ಮಗುವಿಗೆ ಜನ್ಮ ನೀಡಿದ ಅರ್ಧ ಗಂಟೆಯಲ್ಲೇ ಪರೀಕ್ಷೆ ಬರೆದ 21 ವರ್ಷದ ಮಹಿಳೆ

ಅಡ್ಡಿಸ್‌ ಅಬಾಬಾ: ಇಥಿಯೋಪಿಯಾದ ಮಹಿಳೆಯೊಬ್ಬಳು ಮಗುವಿಗೆ ಜನ್ಮ ನೀಡಿದ ಕೇವಲ ಅರ್ಧ ಗಂಟೆಯಲ್ಲಿ ಪರೀಕ್ಷೆ ಬರೆದಿದ್ದಾಳೆ. 21 ವರ್ಷದ ಮಹಿಳೆಯ ಈ ನಿರ್ಧಾರ ತೀವ್ರ ಚರ್ಚೆಗೆ ಗ್ರಾಸವಾಗಿದೆ. ಇಥಿಯೋಪಿಯಾದ ಮಹಿಳೆಯ ಈ ತೀರ್ಮಾನವನ್ನು ಹಲವು ನೆಟ್ಟಿಗರು ಶ್ಲಾಘಿಸಿದ್ದಾರೆ. ಇನ್ನು, ಕೆಲವರು ಚಿಕ್ಕ ವಯಸ್ಸಿನಲ್ಲಿಯೇ ಹುಡುಗಿಯರನ್ನು ಮದುವೆ ಮಾಡುವ ವಿಚಾರವನ್ನೂ ಪ್ರಸ್ತಾಪಿಸಿದ್ದಾರೆ.

21ನೇ ವಯಸ್ಸಿನಲ್ಲಿ ಗಂಡು ಮಗುವಿಗೆ ಜನ್ಮ ನೀಡಿದ ಕೇವಲ 30 ನಿಮಿಷಗಳಲ್ಲಿ ಇಥಿಯೋಪಿಯಾದ ರಾಷ್ಟ್ರೀಯ ಅಂತಿಮ ಪರೀಕ್ಷೆ ಬರೆದ ಅಲ್ಮಾಜ್ ಡೆರೆಸ್‌ಗೆ ಒಳ್ಳಯದಾಗಲಿ ಎಂದು ಟ್ವಿಟರ್ ಬಳಕೆದಾರ ಎರ್ಮಿಯಾಸ್‌ ಡಬ್ಲ್ಯು ಅಮೀನ್ ಇತ್ತೀಚೆಗೆ ಟ್ವೀಟ್‌ ಮಾಡಿದ್ದರು.

ಅಲ್ಲದೆ, ರಂಜಾನ್‌ ಹಿನ್ನೆಲೆ ಪ್ರೌಢಶಾಲಾ ಪರೀಕ್ಷೆ ಮುಂದೂಡಿಕೆಯಾದ ಕಾರಣ ಮಹಿಳೆ ಆಸ್ಪತ್ರೆಯಲ್ಲೇ ಪರೀಕ್ಷೆ ಬರೆಯುವಂತಾಗಿದೆ ಎಂದು ಆತ ಟ್ವೀಟ್‌ ಮಾಡಿದ್ದ. ಇದಕ್ಕೆ ಪ್ರತಿಕ್ರಿಯೆ ನೀಡಿದ ಸಾಮಾಜಿಕ ಜಾಲತಾಣ ಬಳಕೆದಾರರು ಆಕೆಯ ಧೈರ್ಯ ಮತ್ತು ಧೃಡ ಸಂಕಲ್ಪವನ್ನು ಹೊಗಳಿದ್ದಾರೆ.

ಇದು ಮಹಿಳೆಯ ಸಾಮರ್ಥ್ಯ.. ಎಂದು ಸಾಮಾಜಿಕ ಜಾಲತಾಣ ಬಳಕೆದಾರರೊಬ್ಬರು ಪ್ರತಿಕ್ರಿಯೆ ನೀಡಿದ್ದಾರೆ.

ಅಲ್ಲದೆ, ಆಕೆಯ ಸಮರ್ಪಣೆ ಮತ್ತು ಪರಿಶ್ರಮ ಇತರೆ ಆಫ್ರಿಕಾದ ಮಹಿಳೆಯರಿಗೆ ಪಾಠವಾಗಬಲ್ಲಳು ಎಂದು ಕೆಲವರು ಪ್ರತಿಕ್ರಿಯೆ ನೀಡಿದ್ದಾರೆ.

ಅಲ್ಮಾಜ್ ಡೆರೆಸ್‌ - ಅದ್ಭುತ ಮಹಿಳೆ ಎಂದು ಸಹ ಒಬ್ಬರು ಹೊಗಳಿದ್ದಾರೆ.

ಇನ್ನು, ಗರ್ಭಿಣಿಯಾಗಿದ್ದ ವೇಳೆಯಲ್ಲೂ ಅಲ್ಮಾಜ್‌ಗೆ ಓದಲು ಯಾವುದೇ ತೊಂದರೆಯಾಗುತ್ತಿರಲಿಲ್ಲ. ಪದವಿ ಪಡೆದುಕೊಳ್ಳಲು ಮತ್ತೆ ಮುಂದಿನ ವರ್ಷದವರೆಗೆ ಕಾಯುವುದು ಆಕೆಗೆ ಇಷ್ಟವಿರಲಿಲ್ಲ ಎಂದು ಬಿಬಿಸಿ ವರದಿ ನೀಡಿದೆ.

ಆಸ್ಪತ್ರೆಯಲ್ಲೇ ಮೂರು ಪರೀಕ್ಷೆ ಬರೆದ ಆಕೆಯನ್ನು ಹಲವರು ಅಭಿನಂದಿಸಿದ್ದರೆ, ಇನ್ನು ಕೆಲವರು ಅವಳು ಯಾಕೆ ಎಲ್ಲಾ ತೊಂದರೆಗಳನ್ನು ಎದುರಿಸಬೇಕಾಯಿತು ಎಂದು ಹೇಳಿಕೊಂಡಿದ್ದಾರೆ.

ಅಲ್ಮಾಜ್ ಡೆರೆಸ್‌ಗೆ ಅಭಿನಂದನೆಗಳು. ಆದರೆ, ಮಹಿಳೆಯರು ಇಂತಹ ಸ್ಥಿತಿಗೆ ಏಕೆ ಒಳಗಾಗಬೇಕು. ಇದು ಅನ್ಯಾಯ ಮತ್ತು ಕ್ರೂರ ಎಂದೂ ಟ್ವೀಟಿಗನೊಬ್ಬ ಟ್ವೀಟ್‌ ಮಾಡಿದ್ದಾರೆ.

ಇನ್ನು ಹಲವರು ಮಹಿಳೆಯರಿಗೆ ಚಿಕ್ಕ ವಯಸ್ಸಿನಲ್ಲಿಯೇ ಮದುವೆ ಮಾಡುವ ಬಗ್ಗೆಯೂ ಪ್ರಶ್ನಿಸಿದ್ದಾರೆ. ಇಥಿಯೋಪಿಯಾದಲ್ಲಿ 10ರಲ್ಲಿ ನಾಲ್ವರು ಮಹಿಳೆಯರು 18 ವಯಸ್ಸು ತುಂಬುವ ಮೊದಲೇ ವಿವಾಹ ಬಂಧನಕ್ಕೊಳಗಾಗಿರುತ್ತಾರೆ ಎಂದು ಯುನಿಸೆಫ್‌ 2018ರ ವರದಿ ಹೇಳುತ್ತದೆ.

ಸದ್ಯ ಇಥಿಯೋಪಿಯಾದಲ್ಲಿ ಒಂದೂವರೆ ಕೋಟಿಯಷ್ಟು ಬಾಲ್ಯ ವಿವಾಹವಾದ ಮಹಿಳೆಯರು ಇದ್ದಾರೆ. ಇವರಲ್ಲಿ ಹೊಸದಾಗಿ ಮದುವೆಯಾಗಿರುವ ಹೆಣ್ಣು ಮಕ್ಕಳು ಹಾಗೂ ಮೊದಲು ಬಾಲ್ಯದಲ್ಲಿ ಈ ಮೊದಲು ಮದುವೆಯಾದ ಮಹಿಳೆಯರೂ ಸೇರಿದ್ದಾರೆ ಎಂದು ಇನ್ನೊಂದು ವರದಿ ಹೇಳುತ್ತದೆ.

ಜತೆಗೆ, ಗ್ರಾಮೀಣ ಪ್ರದೇಶಗಳಲ್ಲಿಅಥವಾ ಬಡವರ ಮನೆಯಲ್ಲಿ ಹುಟ್ಟಿರುವ ಹೆಣ್ಣು ಮಕ್ಕಳಿಗೆ ಈ ರೀತಿ ಹೆಚ್ಚಿನ ಅಪಾಯವಿರುತ್ತದೆ. ಅಲ್ಲದೆ, ಶಿಕ್ಷಣವಿಲ್ಲದ ಅಥವಾ ಕಡಿಮೆ ಶಿಕ್ಷಣವುಳ್ಳ ಹೆಚ್ಚು ಹೆಣ್ಣು ಮಕ್ಕಳೇ ಬಾಲ್ಯದಲ್ಲಿ ವಿವಾಹವಾಗಿದ್ದಾರೆ ಎಂದು ವರದಿ ತಿಳಿಸಿದೆ.