ಭಾರತದ ಬಿ.ಟೆಕ್‌ ವಿದ್ಯಾರ್ಥಿನಿಗೆ ಯುಎಇಯಲ್ಲಿ ಸಿಕ್ತು 36 ಲಕ್ಷ ರೂ. ಭರ್ಜರಿ ಪ್ಯಾಕೇಜ್‌

ಹೈದರಾಬಾದ್: ಬಿ.ಟೆಕ್ ವಿದ್ಯಾರ್ಥಿನಿಯೊಬ್ಬರಿಗೆ ವರ್ಷಕ್ಕೆ 36 ಲಕ್ಷ ರೂ.ನ ಭರ್ಜರಿ ಪ್ಯಾಕೇಜ್‌ ದೊರೆತಿದೆ. ಹೈದರಾಬಾದ್‌ ಮೂಲದ ಐಸಿಎಫ್‌ಎಐಟೆಕ್‌ನ ಶಫಾಖ್‌ ಅಹ್ಮರೀನ್‌ ಅನ್ನು ಯುಎಇ ಸರಕಾರದ ಶಿಕ್ಷಣ ಸಚಿವಾಲಯ ನೇಮಿಸಿಕೊಂಡಿದೆ.

ಇದೇ ವರ್ಷ ಬಿ.ಟೆಕ್‌ ಪದವಿ ಪೂರ್ಣಗೊಳಿಸಿರುವ ಶಫಾಖ್‌ ಅಹ್ಮರೀನ್‌ಗೆ ಇಂಟರ್‌ನೆಟ್‌ ಆಫ್ ಥಿಂಗ್ಸ್‌ (ಐಒಟಿ) ನಲ್ಲಿ ಜೂನಿಯರ್ ರೀಸರ್ಚರ್‌ ಹುದ್ದೆ ನೀಡಲಾಗುತ್ತದೆ. ಆಕೆಗೆ ಯುನೈಟೆಡ್‌ ಅರಬ್‌ ಎಮಿರೇಟ್ಸ್‌ ವರ್ಷಕ್ಕೆ 1 ಲಕ್ಷ 92 ಸಾವಿರ ದಿರ್ಹಾಮ್ಸ್‌ ( 36 ಲಕ್ಷ ರೂ.) ಪ್ಯಾಕೇಜ್‌ ಘೋಷಿಸಿದೆ.

ಅಲ್ಲದೆ, ಬಿ.ಟೆಕ್‌ 2019ರ ಬ್ಯಾಚ್‌ನ ಐಸಿಎಫ್‌ಎಐಟೆಕ್‌ ಹೈದರಾಬಾದಿನ ಪುರಾಣಂ ಕಾರ್ತಿಕ್‌ ಸಾಯಿ ರಾಧಾಕೃಷ್ಣ ಹಾಗೂ ಮಣಿ ಚಂದ್ರ ತೇಜ ಗದ್ದಂ ಎಂಬ ಇನ್ನಿಬ್ಬರು ವಿದ್ಯಾರ್ಥಿಗಳು ಬೆಂಗಳೂರಿನ ನ್ವೆಸ್ಟ್‌ ಗ್ಲೋಬಲ್‌ ಎಂಟರ್‌ಪ್ರೈಸಸ್‌ನಲ್ಲಿ ಕೆಲಸ ಗಿಟ್ಟಿಸಿಕೊಂಡಿದ್ದಾರೆ.

ಇನ್ನು, ಕಾಲೇಜಿನ ವಿದ್ಯಾರ್ಥಿಗಳು ಉತ್ತಮ ಪ್ಯಾಕೇಜ್‌ ಪಡೆದುಕೊಂಡಿದ್ದಕ್ಕೆ ಕಾಲೇಜಿನ ಆಡಳಿತ ಮಂಡಳಿ ಸಹ ಹರ್ಷ ವ್ಯಕ್ತಪಡಿಸಿದೆ.