ಅಖಿಲ ಭಾರತ ವೈದ್ಯಕೀಯ ವಿಜ್ಞಾನಗಳ ಸಂಸ್ಥೆ(AIIMS) 2020 ಜುಲೈ ಸೆಷನ್‌ ಪಿಜಿ ಪ್ರವೇಶ ಪರೀಕ್ಷೆಯನ್ನು ಮುಂದೂಡಿದೆ. ಈ ಬಗ್ಗೆ ಅಧಿಕೃತ ನೋಟಿಫಿಕೇಶನ್‌ ಅನ್ನು ವೆಬ್‌ಸೈಟ್ aiimsexams.org ನಲ್ಲಿ ಪ್ರಕಟಿಸಿದೆ.

ಏಮ್ಸ್‌ ಬಿಡುಗಡೆ ಮಾಡಲಾದ ಪ್ರಕಟಣೆಯಲ್ಲಿ, "ದೇಶದ ಎಲ್ಲೆಡೆ ಕೊರೊನಾ ವೈರಸ್ ವ್ಯಾಪಕವಾಗಿ ಹರಡುತ್ತಿದೆ. ಈ ಹಿನ್ನೆಲೆಯಲ್ಲಿ ಅಖಿಲ ಭಾರತ ವೈದ್ಯಕೀಯ ವಿಜ್ಞಾನಗಳ ಸಂಸ್ಥೆಯು, ಎಂಡಿ / ಎಂಎಸ್‌ / ಡಿಎಂ(6 ವರ್ಷ)/ ಎಂ.ಸಿಹೆಚ್‌/ ಎಂಡಿಎಸ್ ಕೋರ್ಸ್‌ಗಳ ಜುಲೈ 2020 ಸೆಷನ್‌ನ ಪ್ರವೇಶ ಪರೀಕ್ಷೆಗಳನ್ನು ಮುಂದೂಡಲು ನಿರ್ಧರಿಸಿದೆ. ಏಮ್ಸ್‌ ಪಿಜಿ ಎಂಟ್ರ್ಯಾನ್ಸ್‌ ಎಕ್ಸಾಮ್ ಅನ್ನು ಮೇ 3 ರಂದು ನಡೆಸಲು ನಿಗದಿಗೊಳಿಸಿತ್ತು" ಎಂದು ಹೇಳಿದೆ.

ಏಮ್ಸ್‌ ಪಿಜಿ ಪ್ರವೇಶ ಪರೀಕ್ಷೆಗೆ ಸಂಬಂಧಿಸಿದಂತೆ ಪರಿಷ್ಕೃತ ದಿನಾಂಕಗಳನ್ನು ವೆಬ್‌ಸೈಟ್‌ನಲ್ಲಿ ಮುಂದಿನ ದಿನಗಳಲ್ಲಿ ಪ್ರಕಟಿಸಲಾಗುತ್ತದೆ. ಅಭ್ಯರ್ಥಿಗಳು ಆಗಾಗ ವೆಬ್‌ಗೆ ಭೇಟಿ ನೀಡಿ ಅಪ್‌ಡೇಟ್‌ ಚೆಕ್‌ ಮಾಡಲು ಸೂಚಿಸಿದೆ.

ಕೊರೊನಾ ಎಫೆಕ್ಟ್‌: ಯುಜಿ-ನೀಟ್‌ ಪರೀಕ್ಷೆ ಮುಂದೂಡಿಕೆ!

ಏಮ್ಸ್‌ ಪೋಸ್ಟ್ ಗ್ರಾಜುಯೇಟ್‌ ಕೋರ್ಸ್‌ಗಳ ಪ್ರವೇಶ ಪರೀಕ್ಷೆಯು ಕಂಪ್ಯೂಟರ್ ಆಧಾರಿತ ಪರೀಕ್ಷೆ ಆಗಿದ್ದು, ಒಂದು ವರ್ಷದಲ್ಲಿ ಎರಡು ಬಾರಿ ನಡೆಸಲಾಗುತ್ತದೆ. ಎಂಡಿ / ಎಂಎಸ್‌ ಕೋರ್ಸ್‌ಗೆ ಇಂಗ್ಲಿಷ್‌ನಲ್ಲಿ 200 ಅಂಕಗಳಿಗೆ ಆಬ್ಜೆಕ್ಟಿವ್ ಮಾದರಿ ಪ್ರಶ್ನೆಗಳನ್ನು ಒಳಗೊಂಡಿರುತ್ತದೆ. ಎಂಡಿಎಸ್ ಕೋರ್ಸ್‌ಗೆ ಪ್ರಶ್ನೆ ಪತ್ರಿಕೆಯು 90 ಅಂಕಗಳ ಆಬ್ಜೆಕ್ಟಿವ್ ಮಾದರಿ ಪ್ರಶ್ನೆಗಳನ್ನು ಒಳಗೊಂಡಿರುತ್ತದೆ.