ಶಿಕ್ಷಕರ ನೇಮಕ ಪರೀಕ್ಷೆ ಅಂಕಗಳ ಬಗ್ಗೆ ಮಾಹಿತಿ

ಬೆಂಗಳೂರು: ರಾಜ್ಯದ ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆಗಳಲ್ಲಿನ ಪದವೀಧರ ಪ್ರಾಥಮಿಕ ಶಿಕ್ಷಕರ (6ರಿಂದ 8ನೇ ತರಗತಿ) ನೇಮಕಕ್ಕೆ ನಡೆದ ಇಂಗ್ಲಿಷ್‌ ಭಾಷಾ ಪರೀಕ್ಷೆಗೆ (ಪ್ರಶ್ನೆ ಪತ್ರಿಕೆ -2) ಸಂಬಂಧಿಸಿದಂತೆ ಎದ್ದಿದ್ದ ಗೊಂದಲಗಳಿಗೆ ಸಾರ್ವಜನಿಕ ಶಿಕ್ಷಣ ಇಲಾಖೆಯು ತೆರೆ ಎಳೆದಿದೆ.

ಮೇ 25ರ ಮಧ್ಯಾಹ್ನ 2.30ರಿಂದ 5.30ರ ವರೆಗೆ ಈ ಪರೀಕ್ಷೆ ನಡೆಸಲಾಗಿತ್ತು. ಒಟ್ಟು 150 ಅಂಕಗಳಿಗೆ ಈ ಪರೀಕ್ಷೆ ನಡೆದಿದ್ದು, ಇದರಲ್ಲಿ ಅಬ್ಜೆಕ್ಟೀವ್‌ ಮಾದರಿಯ ಪ್ರಶ್ನೆಗಳಿಗೆ 50 ಅಂಕ ಮತ್ತು ವಿವರಾಣತ್ಮಕ ಪ್ರಶ್ನೆಗಳಿಗೆ 100 ಅಂಕ ನಿಗದಿಪಡಿಸಲಾಗಿತ್ತು. ಇವುಗಳಿಗೆ ಸಂಬಂಧಿಸಿದಂತೆ ಅಭ್ಯರ್ಥಿಗಳಲ್ಲಿ ಗೊಂದಲ ಉಂಟಾಗಿದ್ದು, ಯಾವ ಪ್ರಶ್ನೆಗೆ ಎಷ್ಟು ಅಂಕ ನಿಗದಿಪಡಿಸಲಾಗಿದೆ ಎಂಬುದು ಗೊತ್ತಾಗುತ್ತಿಲ್ಲ ಎಂದು ದೂರಿದ್ದರು.

ಈ ಕುರಿತು ಪ್ರಕಣೆ ನೀಡಿರುವ ಶಿಕ್ಷಣ ಇಲಾಖೆಯು, ಪ್ರಶ್ನೆ ಪತ್ರಿಕೆಯಲ್ಲಿನ 1ರಿಂದ 50 ನೇ ಪ್ರಶ್ನೆಗಳವರೆಗೆ ತಲಾ ಪ್ರಶ್ನೆಗೆ 1 ಅಂಕ (ಒಟ್ಟು 50 ಅಂಕ), 51ರಿಂದ 68ನೇ ಪ್ರಶ್ನೆಗಳವರೆಗೆ ತಲಾ 2 ಅಂಕ ( 18 ಪ್ರಶ್ನೆ 36 ಅಂಕ), 69ರಿಂದ 76 ನೇ ಪ್ರಶ್ನೆಗಳವರೆಗೆ ತಲಾ 3 ಅಂಕ ( 8 ಪ್ರಶ್ನೆ 24 ಅಂಕ) ಹಾಗೂ 77 ರಿಂದ 84ನೇ ಪ್ರಶ್ನೆಗಳವರೆಗೆ ತಲಾ 5 ಅಂಕ (8 ಪ್ರಶ್ನೆ 40 ಅಂಕ) ನಿಗದಿಪಡಿಸಲಾಗಿದೆ ಎಂದು ಸ್ಪಷ್ಟಪಡಿಸಿದೆ.