ನೀಟ್ 2019: ಟಾಪರ್ ನಳಿನ್ ಖಂಡೇಲ್ವಾಲ್‌ನ ಯಶಸ್ಸಿನ ಮಂತ್ರ ಏನು ಗೊತ್ತಾ?

ಜೈಪುರ: ರಾಜಸ್ಥಾನದ ಸಿಕಾರ್ ಜಿಲ್ಲೆ ಮೂಲದ ನಳಿನ್ ಖಂಡೇಲ್ವಾಲ್‌ ರಾಷ್ಟ್ರೀಯ ಅರ್ಹತಾ ಕಮ್ ಪ್ರವೇಶ ಪರೀಕ್ಷೆಯಲ್ಲಿ ದೇಶಕ್ಕೆ ಪ್ರಥಮ ಸ್ಥಾನ ಗಳಿಸಿಕೊಂಡಿದ್ದಾರೆ. ಅಲ್ಲದೆ, ರಾಜಸ್ಥಾನದ ಇತರೆ ಮೂವರು ವಿದ್ಯಾರ್ಥಿಗಳು ಸಹ ಟಾಪ್‌ 10 ಪಟ್ಟಿಯಲ್ಲಿದ್ದಾರೆ.

720 ಅಂಕಗಳ ಪೈಕಿ ರಾಜಸ್ಥಾನದ ಜೈಪುರ ಮೂಲದ ನಳಿನ್ ಖಂಡೇಲ್ವಾಲ್ 701 ಅಂಕಗಳನ್ನು ಗಳಿಸಿಕೊಂಡಿದ್ದು, ದೇಶಕ್ಕೆ ಟಾಪರ್ ಆಗಿ ಹೊರಹೊಮ್ಮಿದ್ದಾರೆ. ಖಂಡೇಲ್ವಾಲ್ ಪೋಷಕರು ಸಹ ವೈದ್ಯರಾಗಿದ್ದು, ನೀಟ್‌ ಪರೀಕ್ಷೆಗೆ ಎರಡು ವರ್ಷಗಳಿಂದ ತಯಾರಾಗುತ್ತಿದ್ದೆ ಎಂದು ಹೇಳಿಕೊಂಡಿದ್ದಾರೆ.

''ಎರಡು ವರ್ಷಗಳಿಂದ ಜೈಪುರದಲ್ಲಿ ಓದಿನ ಮೇಲೇ ಸಂಪೂರ್ಣವಾಗಿ ಕೇಂದ್ರೀಕರಿಸಿದ್ದೆ. ನನ್ನ ಪೋಷಕರು ಸಹ ವೈದ್ಯರಾಗಿದ್ದು, ಹಿರಿಯ ಸಹೋದರ ಸಹ ಎಂಬಿಬಿಎಸ್‌ ಮಾಡುತ್ತಿರುವುದರಿಂದ ನನಗೆ ಕುಟುಂಬದವರಿಂದ ಹಾಗೂ ಶಿಕ್ಷಕರಿಂದ ಸಂಪೂರ್ಣ ಸಹಕಾರ ದೊರಕಿತು'' ಎಂದೂ ಮಾಧ್ಯಮದವರಿಗೆ ತಿಳಿಸಿದ್ದಾರೆ. ಅಲ್ಲದೆ, ಸಾಮಾಜಿಕ ಜಾಲತಾಣ, ಸ್ಮಾರ್ಟ್‌ಫೋನ್‌ಗಳಿಂದ ದೂರವಿದ್ದೆ. ಪ್ರತಿನಿತ್ಯ 7 ರಿಂದ 8 ಗಂಟೆಗಳ ಕಾಲ ಓದುತ್ತಿದ್ದೆ ಎಂದು ಸಹ ಟಾಪರ್ ಹೇಳಿದ್ದಾನೆ.

ಅಲೆನ್‌ ಕೋಚಿಂಗ್ ಸಂಸ್ಥೆಯ ಶೈಕ್ಷಣಿಕ ಮುಖ್ಯಸ್ಥ ಸಹ ಸುದ್ದಿಗೋಷ್ಠಿ ನಡೆಸಿದ್ದು, ''ನಳಿನ್ ಪರೀಕ್ಷೆಯಲ್ಲಿ ಟಾಪರ್ ಆಗಿದ್ದಾರೆ. ಅಲ್ಲದೆ, ಕೋಟಾದ ಕೋಚಿಂಗ್ ಸೆಂಟರ್‌ನ ಇನ್ನಿಬ್ಬರು ವಿದ್ಯಾರ್ಥಿಗಳು ಸಹ ಐದು ಹಾಗೂ 10ನೇ ರ‍್ಯಾಂಕ್ ಗಳಿಸಿದ್ದಾರೆ'' ಎಂದು ತಿಳಿಸಿದ್ದಾರೆ.

ರಾಜಸ್ಥಾನದ 98 ಸಾವಿರದ 757 ವಿದ್ಯಾರ್ಥಿಗಳು ನೀಟ್‌ ಪರೀಕ್ಷೆಗೆ ಅರ್ಜಿ ಹಾಕಿದ್ದರು. ಈ ಪೈಕಿ 93 ಸಾವಿರದ 149 ಅಭ್ಯರ್ಥಿಗಳು ಪರೀಕ್ಷೆ ಬರೆದಿದ್ದು 64 ಸಾವಿರದ 890 ಮಂದಿ ಅರ್ಹರಾಗಿದ್ದಾರೆ ಎಂದು ತಿಳಿದುಬಂದಿದೆ.

ವೈದ್ಯಕೀಯ ಹಾಗೂ ದಂತ ವೈದ್ಯಕೀಯ ಕೋರ್ಸ್‌ಗಳ ಪ್ರವೇಶಕ್ಕೆ ರಾಷ್ಟ್ರೀಯ ಪರೀಕ್ಷಾ ಏಜೆನ್ಸಿ (ಎನ್‌ಟಿಎ) ನೀಟ್‌ ಅನ್ನು ಆಯೋಜಿಸುತ್ತದೆ. ಇದಕ್ಕೆ ಮೆಡಿಕಲ್ ಕೌನ್ಸಿಲ್‌ ಆಫ್‌ ಇಂಡಿಯಾ ಹಾಗೂ ದಂತ ವೈದ್ಯಕೀಯ ಕೌನ್ಸಿಲ್‌ ಆಫ್‌ ಇಂಡಿಯಾದಿಂದ ಮಾನ್ಯತೆ ಪಡೆದಿದೆ.

ಇದನ್ನೂ ಓದಿ: ನೀಟ್ 2019: ರಾಜಸ್ಥಾನದ ನಳಿನ್ ಖಂಡೇಲ್ವಾಲ್ ದೇಶಕ್ಕೆ ಪ್ರಥಮ