ಏಮ್ಸ್ ಎಂಬಿಬಿಎಸ್‌ ಪ್ರವೇಶ ಪರೀಕ್ಷೆ ಫಲಿತಾಂಶ: ದಿಲ್ಲಿಯ ಭವಿಕ್‌ ಬನ್ಸಾಲ್‌ಗೆ ಪ್ರಥಮ ಸ್ಥಾನ

ಹೊಸದಿಲ್ಲಿ: ಅಖಿಲ ಭಾರತ ವೈದ್ಯಕೀಯ ವಿಜ್ಞಾನ ಸಂಸ್ಥೆ (ಎಐಐಎಂಎಸ್‌) ಎಂಬಿಬಿಎಸ್‌ ಪ್ರವೇಶ ಪರೀಕ್ಷೆಯ ಫಲಿತಾಂಶವನ್ನು ಜೂನ್ 12, 2019ರ ರಾತ್ರಿ ಪ್ರಕಟಿಸಿದೆ. ಏಮ್ಸ್ ಎಂಬಿಬಿಎಸ್‌ 2019ರ ಪರೀಕ್ಷೆಯಲ್ಲಿ ಅರ್ಹತೆ ಪಡೆದುಕೊಂಡ ಅಭ್ಯರ್ಥಿಗಳ ಪಟ್ಟಿಯನ್ನು ಅಧಿಕೃತ ವೆಬ್‌ಸೈಟ್‌ನಲ್ಲಿ ಪ್ರಕಟಿಸಲಾಗಿದೆ.

ಏಮ್ಸ್ ಎಂಬಿಬಿಎಸ್‌ 2019ರ ಪ್ರವೇಶ ಪರೀಕ್ಷೆಯಲ್ಲಿ 4 ಅಭ್ಯರ್ಥಿಗಳು ಶೇ. 100 ಪರ್ಸೆಂಟೈಲ್‌ ಗಳಿಸಿಕೊಂಡಿದ್ದು, ದಿಲ್ಲಿಯ ಭವಿಕ್‌ ಬನ್ಸಾಲ್‌ ಏಮ್ಸ್ ಎಂಬಿಬಿಎಸ್‌ 2019ರ ಪರೀಕ್ಷೆಯಲ್ಲಿ ಮೊದಲ ರ‍್ಯಾಂಕ್ ಗಳಿಸಿಕೊಂಡು ಟಾಪರ್ ಆಗಿ ಹೊರಹೊಮ್ಮಿದ್ದಾರೆ. ನೀಟ್ 2019 ಪರೀಕ್ಷೆಯಲ್ಲೂ ಭವಿಕ್ ಎರಡನೇ ಸ್ಥಾನ ಪಡೆದಿದ್ದರು.

ಇತ್ತೀಚೆಗಷ್ಟೇ, ನೀಟ್‌ 2019ರ ಫಲಿತಾಂಶದ ಬಳಿಕ ಮಾಧ್ಯಮಕ್ಕೆ ಸಂದರ್ಶನ ನೀಡಿದ್ದ ಭವಿಕ್‌, ಏಮ್ಸ್ ಎಂಬಿಬಿಎಸ್‌ 2019ರ ಪರೀಕ್ಷೆಯಲ್ಲಿ ಅರ್ಹತೆ ಪಡೆದುಕೊಳ್ಳುವ ವಿಶ್ವಾಸ ವ್ಯಕ್ತಪಡಿಸಿದ್ದರು. ನೀಟ್‌ ಪರೀಕ್ಷೆಯಲ್ಲಿ 720 ಅಂಕಗಳ ಪೈಕಿ ಭವಿಕ್ 700 ಅಂಕಗಳನ್ನು ಪಡೆದುಕೊಂಡಿದ್ದರು. ಏಮ್ಸ್ ಎಂಬಿಬಿಎಸ್‌ 2019ರ ಪರೀಕ್ಷೆಯಲ್ಲಿ ಭವಿಕ್‌ ಭೌತಶಾಸ್ತ್ರ, ರಸಾಯನ ಶಾಸ್ತ್ರ ಹಾಗೂ ಜೀವಶಾಸ್ತ್ರದಲ್ಲಿ ಶೇ. 100 ಪರ್ಸೆಂಟೈಲ್‌ ಗಳಿಸಿಕೊಂಡಿದ್ದಾರೆ. ಇನ್ನು, ಅವರ ಜಿಕೆ ಪರ್ಸೆಂಟೈಲ್‌ ಶೇ. 99.9728473 ಆಗಿದೆ.

ಮೇ 25 ಹಾಗೂ ಮೇ 26, 2019ರಂದು ಅಖಿಲ ಭಾರತ ವೈದ್ಯಕೀಯ ವಿಜ್ಞಾನ ಸಂಸ್ಥೆ ಏಮ್ಸ್‌ ಲಿಖಿತ ಪರೀಕ್ಷೆಯನ್ನು ಹಮ್ಮಿಕೊಂಡಿತ್ತು. ಈ ವರ್ಷ ಸುಮಾರು 3 ಲಕ್ಷ ಅಭ್ಯರ್ಥಿಗಳು ಪರೀಕ್ಷೆಗೆ ಹಾಜರಾಗಿದ್ದರು. ಆಗಸ್ಟ್‌ 1, 2019ರಂದು ಏಮ್ಸ್ ಶೈಕ್ಷಣಿಕ ಕಾರ್ಯಕ್ರಮ ಪ್ರಾರಂಭಗೊಂಡಿದ್ದು, ಈ ಮೆಡಿಕಲ್ ಪ್ರವೇಶ ಪರೀಕ್ಷೆಯ ಮೂಲಕ ಏಮ್ಸ್ ಸಂಸ್ಥೆ ದೇಶಾದ್ಯಂತ 1207 ಸೀಟುಗಳನ್ನು ಆಯ್ಕೆ ಮಾಡಿಕೊಳ್ಳಲಿದೆ.

ಒಟ್ಟಾರೆ 1 ಲಕ್ಷ 57 ಸಾವಿರ 488 ಪುರುಷರು, 1 ಲಕ್ಷ 80 ಸಾವಿರದ 934 ಮಹಿಳೆಯರು ಹಾಗೂ 35 ತೃತೀಯ ಲಿಂಗಿ ಅಭ್ಯರ್ಥಿಗಳು ಪರೀಕ್ಷೆಗೆ ಹಾಜರಾಗಿದ್ದರು ಎಂದು ಏಮ್ಸ್ ಮಾಹಿತಿ ನೀಡಿದೆ. ಅಲ್ಲದೆ, ಈ ಪೈಕಿ 7 ಸಾವಿರದ 352 ಪುರುಷರು, 4 ಸಾವಿರದ 27 ಮಹಿಳೆಯರು, ಒಬ್ಬರು ತೃತೀಯ ಲಿಂಗಿ ಅಭ್ಯರ್ಥಿ ಸೇರಿ 11,380 ಅಭ್ಯರ್ಥಿಗಳು ಅರ್ಹತೆ ಪಡೆದುಕೊಂಡಿದ್ದಾರೆ.