುವುದು ಅಸಂಖ್ಯಾತ ಬಡ ಕುಟುಂಬದ ಮಕ್ಕಳ ಕನಸನ್ನು ನನಸು ಮಾಡುತ್ತದೆ. ಆದರೆ ಶೈಕ್ಷಣಿಕ ಸಾಲ ಪಡೆಯುವುದು ಹೇಗೆ, ಎಲ್ಲಿ ಪಡೆಯುವುದು ಎಂಬ ಅರಿವೇ ಬಹುಸಂಖ್ಯಾತ ಪೋಷಕರಿಗೂ ಇಲ್ಲ. ಆದ್ದರಿಂದ ಈ ಬಗ್ಗೆ ಮಾಹಿತಿ ಇಲ್ಲಿ ನೀಡಿದ್ದೇವೆ.
ವಿದ್ಯಾಲಕ್ಷ್ಮೀ ಪೋರ್ಟಲ್- ಯಾವುದೇ ಬ್ಯಾಂಕ್‌ನಲ್ಲಿ ಶೈಕ್ಷಣಿಕ ಸಾಲಕ್ಕಾಗಿ ಒಂದೇ ಸೂರು
ವಿದ್ಯಾಲಕ್ಷ್ಮೀ ಶೈಕ್ಷಣಿಕ ಸಾಲ ಒದಗಿಸಲು ಇರುವ, ಭಾರತ ಸರ್ಕಾರ ಲಾಂಚ್‌ ಮಾಡಲಾಗಿರುವ ಪೋರ್ಟಲ್. ಎಜುಕೇಷನ್ ಲೋನ್‌ ಬಗ್ಗೆ ಸಂಪೂರ್ಣ ಮಾಹಿತಿಯನ್ನು ತಿಳಿಯಲು ಇರುವ ಒಂದೇ ಒಂದು ಪೋರ್ಟಲ್ ಇದಾಗಿದೆ. ಭಾರತದ ಬ್ಯಾಂಕ್‌ಗಳ ಒಕ್ಕೂಟದ ನಿಯಮಗಳನ್ನು ಅನುಸರಿಸುತ್ತಿದೆ. ಈ ಪೋರ್ಟಲ್ ಉನ್ನತ ಶಿಕ್ಷಣ ಸಚಿವಾಲಯ, ಹಣಕಾಸು ಸೇವಾ ಇಲಾಖೆ ಅಧೀನದಲ್ಲಿ ಕಾರ್ಯನಿರ್ವಹಿಸುತ್ತಿದೆ.
34 ಬ್ಯಾಂಕ್‌ಗಳಲ್ಲಿ ಶೈಕ್ಷಣಿಕ ಸಾಲಕ್ಕಾಗಿ ವಿದ್ಯಾಲಕ್ಷ್ಮೀ ಪೋರ್ಟಲ್
ವಿದ್ಯಾಲಕ್ಷ್ಮೀ ಪೋರ್ಟಲ್ ಅಧೀನದಲ್ಲಿ 34 ಬ್ಯಾಂಕ್‌ಗಳು ನೀಡುವ ವಿವಿಧ ರೀತಿಯ ವಿದ್ಯಾರ್ಥಿವೇತನ, ಶೈಕ್ಷಣಿಕ ಸಾಲದ ಯೋಜನೆಗಳ ಪಟ್ಟಿಯನ್ನು ನೋಡಬಹುದು. ದೂರದ ಪ್ರದೇಶಗಳಲ್ಲಿಯ, ಬಡಕುಟಂಬಕ್ಕೆ ಸೇರಿದ ಮಕ್ಕಳು ಉನ್ನತ ಶಿಕ್ಷಣಕ್ಕಾಗಿ ಸಹಾಯ ಹಸ್ತ ಬಯಸುವವರಿಗೆ ವಿದ್ಯಾಲಕ್ಷ್ಮೀ ವೆಬ್‌, 'ವಿದ್ಯಾಸಾರಥಿ' ವಿದ್ಯಾರ್ಥಿವೇತನದ ಮೂಲಕ ಸಹಾಯ ನೀಡುತ್ತದೆ.
ಈ ಪೋರ್ಟಲ್‌ನಲ್ಲಿ ಕೇವಲ ಒಂದು ಬ್ಯಾಂಕ್‌ಗೆ ಮಾತ್ರವಲ್ಲದೇ ಹಲವು ಬ್ಯಾಂಕ್‌ಗಳಿಗೆ ಒಂದೇ ಅಪ್ಲಿಕೇಶನ್‌ ಫಾರ್ಮ್‌ನಲ್ಲಿ ಶೈಕ್ಷಣಿಕ ಸಾಲಕ್ಕೆ ಅರ್ಜಿ ಸಲ್ಲಿಸಲು ಅವಕಾಶ ನೀಡುತ್ತದೆ.
Vidya Lakshmi ಪೋರ್ಟಲ್ ಮೂಲಕ ಆನ್‌ಲೈನ್‌ ಅರ್ಜಿ ಸಲ್ಲಿಕೆ ಹೇಗೆ ಎಂದು ಹಂತ ಹಂತವಾಗಿ ಈ ಕೆಳಗಿನಂತೆ ತಿಳಿಯಿರಿ.
ಹಂತ 1: ರಿಜಿಸ್ಟ್ರೇಷನ್
ವಿದ್ಯಾರ್ಥಿಗಳು ಮೊದಲಿಗೆ ವಿದ್ಯಾಲಕ್ಷ್ಮೀ ಅಧಿಕೃತ ಪೋರ್ಟಲ್ www.vidyalakshmi.co.in ಗೆ ಭೇಟಿ ನೀಡಿ ಬೇಸಿಕ್ ಮಾಹಿತಿಗಳನ್ನು ನೀಡಿ ರಿಜಿಸ್ಟ್ರೇಷನ್ ಆಗಬೇಕು.
ರಿಜಿಸ್ಟರ್ ಆಗಲು ಹೆಸರು, ಮೊಬೈಲ್‌ ಸಂಖ್ಯೆ, ಇ-ಮೇಲ್ ವಿಳಾಸ, ಪಾಸ್‌ವರ್ಡ್‌ (ಲಾಗಿನ್‌ ಆಗಲು) ನೀಡಿ ರಿಜಿಸ್ಟರ್ ಆಗಬೇಕು. ವಿದ್ಯಾರ್ಥಿಗಳು ಮಾತ್ರವಲ್ಲದೇ ಪೋಷಕರು ಸಹ ರಿಜಿಸ್ಟ್ರೇಷನ್ ಮಾಡಬಹುದು.
ಹಂತ 2: ಲಾಗಿನ್‌ ಆಗಿ
Vidya Lakshmi ಪೋರ್ಟಲ್‌ನಲ್ಲಿ ರಿಜಿಸ್ಟರ್ ಮಾಡಿದ ನಂತರ, ರಿಜಿಸ್ಟರ್ ವೇಳೆ ನೀಡಿದ ಇ-ಮೇಲ್ ವಿಳಾಸ ಮತ್ತು ಪಾಸ್‌ವರ್ಡ್‌ ಮಾಹಿತಿ ನೀಡಿ ಲಾಗಿನ್‌ ಆಗಿ.
ಹಂತ 3: ಅರ್ಜಿ ಭರ್ತಿ ಮಾಡಿ
ಒಮ್ಮೆ ಲಾಗಿನ್‌ ಡೀಟೇಲ್ಸ್ ಮೂಲಕ ವಿದ್ಯಾಲಕ್ಷ್ಮೀ ಪೋರ್ಟಲ್ ಗೆ ಭೇಟಿ ನೀಡಿದ ನಂತರ ಆನ್‌ಲೈನ್‌ ಅಪ್ಲಿಕೇಶನ್‌ ಫಾರ್ಮ್‌ನಲ್ಲಿ ಕೇಳಲಾದ ಎಲ್ಲಾ ಅಗತ್ಯ ಮಾಹಿತಿಗಳನ್ನು ಟೈಪಿಸಿ. ಈ ಸಾಮಾನ್ಯ ಶೈಕ್ಷಣಿಕ ಸಾಲ ಅರ್ಜಿಯನ್ನು ಒಮ್ಮೆ ಫಿಲ್‌ ಮಾಡಿದ ನಂತರ, ವಿವಿಧ ಎಜುಕೇಷನ್ ಲೋನ್‌ ಸ್ಕೀಮ್‌ಗಳಿಗೆ ಅಥವಾ ಬ್ಯಾಂಕ್‌ಗಳಿಗೆ ಒಮ್ಮೆಯೇ ಅರ್ಜಿ ಸಲ್ಲಿಸಬಹುದು.
ಹಂತ 4: ಅರ್ಜಿ ಸಲ್ಲಿಸಿ
ಅಗತ್ಯ ಮಾಹಿತಿಗಳನ್ನು ಭರ್ತಿ ಮಾಡಿದ ನಂತರ ನಿಮಗೆ ಬೇಕಾದ ಮತ್ತು ಲಭ್ಯವಿರುವ ಶೈಕ್ಷಣಿಕ ಸಾಲಗಳ ಯೋಜನೆಗಳನ್ನು ತಿಳಿಯಬಹುದು. ಹಾಗೂ ಯಾವ ಬ್ಯಾಂಕ್‌ಗಳಲ್ಲಿ, ಯಾವ ರೀತಿಯ ಎಜುಕೇಷನ್ ಲೋನ್‌ ಸೇವೆಗಳಿವೆ ಎಂಬ ಪಟ್ಟಿ ನೀಡಲಾಗಿರುತ್ತದೆ. ಆ ಮಾಹಿತಿಗಳನ್ನು ತಿಳಿಯಬಹುದು. ಆಯಾ ಬ್ಯಾಂಕ್‌ ಮತ್ತು ಯೋಜನೆಗಳ ಮುಂದೆಯೇ 'Apply' ಆಯ್ಕೆ ನೀಡಲಾಗಿರುತ್ತದೆ. ಅದರ ಮೇಲೆ ಕ್ಲಿಕ್ ಮಾಡಿ ಅರ್ಜಿ ಸಲ್ಲಿಸಬಹುದು.
ಅಪ್ಲೋಡ್ ಮಾಡಬೇಕಾದ ದಾಖಲೆಗಳು
ಈ ಕೆಳಗಿನ ದಾಖಲೆಗಳ ಸ್ಕ್ಯಾನ್‌ ಕಾಪಿಗಳನ್ನು ಅಪ್ಲೋಡ್ ಮಾಡಬೇಕು.
- ಹಿಂದಿನ ಶೈಕ್ಷಣಿಕ ಅರ್ಹತೆಯ ಅಂಕಪಟ್ಟಿ
- ಪ್ರಸ್ತುತ ಕೋರ್ಸ್‌ಗೆ ಪ್ರವೇಶಾತಿ ಪಡೆದಿರುವ ಬಗ್ಗೆ ಆಧಾರ
- ಆದಾಯ ಪ್ರಮಾಣ ಪತ್ರ
- ಶಿಕ್ಷಣ ಸಂಸ್ಥೆಯಿಂದ ನೀಡಲಾದ ವೆಚ್ಚಗಳ ಪಟ್ಟಿ
- Form 16
- ಐಟಿ ರಿಟರ್ನ್ಸ್‌ (ಇದ್ದಲ್ಲಿ)
- ಅಭ್ಯರ್ಥಿಯ ಭಾವಚಿತ್ರ
- ಫೋಷಕರ ಭಾವಚಿತ್ರ
- ಆಧಾರ್ ಕಾರ್ಡ್
ಬ್ಯಾಂಕ್‌ ಆಯ್ಕೆ ಮತ್ತು ವಿದ್ಯಾರ್ಥಿಯ ಮಾಹಿತಿ
ವಿದ್ಯಾರ್ಥಿಯು ತಾನು ಯಾವ ಕೋರ್ಸ್‌ ಪ್ರವೇಶ ಪಡೆದಿರುತ್ತಾನೆಯೋ ಅದರ ಸ್ಕ್ಯಾನ್‌ ಕಾಪಿ, ಇತರೆ ಅಂಕಪಟ್ಟಿಗಳ ಮಾಹಿತಿ, ಫೋಟೋಗಳನ್ನು ಅಪ್ಲೋಡ್ ಮಾಡಬೇಕಿರುತ್ತದೆ.
ಅರ್ಜಿ ಸಲ್ಲಿಕೆ ವೇಳೆ ಬ್ಯಾಂಕ್‌, ಶಾಖೆ, ಲೋನ್‌ ಯೋಜನೆಯನ್ನು ಆಯ್ಕೆ ಮಾಡಿಕೊಳ್ಳಬೇಕು. ಹಾಗೂ ಎಷ್ಟು ಹಣ ಬೇಕು ಎಂಬುದನ್ನು ಟೈಪಿಸಲು ಕೆಲವೊಂದು ಯೋಜನೆಗಳ ಅಡಿಯಲ್ಲಿ ಅವಕಾಶ ಇರುತ್ತದೆ. ಹಾಗೂ ಆ ಹಣವನ್ನು ಎಷ್ಟು ವರ್ಷಗಳಲ್ಲಿ ಪಾವತಿಸುತ್ತೇನೆ ಎಂಬ ಮಾಹಿತಿ ನೀಡಬೇಕು. ಎರಡು ಮೂರು ಬ್ಯಾಂಕ್‌ಗಳಲ್ಲಿ ಶೈಕ್ಷಣಿಕ ಸಾಲಕ್ಕೆ ಒಮ್ಮೆಯೇ ಅರ್ಜಿ ಸಲ್ಲಿಸುವುದು ಉತ್ತಮ.
ಶೈಕ್ಷಣಿಕ ಸಾಲಕ್ಕೆ ಅರ್ಜಿ ಸಲ್ಲಿಸಿದ 15 ದಿನಗಳ ಒಳಗಾಗಿ ಬ್ಯಾಂಕ್‌ನಿಂದ ಇಮೇಲ್ ಬರದಿದ್ದಲ್ಲಿ, ಒಮ್ಮೆ ಆ ಬ್ಯಾಂಕ್‌ ಇ-ಮೇಲ್ ವಿಳಾಸಕ್ಕೆ ಸಂದೇಶ ಕಳುಹಿಸಿ ಮಾಹಿತಿ ಪಡೆಯಬಹುದು.
ಯಾವ್ಯಾವ ಕೋರ್ಸ್‌ಗೆ ಶೈಕ್ಷಣಿಕ ಸಾಲ
ಎಜುಕೇಷನ್ ಲೋನ್‌ ಅನ್ನು ಪದವಿ ಪೂರ್ವ ಕೋರ್ಸ್‌, ಪದವಿ, ಸ್ನಾತಕೋತ್ತರ ಪದವಿ, ಪ್ರೊಫೇಶನಲ್ ಕೋರ್ಸ್‌, ವೃತ್ತಿಪರ ಕೋರ್ಸ್‌ ಗಳಿಗೆ ಸಹ ಅರ್ಜಿ ಸಲ್ಲಿಸಿ ಪಡೆಯಬಹುದು. ಕೋರ್ಸ್‌ ಆಯ್ಕೆ ಮಾಡುವ ವೇಳೆ ಈ ಎಲ್ಲಾ ಆಯ್ಕೆಗಳು ಇರುತ್ತವೆ.
ಅರ್ಜಿ ಪೂರ್ಣಗೊಳಿಸುವ ಮುಂಚೆ ನೆನಪಿಡಬೇಕಾದ ಅಂಶಗಳು
ಆನ್‌ಲೈನ್‌ ಅರ್ಜಿ ಫಿಲ್‌ ಮಾಡುವ ಪೇಜ್‌ನ ಮೇಲ್ಭಾಗದಲ್ಲಿ 'Edit Profile' ಆಯ್ಕೆ ಇರುತ್ತದೆ. ಇದರ ಮೇಲೆ ಕ್ಲಿಕ್ ಮಾಡುವ ಮೂಲಕ ಯಾವುದೇ ಮಾಹಿತಿಗಳು ತಪ್ಪಾಗಿದ್ದಲ್ಲಿ ಬದಲಿಸಬಹುದು. ನಂತರವಷ್ಟೇ ಅರ್ಜಿ ಸಲ್ಲಿಕೆ ಪೂರ್ಣಗೊಳಿಸಿ. ಹಾಗೆಯೇ ಅಭ್ಯರ್ಥಿಗಳು ತಾವು ಅರ್ಜಿ ಸಲ್ಲಿಸಿದ ನಂತರ, ಅರ್ಜಿ ಪರಿಸ್ಥಿತಿ ತಿಳಿಯಲು ಪೋರ್ಟಲ್‌ನಲ್ಲಿಯೇ ಅವಕಾಶ ಇರುತ್ತದೆ. ಅಭ್ಯರ್ಥಿಗಳು ಚೆಕ್‌ ಮಾಡಿಕೊಳ್ಳಬಹುದು.