ಫೊನಿ ಚಂಡಮಾರುತ ಎಫೆಕ್ಟ್: ಒಡಿಶಾ ಪರೀಕ್ಷಾ ಕೇಂದ್ರಗಳಲ್ಲಿ ನೀಟ್ 2019 ರದ್ದು

ಹೊಸದಿಲ್ಲಿ: ನಾಳೆ (ಮೇ 5ರಂದು) ನಡೆಯಬೇಕಿದ್ದ ನೀಟ್‌ ಪರೀಕ್ಷೆ ಒಡಿಶಾದ ಪರೀಕ್ಷಾ ಕೇಂದ್ರಗಳಲ್ಲಿ ರದ್ದಾಗಿದೆ. ಭೀಕರ ಚಂಡಮಾರುತ ಫೊನಿಯ ಕಾರಣದಿಂದಾಗಿ ನೀಟ್‌ ಪರೀಕ್ಷೆ 2019 ಅನ್ನು ಒಡಿಶಾ ರಾಜ್ಯದಲ್ಲಿ ಮುಂದೂಡಲಾಗಿದೆ. ಆದರೆ ಕರ್ನಾಟಕ ಸೇರಿ ಉಳಿದೆಲ್ಲ ರಾಜ್ಯಗಳಲ್ಲಿ ನೀಟ್‌ ಪರೀಕ್ಷೆ ನಿಗದಿಯಂತೆ ಮೇ 5ರಂದು ನಡೆಯಲಿದೆ.

ಭೀಕರ ಚಂಡಮಾರುತ ಫೊನಿಗೆ ಒಡಿಶಾ ರಾಜ್ಯ ಬಹುತೇಕ ನಲುಗಿ ಹೋಗಿದೆ. ಹೀಗಾಗಿ ಅಭ್ಯರ್ಥಿಗಳ ಹಿತದೃಷ್ಟಿಯಿಂದ ನೀಟ್‌ ಪರೀಕ್ಷೆಯನ್ನು ಮುಂದೂಡಿ ಎಂದು ಒಡಿಶಾ ಸರಕಾರ ಕೇಳಿಕೊಂಡಿತ್ತು. ಈ ಹಿನ್ನೆಲೆ ಒಡಿಶಾ ರಾಜ್ಯದಲ್ಲಿ ನೀಟ್ 2019 ಅನ್ನು ಮುಂದೂಡಲಾಗಿದೆ ಎಂದು ಉನ್ನತ ಶಿಕ್ಷಣ ಕಾರ್ಯದರ್ಶಿ ಆರ್‌. ಸುಬ್ರಹ್ಮಣ್ಯಂ ಸುದ್ದಿಸಂಸ್ಥೆ ಎಎನ್‌ಐಗೆ ತಿಳಿಸಿದ್ದಾರೆ.


ಇನ್ನು, ಮುಂದೂಡಿಕೆಯಾಗಿರುವ ಪರೀಕ್ಷೆಯ ದಿನಾಂಕಗಳ ಬಗ್ಗೆ ಶೀಘ್ರದಲ್ಲೇ ತಿಳಿಸಲಾಗುವುದು ಎಂದೂ ಅವರು ತಿಳಿಸಿದ್ದಾರೆ. ಈ ಸಂಬಂಧ ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆ (ಎನ್‌ಟಿಎ) ಅಧಿಕೃತ ವೆಬ್‌ಸೈಟ್ ntaneet.nic.inನಲ್ಲಿ ಅಧಿಕೃತ ಅಧಿಸೂಚನೆ ಹೊರಡಿಸಲಾಗುವುದು ಎಂದು ತಿಳಿದುಬಂದಿದೆ.

ಆದರೆ, ಒಡಿಶಾದ ಪರೀಕ್ಷಾ ಕೇಂದ್ರಗಳಲ್ಲಿ ಮಾತ್ರ ಪರೀಕ್ಷೆ ರದ್ದಾಗಿದ್ದು, ಉಳಿದೆಲ್ಲ ರಾಜ್ಯಗಳಲ್ಲಿ ನಿಗದಿಯಂತೆ ಪರೀಕ್ಷೆ ನಡೆಯಲಿದೆ. ಅಲ್ಲದೆ, ಇತ್ತೀಚೆಗಷ್ಟೇ ಕರ್ನಾಟಕ ಸೇರಿ ದೇಶಾದ್ಯಂತ 86 ಪರೀಕ್ಷಾ ಕೇಂದ್ರಗಳನ್ನು ಬದಲಾವಣೆ ಮಾಡಲಾಗಿತ್ತು. ಈ ಸಂಬಂಧ ಎನ್‌ಟಿಎ ಅಧಿಕೃತ ವೆಬ್‌ಸೈಟ್ ntaneet.nic.inನಲ್ಲಿ ವಿವರ ನೀಡಲಾಗಿದೆ. ಜತೆಗೆ, ಪರೀಕ್ಷಾ ಕೇಂದ್ರ ಬದಲಾವಣೆಯಾಗಿದ್ದಲ್ಲಿ ನೀಟ್ ಅಭ್ಯರ್ಥಿಗಳು ಹೊಸದಾಗಿ ಪ್ರವೇಶ ಪತ್ರವನ್ನು ಡೌನ್‌ಲೋಡ್‌ ಮಾಡಿಕೊಳ್ಳಲಾಗಿದೆ.

ನೀಟ್‌ ಪರೀಕ್ಷೆ ನಾಳೆ ( ಮೇ 5,2019) ಮಧ್ಯಾಹ್ನ 2 ಗಂಟೆಯಿಂದ ಸಂಜೆ 5 ಗಂಟೆಯವರೆಗೆ ಒಡಿಶಾ ರಾಜ್ಯ ಹೊರತುಪಡಿಸಿ ಉಳಿದೆಲ್ಲ ರಾಜ್ಯಗಳಲ್ಲಿ ನಡೆಯಲಿದೆ.