ಕೊರೊನಾ ಎಫೆಕ್ಟ್‌; 154 ಕೋಟಿ ವಿದ್ಯಾರ್ಥಿಗಳ ಭವಿಷ್ಯ ಅತಂತ್ರ

ಕೊರೊನಾ ವೈರಸ್‌ ಶೈಕ್ಷಣಿಕ ರಂಗದ ಮೇಲೆ ಬೃಹತ್ ಮಟ್ಟದಲ್ಲಿಯೇ ಮಾರಕವಾಗಿದೆ. ಕೋವಿಡ್-19 ಹಾವಳಿಯಿಂದ ಜಗತ್ತಿನಾದ್ಯಂತ ಶೈಕ್ಷಣಿಕ ಚಟುವಟಿಕೆಗಳು ಸ್ಥಗಿತಗೊಂಡಿದ್ದು ಅವುಗಳ ಪುನರಾರಂಭದ ಬಗ್ಗೆ ಇನ್ನೂ ಅನಿಶ್ಚಿತತೆ ಮನೆ ಮಾಡಿದೆ. ಕೆಲವು ಶಾಲೆ/ಕಾಲೇಜು/ವಿವಿಗಳು ಆನ್‌ಲೈನ್ ವೇದಿಕೆಗಳನ್ನು ಇದಕ್ಕೆ ಪರ್ಯಾಯವಾಗಿ ಬಳಸಿಕೊಳ್ಳುವ ಪ್ರಯತ್ನ ನಡೆಸಿವೆ. ಆದರೆ ಸದ್ಯ ಶೈಕ್ಷಣಿಕ ಸಂಸ್ಥೆಗಳು ಬಂದ್ ಆಗಿರುವ ಹಿನ್ನೆಲೆಯಲ್ಲಿ ವಿಶ್ವದಾದ್ಯಂತ 154 ಕೋಟಿ ವಿದ್ಯಾರ್ಥಿಗಳ ಭವಿಷ್ಯದ ಮೇಲೆ ಪರಿಣಾಮ ಬೀರಿದೆ ಎಂದು ಯುನೆಸ್ಕೋ ಹೇಳಿದೆ.

154 ಕೋಟಿ ವಿದ್ಯಾರ್ಥಿಗಳ ಪೈಕಿ 74 ಕೋಟಿ ವಿದ್ಯಾರ್ಥಿನಿಯರಿದ್ದಾರೆ. ಇವರಲ್ಲಿ 11 ಕೋಟಿ ಶಾಲಾ ಬಾಲಕಿಯರು/ಕಾಲೇಜು ವಿದ್ಯಾರ್ಥಿನಿಯರು ಈಗಷ್ಟೇ ಅಭಿವೃದ್ಧೀಯ ಕಣ್ಣು ತೆರೆಯುತ್ತಿರುವ ರಾಷ್ಟ್ರಗಳಿಗೆ ಸೇರಿದವರಾಗಿದ್ದು, ಕೊರೊನಾ ಬಿಕ್ಕಟ್ಟು ಅವರ ಕಲಿಕೆಯ ಭವಿಷ್ಯದ ಮೇಲೆ ಗಂಭೀರ ಪರಿಣಾಮ ಬೀರಲಿದೆ. ಇದು ಮುಂದಿನ ದಿನಗಳಲ್ಲಿ ಜಾಗತಿಕ ಶಿಕ್ಷಣ ಕ್ಷೇತ್ರದಲ್ಲಿ ಲಿಂಗ ಅಸಮಾನತೆಗೆ ಕಾರಣವಾಗಲಿದೆ ಎಂದು ಯುನೆಸ್ಕೊ ಎಚ್ಚರಿಸಿದೆ.

ಕೊರೊನಾದಿಂದ ಶಾಲೆ / ಕಾಲೇಜು / ವಿವಿಗಳು ಸ್ಥಗಿತಗೊಂಡಿರುವ ಹಿನ್ನೆಲೆಯಲ್ಲಿ ಬಾಲಕಿಯರು /ಹದಿಹರೆಯದ ವಿದ್ಯಾರ್ಥಿನಿಯರು ಶಿಕ್ಷಣವನ್ನು ಅರ್ಧಕ್ಕೆ ಮೊಟಕುಗೊಳಿಸುವ ಸಾಧ್ಯತೆಗಳು ಹೆಚ್ಚಲಿವೆ.

ಏ.23 ವಿಶ್ವ ಪುಸ್ತಕ ದಿನ; ತಿಳಿಯಲೇಬೇಕಾದ ಪ್ರಮುಖ ಮಾಹಿತಿಗಳು ಇಲ್ಲಿವೆ..

ಡ್ರಾಪ್‌ ಔಟ್ ಆಗುವವರ ಸಂಖ್ಯೆ ತೀವ್ರಗೊಳ್ಳಲಿದ್ದು ಇದು ಶಿಕ್ಷಣದಲ್ಲಿ ಲಿಂಗ ಅಸಮಾನತೆಯನ್ನು ಸೃಷ್ಟಿಸಲಿದೆ. ಕಾಲ ಕ್ರಮೇಣ ಮಹಿಳಾ ಶೋಷಣೆಗೂ ಕಾರಣವಾಗುವ ಅಪಾಯವಿದೆ ಎಂದು ಯುನೆಸ್ಕೊದ ಶಿಕ್ಷಣ ವಿಭಾಗದ ಸಹಾಯಕ ಮಹಾ ನಿರ್ದೇಶಕಿ ಸ್ಟೆಫಾನಿಯಾ ಜಿಯಾನಿನಿ ಪಿಟಿಐ ಸುದ್ದಿ ಸಂಸ್ಥೆಗೆ ನೀಡಿದ ಸಂದರ್ಶನದಲ್ಲಿ ತಿಳಿಸಿದ್ದಾರೆ.

ಶಿಕ್ಷಣ ತಜ್ಞರು, ಸರಕಾರದ ನೀತಿ ನಿರೂಪಕರು ಇಂತಹ ಸವಾಲುಗಳನ್ನು ಎದುರಿಸಲು ಈಗಿನಿಂದಲೇ ಮಾರ್ಗೋಪಾಯಗಳನ್ನು ಕಂಡುಕೊಳ್ಳುವ ಅಗತ್ಯವಿದೆ ಎಂದು ಅವರು ಹೇಳಿದ್ದಾರೆ.

ಯುನೆಸ್ಕೊ ಸಲಹೆಗಳು

- ಹೆಣ್ಣು ಮಕ್ಕಳು ಅರ್ಧಕ್ಕೆ ಶಿಕ್ಷಣ ಮೊಟಕುಗೊಳಿಸದಂತೆ ಸರಕಾರಗಳು ವಿಶೇಷ ಆದ್ಯತೆ ಮೇರೆಗೆ ನೀತಿಗಳನ್ನು ರೂಪಿಸಬೇಕು.

- ಸರಕಾರಿ ಹಾಗೂ ಖಾಸಗಿ ಶಾಲೆಗಳನ್ನು ಕೇಂದ್ರೀಕರಿಸಿ ನಗರ ಹಾಗೂ ಗ್ರಾಮೀಣ ಪ್ರದೇಶಗಳ ಮಕ್ಕಳ ಮಧ್ಯೆ ಡಿಜಿಟಲ್ ಅಂತರ ಆಗದಂತೆ ಕಾಯ್ದುಕೊಳ್ಳುವುದು.

- ಶಿಕ್ಷಕರು ಮತ್ತು ಸಮುದಾಯಗಳ ಮಧ್ಯೆ ಬಾಂಧವ್ಯ ಗಟ್ಟಿಗೊಳಿಸುವುದು, ದೂರ ಶಿಕ್ಷಣ ಪದ್ಧತಿ ಅಳವಡಿಕೆ.

ಗಣಿತದಲ್ಲಿ ಪೂರ್ಣ ಅಂಕ ಗಳಿಸಲು ಫಾಲೋ ಮಾಡಲೇಬೇಕಾದ ಟಿಪ್ಸ್‌ ಇಲ್ಲಿವೆ..