ಕೆಇಎ ಮೂಲಕ ವಿವಿಯ 5,900 ಹುದ್ದೆಗಳ ಭರ್ತಿಗೆ ಕ್ರಮ

ರಾಜ್ಯದ ವಿಶ್ವವಿದ್ಯಾಲಯಗಳಲ್ಲಿ ಖಾಲಿಯಿರುವ ಬೋಧಕರ ಹುದ್ದೆಗಳನ್ನು ಆರು ತಿಂಗಳೊಳಗಾಗಿ ಭರ್ತಿ ಮಾಡುವಂತೆ ವಿಶ್ವವಿದ್ಯಾಲಯ ಧನಸಹಾಯ ಆಯೋಗ (ಯುಜಿಸಿ) ಸೂಚಿಸಿರುವ ಹಿನ್ನೆಲೆಯಲ್ಲಿ ಕರ್ನಾಟಕ ಪರೀಕ್ಷಾ ಪ್ರಾಧಿಕಾರದ ಮೂಲಕ ಹುದ್ದೆಗಳನ್ನು ಭರ್ತಿ ಮಾಡಲು ಉನ್ನತ ಶಿಕ್ಷಣ ಇಲಾಖೆ ಮುಂದಾಗಿದೆ.

ಈ ಹಿನ್ನೆಲೆಯಲ್ಲಿ ವಿವಿಗಳಲ್ಲಿ ಖಾಲಿಯಿರುವ ವಿಷಯವಾರು ಹುದ್ದೆಗಳು, ಮೀಸಲಾತಿ, ಅರ್ಹತೆ, ಮಾನದಂಡಗಳ ವಿವರ ಸಲ್ಲಿಸುವಂತೆ ಉನ್ನತ ಶಿಕ್ಷಣ ಇಲಾಖೆಯು ಎಲ್ಲ ವಿಶ್ವವಿದ್ಯಾಲಯಗಳಿಗೆ ಸೂಚಿಸಿದೆ. ಇದೀಗ ವಿವಿಗಳು ಖಾಲಿಯಿರುವ ಹುದ್ದೆಗಳನ್ನು ಗುರುತಿಸಿ ಪಟ್ಟಿ ತಯಾರಿಸುವ ಪ್ರಕ್ರಿಯೆಗೆ ಚಾಲನೆ ನೀಡಿವೆ. ಶೀಘ್ರ ಅವು ವಿಷಯವಾರು ಖಾಲಿ ಹುದ್ದೆಗಳ ಪಟ್ಟಿಯನ್ನು ಉನ್ನತ ಶಿಕ್ಷಣ ಇಲಾಖೆಗೆ ಸಲ್ಲಿಸಲಿವೆ.

ಕರ್ನಾಟಕ ಪರೀಕ್ಷಾ ಪ್ರಾಧಿಕಾರವು ಅರ್ಹ ಅಭ್ಯರ್ಥಿಗಳಿಂದ ಆನ್‌ಲೈನ್‌ನಲ್ಲಿ ಅರ್ಜಿ ಆಹ್ವಾನಿಸಿ, ಪರೀಕ್ಷೆ ನಡೆಸಿದ ನಂತರ ಮೆರಿಟ್‌ ಆಧಾರದಲ್ಲಿ ವಿಷಯವಾರು/ ವರ್ಗವಾರು 1:3ರ ಕರಡು ಆಯ್ಕೆ ಪಟ್ಟಿಯನ್ನು ಆಯಾಯ ವಿಶ್ವವಿದ್ಯಾಲಯಗಳಿಗೆ ಮುಂದಿನ ನೇಮಕಾತಿ ಪ್ರಕ್ರಿಯೆಗೆ ಸಲ್ಲಿಸಲಿದೆ. ಕೆಇಎಯಿಂದ ಪಡೆದ ಕರಡು ಆಯ್ಕೆ ಪಟ್ಟಿಯನ್ನು ವಿವಿಗಳು ಆಯ್ಕೆ ಮಂಡಳಿ ಮುಂದಿಟ್ಟು ಅಂತಿಮವಾಗಿ ಒಬ್ಬರನ್ನು ಆಯ್ಕೆ ಮಾಡಲಿವೆ.

ಖಾಲಿ ಹುದ್ದೆಗಳೆಷ್ಟು?: ರಾಜ್ಯದ 19 ವಿಶ್ವವಿದ್ಯಾಲಯಗಳಲ್ಲಿ 11,773 ಬೋಧಕ ಹಾಗೂ ಬೋಧಕೇತರ ಮಂಜೂರಾತಿ ಹುದ್ದೆಗಳಿದ್ದು, ಈ ಪೈಕಿ 5,900 ಹುದ್ದೆಗಳು ದಶಕದಿಂದ ಖಾಲಿ ಬಿದ್ದಿವೆ. ಹಾಗೆಯೇ, 3,934 ಮಂಜೂರಾದ ಬೋಧಕರ ಹುದ್ದೆಗಳ ಪೈಕಿ ಹಾಲಿ 2,135 ಮಂದಿ ಕೆಲಸ ಮಾಡುತ್ತಿದ್ದಾರೆ. 7,838 ಮಂಜೂರಾದ ಬೋಧಕೇತರ ಹುದ್ದೆಗಳ ಪೈಕಿ ಹಾಲಿ 3736 ಮಂದಿ ಕೆಲಸ ಮಾಡುತ್ತಿದ್ದಾರೆ. 19 ವಿವಿಗಳಲ್ಲದೆ, ಸಂಗೀತ ವಿವಿ, ಜನಪದ ವಿವಿ, ಹೊಸದಾಗಿ ಆರಂಭವಾದ ಲಲಿಕಲೆ ವಿವಿಗಳಲ್ಲೂ ಹುದ್ದೆಗಳು ಖಾಲಿ ಇವೆ. ವಿವಿಗಳಲ್ಲಿ ಅರ್ಧಕ್ಕರ್ಧ ಹುದ್ದೆಗಳು ಖಾಲಿ ಬಿದ್ದಿರುವುದರಿಂದ ಅವು ಉನ್ನತ ಶಿಕ್ಷಣದ ಗುಣಮಟ್ಟ ಹಾಗೂ ಸಂಶೋಧನೆಗೆ ತೀವ್ರ ಅಡ್ಡಿಯಾಗಿ ಪರಿಣಮಿಸಿದೆ ಎಂದು ಯುಜಿಸಿ ಆಕ್ಷೇಪಿಸಿದೆ.